Read Dagbani Yibu 40 Bible Online

Yibu 40 - Dagbani bible

Yibu 40

¹Yawɛ daa yɛli Musa,

²“Samiya Naawuni biɛhigu shee din nyɛ Naawuni min’ o niriba laɣiŋgu suɣili maa gol’ tuuli dahin’ yini dali.

³Zaŋmiya Alikauli Adaka la zali di puuni, ka zaŋ pateesa yili limsi li.

⁴Yi ni ti zaŋ teebul’ la na ti mal’ li zali di zaashee di puuni; ka zaŋ firilatamdigu la na nti zaŋ di firilanim’ la tam di zuɣu.

⁵Ka yi ti zaŋ salima sara maligu bimbin’ shɛli zuɣu yi ni yɛn tuɣindi tulaale zim la zali Alikauli Adaka maa tooni, ka zaŋ pateesa yili Naawuni biɛhigu shee maa dunoli.

⁶Ka yi ti zaŋ sara maligu bimbin’ shɛli zuɣu bɛ ni nyɔri sara maligu buɣim la zali Naawuni biɛhigu shee din nyɛ Naawuni chirigibu min’ o niriba laɣiŋgu suɣili maa dunol’ la tooni,

⁷ka zaŋ tahili la zali Naawuni min’ o niriba laɣiŋgu suɣili maa mini sara maligu bimbin’ la sunsuuni n-niŋ kom niŋ di ni.

⁸Ka yi ti niŋ dundɔŋ gili di zaa, ka zaŋ pateesa yili di dunɔdali.

⁹“Yi ni ti booi kpa’ shɛli bɛ ni boori bahiri niriba zuɣuri ni la m-bahi Naawuni biɛhigu shee maa mini di puuni nɛma zaa zuɣu, ka malimali di mini di puuni binyɛra zaa, ka di leei din be kasi.

¹⁰Di lan simdi ka yi booi kpam maa bahi bɛ ni nyɔri sara maligu buɣim bimbin’ shɛli zuɣu la gba mini di nɛma la zaa zuɣu, ka malimali sara maligu bimbini maa ka di leei din be kasi zaa.

¹¹Di lan simdi ka yi ti booi kpam maa bahi tahili la mini di ni yɛn tamdi binshɛli zuɣu, ka di leei din be kasi.

¹²“Dimbɔŋɔ nyaaŋa ka a ti zaŋ Aduna min’ o bidibisi maa ka Naawuni min’ o niriba laɣiŋgu suɣili maa dunol’ ni na nti chɛ ka bɛ niŋ kom paɣi bɛ ni,

¹³ka a zaŋ binyɛra din be kasi yɛli Aduna ka booi kpam bah’ o zuɣu ni m-mal’ o, ka o leei maligumaana n-tumdi n tuma.

¹⁴A ni zaŋ o bidibisi maa gba na ti zaŋ zabbanim’ yɛli ba,

¹⁵ka booi kpam bahi bɛ zuɣuri ni kaman a ni niŋ bɛ ba shɛm maa, ka bɛ leei maligumaaniba n-tumdi n tuma, ka kpam booi bahi bɛ zuɣuri ni maa ni ti ba soli ka bɛ kul nyɛ maligumaaniba sahakam bɛ ʒiɛman’ ni.”

¹⁶Ka Musa daa niŋ binshɛɣukam kaman Yawɛ ni daa wuh’ o ni o niŋ maa.

¹⁷Dinzuɣu gol’ so ŋun daa daŋ tooni yuun’ shɛli din pahir’ ayi maa ni dahin yini dali, ka o daa sa Naawuni biɛhigu shee suɣili maa.

¹⁸Ka Musa daa sa Naawuni biɛhigu shee maa, ka zaŋ di ni yɛn tamdi binshɛŋa zuɣu zalizali, ka zaŋ di dapaɣa la tamtam di zuɣu, ka zaŋ di dapuhi la niŋ li, ka zaŋ di daantalisi la sa;

¹⁹ka zaŋ tani n-yirigi pili Naawuni biɛhigu shee maa, ka kpuɣi binshɛli din yɛn pili suɣili maa pil’ li kaman Yawɛ ni daa wuh’ o shɛm.

