Read Dagbani Yibu 7 Bible Online

Yibu 7 - Dagbani bible

Yibu 7

¹Ka Yawɛ daa yɛli Musa, “Nyama n yɛn chɛmi ka a be kaman Naawuni la Firawuna sani, ka chɛ ka a mabia Aduna mi nyɛ a daanabi.

²A ni ti yɛli n ni zal’ a ni a yɛlim’ shɛlikam zaa, ka a mabia Aduna mi ti yɛli Firawuna ni o chɛ ka Izraɛlnim’ maa yi o tiŋgbɔŋ maa ni.

³ Amaa n ni ti chɛ ka Firawuna niŋ tipawumli n-zaɣisi yi yɛligu maa wumbu, hal n ni ti yɛn tum alahiziba shɛŋa Ijipti tiŋgbɔŋ ni maa zaa yoli.

⁴Firawuna yi ti zaɣisi ni o ku wum yi yɛligu maa, di saha ka n ni ti darigi Ijiptinim’ maa tibili, ka tum tuun’ kara pam yihi n niriba Izraɛlnim’ maa zaa Ijipti tiŋgbɔŋ maa ni gbilligbilli.

⁵N yi ti teei n nuu darigi Ijiptinim’ maa tibili ka yihi Izraɛlnim’ maa Ijipti tiŋgbɔŋ maa ni, di saha ka Ijiptinim’ ni baŋ ni mani n-nyɛ Yawɛ.”

⁶Ka Musa mini Aduna daa niŋ lala; bɛ daa niŋ Yawɛ ni zali ba ni bɛ niŋ shɛm maa.

⁷Musa yuma daa nyɛla yuun’ pihinii, ka Aduna mi yuma nyɛ yuun’ pihiniinaata saha shɛli bɛ ni daa chaŋ ti tɔɣisi Firawuna yɛtɔɣa maa.

⁸Di saha ka Yawɛ daa yɛli Musa mini Aduna,

⁹“Firawuna yi ti yɛli ya ni yi tummi alahiziba tuuni din wuhiri ni mani n-shiri tim ya na, nyin’ yɛlim’ Aduna ni o zaŋm’ o jaaŋgbee bahi tiŋa Firawuna tooni ka di leei wahu.”

¹⁰Di saha ka Musa mini Aduna daa chaŋ Firawuna sani nti niŋ kaman Yawɛ ni daa zali ba ni bɛ niŋ shɛm maa, ka Aduna daa zaŋ o jaaŋgbee maa bahi Firawuna min’ o kpamba tooni, ka di leei wahu.

¹¹Di saha ka Firawuna daa boli Ijipti baŋdiba mini bukpahinim’ bɛn nyɛ timanim’ na, ka bɛ gba daa ti tum bɛ tabibi tuma niŋ lala.

¹²Bɛ gba daa zaŋla bɛ jaaŋgbɛhi bahi tiŋa, ka di leei waɣiri. Amaa ka Aduna jaaŋgbee maa daa zaŋ bɛ jaaŋgbɛhi maa vali.

¹³Di zaa yoli ka Firawuna daa na kul niŋ tipawumli n-zaɣisi ni o ku wum bɛ yɛligu maa kaman Yawɛ ni daa yɛli shɛm la.

¹⁴Di saha ka Yawɛ daa yɛli Musa, “Firawuna suhu kpɛm’ pam; o zaɣisiya ni o ku chɛ ka niriba maa chaŋ.

¹⁵Dinzuɣu biɛɣ’ asiba, o yi sa chani mɔɣili ni, nyin’ sa zaŋm’ a jaaŋgbe’ shɛli din daa leei wahu la niŋ a nuu ni chaŋ ti zani mɔɣili maa duli gul’ o.

¹⁶Yɛlim’ o, ‘Yawɛ ŋun nyɛ Hiburunim’ Naawuni la n-tim ma a sanna ni n ti yɛl’ a ni a chɛ ka o niriba maa chaŋ tiŋgban’ nɛli ni ti jɛm o. Amaa ka a na kul bi saɣi hal ni pɔŋɔ.’

¹⁷ Dinzuɣu Yawɛ yɛliya, ‘Nyama, n yɛn zaŋla n jaaŋgbee din be n nuu ni ŋɔ fiɛbi ko’ shɛli din be Nail Mɔɣili ŋɔ ni ŋɔ ka di leei ʒim, ka a baŋ ni mani n-nyɛ Yawɛ,

¹⁸ka di puuni zahim zaa kpi n-niŋ di kom maa ni ka di nyɔni, ka Ijiptinim’ kɔŋ li nyubu.’ ”

¹⁹Ka Yawɛ daa lan yɛli Musa, “Yɛlim’ Aduna ni o zaŋm’ o jaaŋgbee maa niŋ o nuu ni n-teeg’ o nuu tiri Ijiptinim’ koma zaa bɛ kulibɔna mini bɛ kɔsoya ni biaŋ kam ni bɛ ko’ purima zaa ka di leei ʒim. Ka ʒim ni be Ijipti tiŋgbɔŋ ni zaa hal zaŋ tabili bɛ ko’ niŋdi binyara din nyɛ bɛ ni zaŋ dari mali shɛŋa mini bɛ ni zaŋ kuɣa me shɛŋa la zaa puuni.”

²⁰Di saha ka Musa mini Aduna daa niŋ kaman Yawɛ ni zali ba shɛm maa Firawuna min’ o kpamba ninni, O daa yaag’ o jaaŋgbee maa n-fiɛbi kom din daa be Nail Mɔɣili maa ni, ka di zaa daa shiri leei ʒim.

²¹Ka Nail Mɔɣili maa puuni zahim zaa daa kpi n-niŋ kom maa ni, ka di nyɔni, ka Ijiptinim’ daa kɔŋ Nail Mɔɣili maa ni kom maa nyubu; ka ʒim daa be Ijipti tiŋgbɔŋ maa ni zaa.

²²Amaa ka Ijipti timanim’ gba daa tum bɛ tabibi tuma n-gba daa niŋ lala. Ka di daa kpaŋsi Firawuna suhu, ka o daa bi wum bɛ yɛligu maa kaman Yawɛ ni daa pun yɛli shɛm la.

²³Di saha ka Firawuna daa ŋmaligi kul’ o yiŋa, ka zaŋ li niŋ o baɣaka.

²⁴Ka Ijiptinim’ zaa daa naanyi gbi la kɔbilisi gili Nail Mɔɣili maa ni bɛ nya kɔnyurim, dama bɛ daa naan ku tooi lan nyu Nail Mɔɣili kom maa yaha.

²⁵Ka daba ayopɔin daa mali ti gari, Yawɛ ni daa fiɛbi Nail Mɔɣili maa nyaaŋa.