Read Dagbani Yibu 38 Bible Online

Yibu 38 - Dagbani bible

Yibu 38

¹Ka o daa lan zaŋ gɔpiɛliga dari mali bɛ ni yɛn nyɔri sara maligu buɣim bimbin’ shɛli zuɣu. Di wɔɣilim daa nyɛla mita ayi ni biɛla, ka di yɛliŋ nyɛ mita ayi ni biɛla. Di daa nyɛla zaɣ’ mɔɣu, ka di dubu nyɛ mita yini ni biɛla.

²Ka o daa mali binyila tam di naŋgbani tarisi bunahi zuɣu, ka di mini di binyila maa zaa nyɛ zaɣ’ yini, ka o daa niŋ daanya niŋ li.

³O daa lan mali sara maligu bimbini maa zuɣu binyara zaa. Di duɣuri mini di soobuya ni di taha ni di dirijaba ni lahi din ni moori buɣim. Daanya ka o daa zaŋ mali di zaa.

⁴O daa zaŋla daanya mali sara maligu bimbini maa kurupooti n-zaŋ li zali di naŋgbaŋkuɣila lɔŋni, ka di du m-paai di pirigili tariga zaŋ siɣi tiŋ’ polo.

⁵Ka o daa lan mali bans’ anahi tam daanya kurupooti maa naŋgbani tarisi bunahi zuɣu din yɛn gbibi di dapuhi.

⁶Akasia dari ka o daa zaŋ mali dapuhi maa, ka niŋ daanya niŋ li.

⁷Ka o daa zaŋ dapuhi maa n-tuntu ban’ shɛŋa din daa be sara maligu bimbini maa luɣa zuɣu la ni, ka bɛ mal’ li kpuɣiri sara maligu bimbini maa. O daa zaŋla taabo dari mal’ li, ka di puuni nyɛ zaɣ’ yɔɣu.

⁸ Ka o daa zaŋ paɣ’ shɛb’ bɛn daa tumdi tuma Yawɛ min’ o niriba laɣiŋgu suɣili dunol’ ni la daanya diɣisi mali tahili mini di ni yɛn tamdi binshɛli zuɣu.

⁹Ka o daa mali dundɔŋ, ka zaŋ tan’ piɛl’ viɛlli din ŋmɛliŋmɛli n-she pateesa din wɔɣilim nyɛ mita pihinahinaanahi n-yili di nudirigu polo.

¹⁰Di daantalisi pisi mini di ni yɛn tamdi binshɛŋa zuɣu pisi la daa nyɛla daanya. Amaa ban’ shɛŋa din daa yili daantalisi maa mini di mihi la din’ daa nyɛla anzinfa.

¹¹Di nuzaa polo gba daa mali pateesanim’ din wɔɣilim nyɛ mita pihinahinaanahi, ka di daantalisi pisi mini di ni yɛn tamdi binshɛŋa zuɣu pisi la daa nyɛ daanya, amaa bin’ shɛŋa din daa yili daantalisi maa mini di mihi la din’ daa nyɛla anzinfa.

¹²Ka di wulinluhili polo daa mali pateesanim’ din wɔɣilim nyɛ mita pisinaayi, ka mali daantalisi pia ni di ni yɛn tamdi binshɛŋa zuɣu pia, ka daantalisi maa bansi mini di mihi la daa nyɛ anzinfa.

¹³Ka di tooni zaŋ labi wulimpuhili polo pateesanim’ wɔɣilim daa nyɛ mita pisinaayi.

¹⁴Ka pateesa’ shɛŋa din daa yili dunoli maa yaɣ’ yini wɔɣilim daa pooi mita ayopɔin biɛla, ka di mali daantalis’ ata mini di ni yɛn tamdi binshɛŋa zuɣu diba ata.

¹⁵Ka yaɣ’ din’ la gba daa mali lala; lɔndo maa dunoli nudirigu mini nuzaa polo zaa daa malila pateesanim’ din wɔɣilim daa pooi mita ayopɔin biɛla, ka di mali daantalis’ ata mini di ni yɛn tamdi binshɛŋa zuɣu.

¹⁶Pateesa’ shɛŋa din zaa daa yili gili lɔndo maa daa nyɛla tan’ piɛl’ viɛlli din ŋmɛliŋmɛli.

¹⁷Daantalisi maa ni daa yɛn tamdi binshɛŋa zuɣu daa nyɛla daanya, amaa daantalisi maa bansi mini di mihi la din’ daa nyɛla anzinfa, ka bɛ daa niŋ anzinfa pa daantalisi maa zuɣuri ni, ka lɔndo maa daantalisi mihi zaa daa nyɛ anzinfa.

