Read Dagbani Ayuba 1 Bible Online

Ayuba 1 - Dagbani bible

Ayuba 1

¹Do’ so daa be Uzi tiŋgbɔŋ ni, ka o yuli booni Ayuba. Doo maa daa nyɛla ŋun ka galimi, ka o biɛhigu be tibi zaa, ka o nyɛ ŋun zɔri Naawuni, ka bi tumdi zaɣ’ biɛɣu.

²O daa dɔɣila bidibis’ ayopɔin mini bipuɣins’ ata.

³O daa malila biŋkɔbbaligu tusaayopɔin mini laakumnim’ tusaata ni naɣilakɔra tuhili ni bunnyama kɔbisinu, ka mali tumtumdiba pam; ka lala zuɣu daa chɛ ka o nyɛ ninvuɣ’ titali gari wulimpuhili polɔnim’ zaa.

⁴O bidibisi maa daa yi chanila tab’ yinsi ti puhiri churi sokam dabisili dali, ka daa yi timdi booni bɛ tizɔpaɣiba maa na ka bɛ mini ba ti diri ka nyura.

⁵Bɛ daa yi puhi chuɣu maa naai, Ayuba timdimi ka bɛ chaŋ ti mali ba ka bɛ niŋ kasi. O daa yi daŋdila yibu asibaasi n-chaŋ ti mali sara o bihi maa zaa yino kam zuɣu; dama Ayuba daa yɛlimi, “Di pa shɛli ka m bihi maa ti tu Naawuni bɛ suhuri ni n-tum alahichi.” Lala ka Ayuba daa kul niŋda.

⁶ Dahin shɛli ka malaikanim’ daa ti laɣimna ni bɛ ti zaŋ bɛmaŋ’ wuhi Yawɛ, ka Sintani gba daa kana ti pahi bɛ zuɣu.

⁷Ka Yawɛ daa bɔhi Sintani, “Ya polo ka a lee yina?” Ka Sintani garigi yɛli Yawɛ, “N yila dunia ni na, n chaŋmi ti gɔŋgo ka chaŋchaŋ gili di ni.”

⁸Ka Yawɛ daa lan bɔhi Sintani, “A tɛhi n dabili Ayuba yɛla? So bi ŋman’ o dunia ni. O nyɛla ŋun ka galimi ka o biɛhigu be tibi zaa, ka o nyɛ ŋun zɔri Naawuni, ka bi tumdi zaɣ’ biɛɣu.”

⁹Di saha ka Sintani daa garigi bɔhi Yawɛ, “Ayuba Naawuni zɔbo maa nyɛla yoli?

¹⁰Pa nyini n-sa gariche gili Ayuba min’ o malibu ni o ni su shɛlikam zaa luɣilikam? Nyini n-niŋ alibarika niŋ o tuma ni, ka chɛ ka o buni galisi pam tiŋgbɔŋ maa ni.

¹¹ Amaa a yi zaŋ a nuu shih’ o ni mali shɛlikam maa zaa pumpɔŋɔ, o ni tu a a ninni.”

¹²Ka Yawɛ yɛli Sintani, “Di viɛla, a mali o ni su binshɛlikam maa zaa yiko, amaa lee miri ka a zaŋ a nuu shih’ o.” Di saha ka Sintani daa yi Yawɛ sani chaŋ.

¹³Dahin shɛli ka Ayuba bidibisi maa min’ o bipuɣinsi maa daa ti be bɛ biɛlikpɛm’ yiŋa n-diri bindira ka nyuri wain;

¹⁴ka tumo daa ti kana ti yɛli Ayuba, “Ti di malila naɣilahi la kɔra, ka bunsi la ʒe m-baɣi ba ŋubiri mɔri,

¹⁵ka Sabinim’[1] kana ti lu bɛ zuɣu n-zaŋ takɔbi ku tumtumdiba maa ka taɣi ba chaŋ, n kɔŋko n-nyɛ ŋun zo n-tiligi kana ni n ti yɛl’ a.”

¹⁶O ni daa na kul yɛri maa, ka so lan kana ti yɛli, “Naawuni buɣim n-yi zuɣusaa na ti di n-ku piɛri la mini piɛguliba la zaa, n kɔŋko n-nyɛ ŋun zo n-tiligi kana ni n ti yɛl’ a.”

¹⁷O ni daa na kul yɛri maa, ka so lan paana ti yɛli, “Kalidianim’[2] laɣimla tab’ ʒiibuta zuɣu n-kana ti lu laakumnim’ la zuɣu n-zaŋ takɔbi ku bɛn guli ba maa, ka taɣi ba chaŋ, n kɔŋko n-nyɛ ŋun zo n-tiligi kana ni n ti yɛl’ a.”

¹⁸O ni daa na kul yɛri maa, ka so lan paana ti yɛli “A bidibisi la min’ a bipuɣinsi la bela bɛ biɛlikpɛm’ la yiŋ’ diri bindira, ka nyuri wain,

¹⁹ka pɔhim kpiɔŋ ti yi mɔɣu polo na yim nti ʒe n-daai yili maa zaa luhi bipola maa zuɣu, ka bɛ kpi. N kɔŋko n-nyɛ ŋun tiligi kana ni n ti yɛl’ a.”

²⁰Di saha ka Ayuba daa yiɣisi zani n-darigi cheeg’ omaŋmaŋ’ binyɛrigu, ka pini o zuɣu, ka gbani tiŋa n-jɛm Naawuni,

²¹ka yɛli, “N zaɣim ka m ma daa dɔɣi ma, n zaɣim ka n ti lan yɛn zaŋ yi dunia ni. Yawɛ n-daa ti ma, Yawɛ n-lan deei. Yawɛ yuli simdi paɣibu.”

²²Yɛla ŋɔ zaa puuni, Ayuba daa bi tum alahichi bee n-galim Naawuni ni o ni niŋ shɛm maa bi tuhi.