Read Dagbani Ayuba 11 Bible Online

Ayuba 11 - Dagbani bible

Ayuba 11

¹Di saha ka Zɔfar ŋun daa nyɛ Naama nir’ la daa garigi yɛli,

²“Nir’ kul ni tɔɣisiri yɛtɔɣ’ gbaliŋ ŋɔ ka so ku garig’ o? Yɛtɔɣ’ gbaliŋ ŋɔ nyɛla din ni wuhi ni a ka galimi?

³A yɛtɔɣ’ gbaliŋ ŋɔ ni tooi chɛ ka niriba fo bɛ noya? Ka a yi maani niriba ansarisi so ŋun’ di dih’ a vi?

⁴Dama a yɛliya, ‘M biɛhigu nyɛla din be kasi, ka n ka daɣiri Naawuni sani!

⁵Amaa n di yuya ni Naawuni yaag’ o noli n-tɔɣis’ a yɛtɔɣa.

⁶Ka o di yɛl’ a baŋsim ashili yɛtɔɣa! Dama baŋsim mali yaɣa pam. Baŋmi ni Naawuni ni darig’ a tibili shɛm ŋɔ bi paag’ a ni tum taali shɛm.

⁷A ni tooi baŋ Naawuni tɛha din zilim’ ŋɔ? A ni tooi baŋ Kpiɔŋlan’ Naa ŋɔ yɛm tariga?

⁸Di nyɛla din du n-gari sagbana, ka bɔ ka a lee ni tooi niŋ? Di nyɛla din zilim gari kpiimba biɛhigu shee, ka bɔ ka yɛn tooi baŋ?

⁹Di buɣisibu wɔɣilim gari dunia ŋɔ wɔɣilim. Ka di yɛliŋ gari teeku.

¹⁰O yi kana ti gbaag’ a kpɛhi duu, ka kar’ a saria, ŋuni n-leei ni tooi ŋme o naŋgbankpeeni?

¹¹Dama o mi ninvuɣ’ yoya, ka o yi nya zaɣ’ biɛɣu, o ku niŋ shɛli zaŋ chaŋ di polo?

¹²Amaa mɔɣu ni buŋ yi ni dɔɣi ninsala, jɛrigu ni niŋ yɛm.

¹³A yi chɛ ka a suhu ʒe dɛde, a ni tooi teeg’ a nuhi tir’ o.

¹⁴Zaɣ’ biɛɣu yi be a nuu ni, nyin’ yihimi li kpaŋa, ka miri ka a chɛ ka zaɣ’ biɛɣu be a yiŋa.

¹⁵Yɛlimaŋli, a ni tooi kpuɣ’ a zuɣu ka galimi kani, a ni yi barina ni, ka ku lan zɔri dabiɛm.

¹⁶A ni ti tam a nandahima ŋɔ yɛla, a ni ti teei di yɛla ka di ŋmanila ko’ shɛli din pun zo n-gari.

¹⁷A biɛhigu ni ti ne kaman wuntaŋ’ ni la, ka di zibisim ti ne kaman asiba neesim la.

¹⁸A ni ti bahi yɛmbahiga, dama tahima beni; Naawuni ni ti gul’ a, ka a vuhiri ka barina kani.

¹⁹A ni ti dɔni, ka so ku lan kpɛh’ a dabiɛm, ka niriba pam ti bɔri ni a niŋ ba nirilim.

²⁰Amaa ninvuɣ’ biɛri bɛn’ nina ti ku ne, ka bɛ ti ku mi bɛ ni yɛn doli so’ shɛŋa zo n-tiligi, ka bɛ tahima ti yɛn nyɛla bɛ vuhim ŋmaabu.”