¹⁸O daa zaŋla tan’ piɛli viɛlli din ŋmɛliŋmɛli she lɔndo maa dunɔdali pateesa, ka zaŋ gali sabilifaa mini gali ʒiɛkpeein ni gali ʒiɛkpain n-zaŋ shɛriga wuɣi binyɛra pa di zuɣu. Di wɔɣilim daa nyɛla mita awɛi, ka di dunoli dubu din mini pateesa maa yɛliŋ daa saɣisi la daa nyɛ mita ayi, ka di mini pateesa’ shɛŋa din daa yili lɔndo maa ni saɣisi taba.

¹⁹Ka di daantalisi anahi mini di ni yɛn tamdi binshɛŋa anahi zuɣu daa nyɛ daanya, ka di bansi daa nyɛ anzinfa, ka o daa niŋ anzinfa pa daantalisi maa zuɣuri ni, ka di mihi gba daa nyɛ anzinfa.

²⁰Yawɛ biɛhigu shee suɣili maa kpahi zaa mini lɔndo din daa gili Yawɛ biɛhigu shee suɣili maa kpahi zaa daa nyɛla daanya.

²¹Bɛ ni daa zaŋ neen’ shɛŋa mali Yawɛ biɛhigu shee suɣili, luɣ’ shɛli alikauli shɛhira ni daa bela m-bɔŋɔ. Lɛvinima n-daa niŋ nɛma maa zaa laasabu ka sabi li sɔŋ kaman Musa ni daa zali ba shɛm. Itama ŋun daa nyɛ maligumaana Aduna bia la n-daa wuhi ba ka bɛ sabi li.

²²Uri bia Bɛzalɛl ŋun daa nyɛ Hur yaaŋa, ka nyɛ Juda zuliya ni nir’ la n-daa mali binshɛɣukam zaa Yawɛ ni daa zali Musa ni o mali maa.

²³Ŋun daa pah’ o zuɣu n-daa nyɛ Ahisamak bia Oholiab ŋun daa nyɛ Dan zuliya ni nir’ la. O daa nyɛla nuhi tuumbaŋda, ka lan nyɛ ŋun zaŋd’ omaŋmaŋ’ tɛha maani binyɛra, ka lan nyɛ kpalua ŋun ni tooi zaŋ gali sabilifaa mini gali ʒiɛkpeein wuɣi binyɛra pa tan’ piɛl’ viɛli zuɣu.

²⁴Bɛ ni daa zaŋ salim’ shɛli zaa na ti mali sara ka bɛ zaŋ li tum tuma luɣ’ kasi shee la tibisim daa nyɛla kilɔgiram tuhili kaman luɣ’ kasi shee sania zahimbu ni nyɛ shɛm.

²⁵Ka bɛ ni daa kali ninvuɣ’ shɛb’ la ni daa zaŋ anzinfa shɛli na tibisim daa nyɛ kilɔgiram tusaata ni kɔbisinahi ni pihita kaman luɣ’ kasi shee sania zahimbu ni nyɛ shɛm.

²⁶ Sokam daa yola bɛkabɛka (din nyɛ anzinfa laɣifu pirigili la kaman luɣ’ kasi shee sania zahimbu ni nyɛ shɛm). Bɛ ni daa kali ninvuɣ’ shɛb’ bɛn yuma nyɛ yuun’ pisi zaŋ chani maa, bɛ kalinli daa nyɛla dɔbba tuhi’ kɔbisiyɔbunaata ni kɔbisinu ni pihinu.

²⁷O daa zaŋla anzinfa din tibisim nyɛ kilɔgiram tusaata ni kɔbisinahi mali luɣ’ kasi shee maa dapaɣa ni yɛn tamdi binshɛŋa zuɣu mini pateesa daantalisi ni yɛn tamdi binshɛŋa zuɣu. O daa zaŋla anzinfa mali bintamdisi kɔbiga. Bintamdigu zaɣ’ yini kam daa dila anzinfa din tibisim nyɛ kilɔgiram pihitanaanahi.

²⁸O daa zaŋla anzinfa din kpalim ka di tibisim nyɛ kilɔgiram pihita m-mali bansi din yɛn yili daantalisi la mini di mihi ka niŋ anzinfa pa daantalisi maa zuɣuri ni.

²⁹Bɛ ni daa tɔhi daanya shɛli tibisim daa nyɛla kilɔgiram tusaayi ni kɔbisinahi ni pisinaanu.

³⁰Ka o daa zaŋ li mali Yawɛ chirigibu shee suɣili maa dunoli daantalisi ni yɛn tamdi binshɛŋa zuɣu mini daanya sara maligu bimbini ni di daanya kurupooti la ni sara maligu bimbini maa zuɣu nɛma

³¹mini dundɔŋ din gil’ li maa daantalisi ni yɛn tamdi binshɛŋa zuɣu ni dundɔŋ maa dunɔdali daantalisi ni yɛn tamdi binshɛŋa zuɣu ni Yawɛ biɛhigu shee suɣili kpahi zaa ni dundɔŋ din daa gil’ li maa kpahi zaa.