Read Dagbani Yibu 39 Bible Online

Yibu 39 - Dagbani bible

Yibu 39

¹Dimbɔŋɔ nyaaŋa ka bɛ daa zaŋ gali sabilifaa mini gali ʒiɛkpeein ni gali ʒiɛkpain n-she binyɛr’ shɛŋa bɛ ni yɛri tumdi tuma luɣ’ kasi shee la viɛnyɛliŋga, ka daa lan she binyɛr’ shɛŋa din be kasi ti Aduna kaman Yawɛ ni daa zali ba shɛm.

²Bɛ daa zaŋla salima gali mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli she binyɛribil’ din yɛri pari zuɣusaa la.

³Ka bɛ daa zaŋ matarika kuri salima ŋ-ŋmahi li kaman gal’ la n-zaŋ li garisi gali sabilifaa mini gali ʒiɛkpeein ni gali ʒiɛkpain n-wuɣi binyɛra pa tan’ piɛli viɛlli din ŋmɛliŋmɛli zuɣu.

⁴Ka bɛ daa she bɔɣusapima zuɣu tan’ tolima niŋ binyɛribila maa naŋgbambiya.

⁵Bɛ daa zaŋla neen’ yinsi din nyɛ salima gali mini gali sabilifaa ni gali ʒiɛkpeein ni gali ʒiɛkpain ni tan’ piɛli viɛlli din ŋmɛliŋmɛli tum tuun’ yinsi maa n wuɣi shɛlɔrigu niŋ di ni kaman Yawɛ ni daa zali Musa shɛm.

⁶Ka bɛ daa lan mali oniɣisi kuɣa n-zaŋ li tam salima bintaɣindisi ni, ka zaŋ chiriga chirigi Izraɛl bidibisi la yuya pa di zuɣu kaman bɛ ni chirigiri nintu’ shɛli bɛ ni mali dihiri binyɛra zuɣu shɛm la.

⁷Ka o daa zaŋ li niŋ binyɛribil’ din yɛri pari zuɣusaa maa bɔɣusapima zuɣu tan’ tolima la ni ka di nyɛ kuɣ’ shɛŋa bɛ ni yɛn mali teeri Izraɛl bidibisi maa yɛla kaman Yawɛ ni daa zali shɛm.

⁸O daa mali nyolɔrigu ka di be kaman bɛ ni daa she binyɛribil’ din yɛri pari zuɣusaa la shɛm la. Bɛ daa zaŋla salima gali mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli mal’ li.

⁹Di daa nyɛla zaɣ’ mɔɣu, ka kpabi yim zuɣu ka di wɔɣilim nyɛ sɛntimita pisinaayi, ka di yɛliŋ gba nyɛ sɛntimita pisinaayi.

¹⁰Ka bɛ daa zaŋ kuɣ’ viɛl’ shɛŋa pie taba kulis’ anahi. Bɛ daa zaŋla bɛ ni booni kuɣ’ shɛŋa kanɛlian mini kirisolait ni ɛmɛrald m-pie taba kul’ shɛli din daŋ tooni;

¹¹ka zaŋ tɛkɔisi mini safaya ni daimɔnd pie kul’ shɛli din pahir’ ayi,

¹²ka lan zaŋ jɛsint mini agɛt ni amɛtisit la m-pie taba kul’ shɛli din pahir’ ata,

¹³ka bɛ daa zaŋ bɛril mini oniɣisi ni jasipa m-pie taba kul’ shɛli din pahir’ anahi. Ka bɛ daa zaŋ li niŋ salima bintaɣindisi la ni.

¹⁴Di daa nyɛla kuɣa pinaayi, ka bɛ daa zaŋ chiriga n-chirigi Izraɛl bidibisi la yinoyino yuli pa kuɣili kam zuɣu, di daa ŋmanila nintu’ shɛŋa bɛ ni mali dihiri binyɛra zuɣu la, ka zuliya pinaayi la zuliya yini kam yuli pa kuɣili kam zuɣu.