²⁰Ka o daa zaŋ alikauli la niŋ adaka maa puuni, ka zaŋ dapuhi la niŋ adaka maa, ka zaŋ adaka maa yɔrigu yo li

²¹n-zaŋ li ti zali Naawuni biɛhigu shee maa, ka zaŋ pateesa yili liri Alikauli Adaka maa kaman Yawɛ ni daa wuh’ o shɛm.

²²Ka o daa zaŋ teebul’ la kpɛhi Naawuni min’ o niriba laɣiŋgu suɣili maa puuni nti zaŋ li zali Naawuni biɛhigu shee maa nuzaa polo pateesa la nyaaŋa,

²³ka zaŋ bɔrɔbɔro na ti tam di zuɣu viɛnyɛliŋga Yawɛ tooni kaman Yawɛ ni daa wuh’ o shɛm.

²⁴Ka o daa lan zaŋ firilatamdigu la kpɛhi Naawuni min’ o niriba laɣiŋgu suɣili maa puuni nti zaŋ li zali tuhi teebuli maa Naawuni biɛhigu shee maa nudirigu polo,

²⁵ka zaŋ firilanim’ la tamtam di zuɣu Yawɛ tooni kaman Yawɛ ni daa wuh’ o shɛm.

²⁶Ka o daa zaŋ salima sara maligu bimbini la kpɛhi Naawuni chirigibu shee suɣili maa puuni nti zaŋ li zali pateesa la tooni,

²⁷ka zaŋ tulaale zim din nyom viɛla n-tuɣili di zuɣu kaman Yawɛ ni daa wuh’ o shɛm.

²⁸Ka o daa zaŋ pateesa yili Naawuni biɛhigu shee maa dunoli.

²⁹Ka o daa lan zaŋ bɛ ni nyɔri sara maligu buɣim bimbin’ shɛli zuɣu la ti zali Naawuni biɛhigu shee din nyɛ Naawuni min’ o niriba laɣiŋgu suɣili la dunol’ ni, ka mali bɛ ni zaŋdi sara shɛli nyɔri buɣim la mini kawana ni chi sara di zuɣu kaman Yawɛ ni daa wuh’ o shɛm.

³⁰Ka o daa zaŋ tahili la zali Naawuni min’ o niriba laɣiŋgu suɣili maa mini sara maligu bimbini maa sunsuuni, ka niŋ kɔpaɣirim niŋ di ni.

³¹Ka Musa mini Aduna ni Aduna bidibisi maa daa mal’ li paɣiri bɛ nuhi mini bɛ naba.

³²Bɛ daa yi yɛn kpe Naawuni min’ o niriba laɣiŋgu suɣili maa ni bee n-chaŋ sara maligu bimbin’ la gbini, bɛ paɣirila bɛ nuhi mini bɛ naba kaman Yawɛ ni daa zali Musa shɛm la.

³³Ka o daa niŋ dundɔŋ gili Naawuni biɛhigu shee maa mini sara maligu bimbini maa, ka zaŋ pateesa yili di dunoli. Lala ka Musa daa niŋ naai tuma maa.

³⁴ Ka sagbani daa sirigina ti pili Naawuni min’ o niriba laɣiŋgu suɣili maa, ka Yawɛ jilima daa pal’ o biɛhigu shee maa.

³⁵Ka Musa daa kɔŋ Naawuni min’ o niriba laɣiŋgu suɣili maa ni kpɛbu sagbani maa ni daa sirigina ti pil’ li maa mini Yawɛ jilima ni daa pal’ o biɛhigu shee maa zuɣu.

³⁶Izraɛlnim’ chandi maa zaa puuni, sagbani maa daa yi ti vuui ka chɛ Naawuni biɛhigu shee maa, bɛ yiɣisirimi chaŋ,

³⁷amaa sagbani maa daa yi bi vuui, bɛ bi chani shɛli naɣila di yi ti vuui chana ka bɛ chana.

³⁸Dama Yawɛ sagbani maa daa kul bela o biɛhigu shee maa zuɣusaa wuntaŋ’ ni, yuŋ mi ka buɣim be sagbani maa puuni Izraɛlnim’ zaa ninni bɛ chandi maa zaa ni.