Read Dagbani Yibu 36 Bible Online

Yibu 36 - Dagbani bible

Yibu 36

¹“Bɛzalɛl mini Oholiab ni Naawuni ni daa zaŋ yiko mini fahim niŋ ninvuɣ’ shɛb’ zaa ni ni bɛ baŋ bɛ ni yɛn tumdi tuma shɛm luɣ’ kasi shee la malibu ni ti tum bɛ tuma kaman Yawɛ ni zali ba shɛm.”

²Ka Musa daa boli Bɛzalɛl mini Oholiab ni Yawɛ ni daa zaŋ yiko niŋ ninvuɣ’ shɛb’ ni ni ninvuɣ’ shɛb’ bɛn suhuri daa yɛli ba ni bɛ kana ti tum tuma maa zaa na

³nti zaŋ Izraɛlnim’ ni daa zaŋ bɛ suhuyubu pin’ shɛŋa na ni bɛ ti zaŋ tum luɣ’ kasi shee tuma maa ti ba. Ka niriba maa daa na kul zaŋdi pina na ni bɛ suhuyubu asiba kam nti tir’ o.

⁴Ka tuumbaŋdiba bɛn zaa daa tumdi tuma luɣ’ kasi shee maa daa ti yi bɛ tuma shee na

⁵nti yɛli Musa, “Niriba maa zaŋ nɛma maa na pam n-gari ti ni bɔri shɛm tariga ni ti zaŋ tum Yawɛ ni zali ti ni ti tum tuun’ shɛli maa.”

⁶Ka Musa daa chɛ ka bɛ moli molo gili bɛ sansani maa ni zaa yɛli, “Doo bee paɣa miri ka o lan niŋ shɛli zaŋ chaŋ bɛ suhuyubu pin’ shɛŋa bɛ ni zaŋdi na ni bɛ ti zaŋ tum luɣ’ kasi shee tuma la polo.” Ka bɛ daa gooi niriba maa ka bɛ bi lan zaŋdi pina maa na.

⁷Dama bɛ ni daa pun zaŋ neen’ shɛŋa na maa daa nyɛla din ni tooi zaŋ tum tuma maa zaa ka guui.

⁸Ka ninvuɣ’ shɛb’ bɛn daa nyɛ tumtumdiba maa ni tuumbaŋdiba zaa daa zaŋ tan’ piɛl’ viɛlli din ŋmɛliŋmɛli tan’ tolima pia mali Naawuni biɛhigu shee maa; ka zaŋ gali sabilifaa mini gali ʒiɛkpeein ni gali ʒiɛkpain n-chɛ ka tuumbaŋda zaŋ li wuɣi.

⁹Tan’ tolli kam wɔɣilim daa nyɛla mita pinaata, ka di yɛliŋ mi nyɛ mita ayi. Tan’ tolima maa zaa buɣisibu daa nyɛla yim.

¹⁰Bɛ daa zaŋla tan’ tolima anu she n-tuɣi taba, ka lan zaŋ tan’ tolima anu din’ la gba she n-tuɣi taba.

¹¹Bɛ daa zaŋla gali sabilifaa n-she biŋgolinsi niŋ tuuli pateesa la naŋgbambili, ka lan niŋ pateesa shɛli din pah’ ayi gba lala.

¹²Bɛ daa shɛla biŋgolinsi pihinu niŋ pateesa yin’ ni ka lan she biŋgolinsi pihinu niŋ pateesa din’ la gba ni. Biŋgolinsi maa daa domi tuhi taba.

¹³Bɛ daa malila salima bansi pihinu n-zaŋ gɔhigɔhi pateesanim’ maa tuɣi taba, ka di daa chɛ ka Naawuni biɛhigu shee maa niŋ zaɣ’ mun’ yini.

¹⁴Bɛ daa lan zaŋ buhi kɔbiri wuɣi tana piniyini n-zaŋ li pili Naawuni biɛhigu shee maa.

¹⁵Tan’ yini kam wɔɣilim daa nyɛla mita pinaata, ka di yɛliŋ mi nyɛ mita ayi. Tan’ tolima piniyini maa zaa buɣisibu daa nyɛla yim.

¹⁶Bɛ daa zaŋla tana anu she n-tuɣi taba di ko, ka lan zaŋ tana ayɔbu la she n-tuɣi taba di ko.

¹⁷Bɛ daa lan mali biŋgolinsi pihinu niŋ pateesa shɛli din be tooni naŋgbambili, ka lan mali biŋgolinsi pihinu niŋ pateesa shɛli din bahindi nyaaŋa gba naŋgbambili.

¹⁸Bɛ daa lan zaŋ daanya mali bansi pihinu n-zaŋ gɔhigɔhi suɣili maa tabili taba, ka di niŋ zaɣ’ yini.