¹⁵Ka bɛ daa zaŋ salima alali mali zoligɔnima ŋ-ŋmɛl’ li kaman gabisi la n-zaŋ li niŋ nyolɔrigu maa.

¹⁶Ka bɛ daa lan mali salima bintaɣindisi ayi mini salima bans’ ayi, ka zaŋ salima bans’ ayi maa goli gɔhi nyolɔrigu maa naŋgbambiya,

¹⁷ka daa zaŋ salima gabisi ayi la gɔhi bans’ ayi din daa goligoli nyolɔrigu maa naŋgbambiya la.

¹⁸Ka bɛ daa zaŋ zoligɔnim’ ayi la noya gɔhi bintaɣindisi la. Lala ka bɛ daa niŋ zaŋ li gɔhi binyɛribil’ din yɛri pari zuɣusaa la bɔɣusapima zuɣu tan’ tolima la tooni.

¹⁹Di nyaaŋa ka bɛ daa mali salima bans’ ayi n-zaŋ li gɔhi nyolɔrigu maa puuni naŋgbanbiya, ka di miri binyɛribil’ din yɛri pari zuɣusaa maa.

²⁰Ka bɛ daa mali salima bans’ ayi n-zaŋ li gɔhi binyɛribil’ din yɛri pari zuɣusaa la bɔɣusapima zuɣu tan’ tolima ayi la tiŋli di tooni polo miri di tuɣibu shee binyɛribila maa shɛlɔrigu la zuɣusaa polo.

²¹Ka bɛ daa zaŋ mi’ sabilifaa lo nyolɔrigu maa bansi la mini binyɛribil’ din yɛri pari zuɣusaa la bansi gɔhi taba din ni chɛ ka di pa bɛ ni wuɣi binyɛribil’ din yɛri pari zuɣusaa maa shɛlɔr’ shɛl’ la zuɣu din ni chɛ ka nyolɔrigu maa ku be di ko, ka chɛ binyɛribila din yɛri zuɣusaa maa kaman Yawɛ ni daa zali Musa shɛm.

²²Ka bɛ daa lan zaŋ gali sabilifaa wuɣi alichɛbba shɛli maligumaana ni yɛn yɛri pahi binyɛribil’ din yɛri pari zuɣusaa maa zuɣu. Alichɛbba maa daa nyɛla zaɣ’ sabilifaa zaa.

²³Alichɛbba maa nyiŋgoli daa ŋmanila kurugu gbaɣino nyiŋgoli, ka bɛ niŋ tani kɔɣili di nyiŋgoli maa zaa gili din’ ni chɛ ka di ku cheei.

²⁴Ka bɛ daa zaŋ gali sabilifaa mini gali ʒiɛkpeein ni gali ʒiɛkpain ni gali piɛl’ viɛlli din ŋmɛliŋmɛli mali pumpɔrinchihi kɔtomsi niŋ alichɛbba maa tiŋli ti tuui.

²⁵Bɛ daa lan zaŋ salima alali mali buɣilimbuɣilimbihi n-zaŋ li yiliyili pumpɔrinchihi kɔtomsi din daa be alichɛbba maa tiŋli la sunsuuni ti tuui ka di daa be pumpɔrinchihi kɔtomsi maa sunsuuni.

²⁶Bɛ daa yil’ la buɣilimbuɣilimbila ni pumpɔrinchihi kɔtomsi ka lan yili buɣilimbuɣilimbila ni pumpɔrinchihi kɔtomsi m-mali lala hal ti tuui alichɛbba shɛli bɛ ni yɛn yɛri tumdi tuma maa tiŋli kaman Yawɛ ni daa zali Musa shɛm.

