Read Dagbani Ayuba 10 Bible Online

Ayuba 10 - Dagbani bible

Ayuba 10

¹N nyee nyɔni m biɛhigu. N ni tɔɣisi n fabila ŋɔ yɛtɔɣa ka shɛli ku kaɣili ma. N ni tɔɣisi ni suhusaɣiŋgu.

²N ni yɛli Naawuni, ‘Di wuhi ni m mali taali. Chɛ ka m baŋ a ni tuhiri ma daliri shɛli zuɣu.

³Di tuhiya a sani ni a niŋ a ni zaŋ a nuhi tum tuun’ shɛli alaka ka lihi ʒiɛm li, ka lee yurila ninvuɣ’ biɛri ni lo shɛli?

⁴A malila ninsal’ nina? A nyarila binyɛra kaman ninsalinim’ ni nyari shɛm?

⁵A dabisa bemi kaman daadam dabisa ni be shɛm bee a yuma bemi kaman daadam yuma ni be shɛm

⁶ka a bɔri ni a nya n taali, ka vihiri ni a baŋ n daalahichi,

⁷hal a ni kul mi ni n ka taali, ka so kani ŋun ni tooi fa ma a nuu ni bahi maa zaa yoli?

⁸A nuhi ka a zaŋ me ma, ka lan ŋmaligi kuri ma pumpɔŋɔ.

⁹Teemi ni a daa me ma mi kaman yaɣiri la, ka lan yɛn chɛ ka n leei taŋkpaɣu?

¹⁰A daa bi kpaai ma mi bahi kaman bihim la, ka kahim ma kaman waagasi la?

¹¹Nyini n-daa zaŋ kɔba mini jila tuɣituɣi ma, ka zaŋ niŋgbuŋ mini gbaŋ pili ma.

¹²Nyini n-daa ti ma nyɛvili mini yurilim maŋli ka nyɛ ŋun guli n nyɛvili.

¹³Amaa ka a daa zaŋ binyɛra ŋɔ sɔɣ’ a suhu ni. M mi ni a nia ni daa nyɛ shɛm m-bala.

¹⁴N yi tum alahichi, a nyari ma mi, ka ku chɛ n-taali.

¹⁵N yi nyɛla ninvuɣ’ biɛɣu, mbusim be n zuɣu! Ka n yi nyɛla wuntizɔra, n ku tooi kpuɣi n zuɣu zuɣusaa, dama n yi lihi n wahala ŋɔ vi m-mali ma.

¹⁶A kul moola a nini lihiri bɔri n shee kaman gbuɣinli la, ka lan tumdi tuma jɛndiri ma.

¹⁷A kul malila shɛhira pala jɛndiri ma, ka a suhuyiɣisili kul pahiri zaŋ chaŋ m polo; ka a kul zaŋdi tɔbbi’ pala liriti ma.

¹⁸Bɔzuɣu ka a daa yihi ma pul’ ni na? M paɣiya ka n daa kpi ka so nini na bi nya ma,

¹⁹ka di be kaman n daa na ʒi m-be, ka bɛ daa kul dɔɣi ma n-zaŋ ma ti niŋla gballi ni.

²⁰N dabisa pala biɛla? Chɛli ma ka n suhu maai biɛla,

²¹ka n naanyi chaŋ ka ku lan labi luɣ’ shɛli din nyɛ liɣa mini zibisim titali ŋɔ ni na.

²²Luɣ’ shɛli din nyɛ liɣa ka so bi lan mi o yɛla soli, luɣ’ shɛli neesim ni bemi kaman zibisim la.’ ”