¹⁹Bɛ daa lan zaŋ piɛlahi gbana din niŋ moonsi pili suɣili maa, ka zaŋ teeku ni biŋkɔbbal’ shɛb’ gbana pili pa di zuɣu.

²⁰Di nyaaŋa ka bɛ daa lan zaŋ gɔpiɛliga dari mali dapaɣa niŋ Naawuni biɛhigu shee suɣili maa.

²¹Dapaɣili kam wɔɣilim daa nyɛla mita anahi, ka di yɛliŋ mi nyɛ sɛntimita pihiyɔbunaayɔbu.

²²Dapaɣili kam daa malila dashɛbira ayi din ni chɛ ka bɛ zaŋ li tuɣi taba. Bɛ daa niŋla Naawuni biɛhigu shee suɣili dapaɣa maa zaa lala.

²³Bɛ daa malila dapaɣa pisi niŋ Naawuni biɛhigu shee suɣili maa nudirigu polo.

²⁴Bɛ daa zaŋla anzinfa mali dapaɣa pisi maa ni yɛn tamdi binshɛŋa zuɣu bini pihinahi. Dapaɣili kam daa malila di ni yɛn tamdi binshɛŋa zuɣu diba ayi, ka di dashɛbira ayi shɛb’ di ni.

²⁵Naawuni biɛhigu shee nuzaa polo din daa pahiri buyi la, bɛ daa malila dapaɣa pisi

²⁶mini di ni yɛn tamdi anzinfa binshɛŋa zuɣu bini pihinahi. Dapaɣ’ yini daa malila di ni yɛn tamdi binshɛŋa zuɣu diba ayi, ka dapaɣ’ yini gba mali di ni yɛn tamdi binshɛŋa zuɣu diba ayi.

²⁷Bɛ daa zaŋla dapaɣa ayɔbu mali Naawuni biɛhigu shee maa nyaaŋa zaŋ lab’ wulinluhili polo.

²⁸Bɛ daa malila dapaɣa ayi niŋ Naawuni biɛhigu shee maa nyaaŋa lɔris’ ayi la ni.

²⁹Ka bɛ daa zaŋ ban’ yini ga di zuɣusaa polo tabili taba, amaa ka di zaŋ siɣi tiŋ’ na lee woligi taba. Lala ka bɛ daa mali diba ayi maa niŋ lɔris’ ayi maa ni.

³⁰Di zaa daa nyɛla dapaɣa anii mini di ni yɛn tamdi anzinfa binshɛŋa zuɣu pinaayɔbu. Dapaɣili kam daa tamla diba ayi zuɣu.

³¹Bɛ daa lan zaŋ gɔpiɛliga dari mali dapuhi n-zaŋ dapuh’ anu niŋ Naawuni biɛhigu shee maa yaɣ’ yini polo dapaɣa,

³²ka zaŋ diba anu niŋ yaɣ’ din’ la mi polo dapaɣa, ka zaŋ diba anu niŋ di nyaaŋa wulinluhili polo dapaɣa.

³³Bɛ daa lan mali sunsuuni dapua din be dapaɣa maa pirigili zuɣusaa polo la, ka di zaŋ yaɣ’ yini hal ti paai yaɣ’ din’ la tariga.

³⁴Ka bɛ daa niŋ salima niŋ dapaɣa maa, ka mali salima bansi niŋ li ka di gbibi dapuhi maa, ka niŋ salima niŋ dapuhi maa.

³⁵Bɛ daa lan zaŋ gali sabilifaa mini gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli she pateesa, ka chɛ ka tuumbaŋda wuɣi chɛrubinim’ pa di zuɣu.

³⁶Bɛ daa zaŋla gɔpiɛliga dari mali di daantalis’ anahi, ka niŋ salima niŋ li, ka zaŋ salima mali di bansi. Bɛ daa lan zaŋ anzinfa mali daantalisi maa ni yɛn tamdi binshɛŋa zuɣu ni bɛ zaŋ pateesa maa yili li.

³⁷Bɛ daa zaŋla tan’ piɛl’ viɛlli din ŋmɛliŋmɛli n-she pateesa, ka zaŋ gali sabilifaa mini gali ʒiɛkpeein ni gali ʒiɛkpain n-chɛ ka tuumbaŋda zaŋ shɛriga wuɣi binyɛra pa di zuɣu ka bɛ zaŋ li yili suɣili maa dunoli.

³⁸Bɛ daa lan mali di daantalis’ anu mini di bansi, ka niŋ salima pa daantalisi maa zuɣuri ni mini di mihi zuɣu, amaa di ni yɛn tamdi bina anu shɛŋa zuɣu la dina, daanya ka bɛ daa zaŋ mal’ li.