²⁷Bɛ daa lan zaŋ kpalua ni wuɣi tan’ piɛl’ viɛl’ shɛli n-she zabbanim’ ti Aduna min’ o bidibisi maa,

²⁸ka zaŋ tan’ piɛl’ viɛlli she bantabiga mini zuɣupila, ka lan zaŋ tan’ piɛli viɛlli din ŋmɛliŋmɛli she jɛŋjɛŋŋmahi

²⁹ni shɛlɔr’ shɛli bɛ ni daa zaŋ tan’ piɛl’ viɛlli din ŋmɛliŋmɛli she ka zaŋ gali sabilifaa mini gali ʒiɛkpeein ni gali ʒiɛkpain n-zaŋ shɛriga wuɣi binyara pa di zuɣu kaman Yawɛ ni daa zali Musa shɛm.

³⁰Bɛ daa lan zaŋ bimparilan’ shɛli din pari gbɛɣu zuɣu ka di nyɛ din be kasi, ka sabi sabbu pa di zuɣu kaman bɛ ni mali nintu’ shɛli dalinli dihiri tabindi binyara zuɣu la. Sabbu maa n-daa nyɛ: “O nyɛla ŋun be kasi Yawɛ sani.”

³¹Ka bɛ daa zaŋ mi’ sabilifaa niŋ li ni bɛ zaŋ li lɔri pari bantabiga maa zuɣu kaman Yawɛ ni daa zali Musa shɛm.

³²Lala ka bɛ daa niŋ tum Naawuni biɛhigu shee maa mini Naawuni min’ o niriba laɣiŋgu suɣili maa tuma zaa naai. Ka Izraɛlnim’ maa daa shiri niŋ kaman Yawɛ ni daa zali Musa shɛm maa zaa.

³³Ka bɛ daa zaŋ Naawuni biɛhigu shee maa na ti ti Musa, ka daa lan zaŋ suɣili maa mini di nɛma zaa ni di bansi ni di dapaɣa ni di dapuhi ni di daantalisi mini di ni yɛn tamdi binshɛŋa zuɣu

³⁴ni di pindigu din daa nyɛ bɛ ni nani piɛlahi gban’ shɛŋa n-niŋ moonsi mɔhi li la mini di pindigu shɛli din nyɛ teeku ni biŋkɔb’ bal’ shɛb’ gbana la ni pateesa la

³⁵ni Alikauli Adaka mini di dapuhi ni di yɔrigu

³⁶ni teebul’ la mini di zuɣu lahi zaa ni bɔrɔbɔro din be kasi la

³⁷ni salima alali firilatamdigu la mini di zuɣu firilanim’ din pie tab’ la ni di nɛma zaa ni firila kpam

³⁸ni salima sara maligu bimbin’ ni bɛ ni yɛn boori kpa’ shɛli bahiri niriba zuɣuri ni ni tulaale zim din nyom viɛla ni pateesa shɛli din yɛn yiini suɣili maa dunoli

³⁹ni daanya sara maligu bimbini la mini di daanya kurupooti ni di dapuhi ni di zuɣu nɛma zaa ni tahili la ni di ni yɛn tamdi binshɛli zuɣu

⁴⁰ni pateesa’ shɛŋa din yɛn yiini dundɔŋ la ni mini di daantalisi ni di ni yɛn tamdi binshɛŋa zuɣu ni pateesa shɛli din yɛn yili dundɔŋ maa dunoli ni ni di mihi ni di kpahi ni neen’ shɛŋa zaa bɛ ni yɛn zaŋ tumdi tuma Naawuni biɛhigu shee din nyɛ Naawuni min’ o niriba laɣiŋgu suɣili maa ni

⁴¹ni bɛ ni daa she binyɛr’ viɛl’ shɛŋa ni bɛ yɛri tumdi tuma luɣ’ kasi shee la mini binyɛr’ kasi shɛŋa bɛ ni daa she n-ti Aduna ŋun nyɛ maligumaana la min’ o bidibisi ni bɛ tumdi maligumaaniba tuma la.

⁴²Yawɛ ni daa zali Musa shɛm, lala ka Izraɛlnim’ daa niŋ tum tuma maa zaa.

⁴³Musa ni daa nya ka bɛ tum tuma maa zaa kaman Yawɛ ni daa zali ba ni bɛ tum li shɛm maa, ka o daa suhi alibarika niŋ bɛ ni.