Read Dagbani Ayuba 12 Bible Online

Ayuba 12 - Dagbani bible

Ayuba 12

¹Di saha ka Ayuba daa garigi yɛli,

²“Biɛhiŋ kani yinima n-nyɛ niriba maa, ka yi yi kpi, yɛm ni kpi.

³Amaa m mali yɛm kaman yi gba ni mali yɛm shɛm maa. M pala ŋun biɛhigu pooi yi biɛhigu; ka ŋuni n-lee bi mi dimbɔŋɔnima?

⁴N zɔnim’ larila mani ŋun suhi Naawuni ka o deei n suhigu ŋɔ, mani ŋun nyɛ ninvuɣ’ suŋ ŋun ka galimi ŋɔ, ka bɛ lari ma.

⁵Ninvuɣ’ shɛb’ bɛn nya vuhim ʒiɛmdila bɛn nya yɛl’ biɛri, amaa ka di lee mali shili gu bɛn naba bi ʒe viɛnyɛliŋga.

⁶Suhudoo be ŋmɛnditoya yinsi, ka ninvuɣ’ shɛb’ bɛn zaŋ bɛ wuna niŋ bɛmaŋmaŋ’ nuu ni, ka nyɛ bɛn chɛ ka Naawuni suhu yiɣisiri ŋɔ lee nyɛ bɛn yiri barina ni.

⁷Amaa bɔhimi biŋkɔbiri ka bɛ wuh’ a; ka bɔhi noonsi ka bɛ yɛl’ a;

⁸bɔhim’ dunia ni tihi ka di wuh’ a; ka teeku ni zahim ni yɛl’ a.

⁹Bɛ ni ŋuni n-lee bi mi ni Naawuni nuu n-tum tuuni ŋɔ?

¹⁰O nuu ni ka binnɛɔŋ kam nyɛvili mini ninsal’ kam vuhim be.

¹¹Tibili bi wumdila yɛtɔɣa ka zahindi li kaman zilinli ni lamdi bindirigu shɛm la?

¹²Yɛm bi bela ninkura sani, ka baŋsim mi bi bela nir’ yuusim ni?

¹³Yɛm mini kpiɔŋ zaa bela Naawuni sani, ŋuna m-mali ninkurilim mini baŋsim yɛtɔɣa.

¹⁴Ka o yi wurim binshɛli, so ku tooi lan me li zali. O yi kpɛhi so duu, so ku tooi yooi dilan’ bahi.

¹⁵O yi taɣi saa zali, binshɛɣukam kuurimi; o yi bahi saa, kom din’ puhigi tiŋgban’ ni zaa.

¹⁶Kpiɔŋ mini yɛm zaa bela o sani, ŋuna n-su ŋun yɔhindi niriba min’ o ni yɔhindi shɛb’ zaa.

¹⁷Ŋuna n-fari ninkura yɛm ka mali ba chana; ka chɛ ka sariakaritiba leeri jɛra.

¹⁸Ŋuna n-yeeri nanim’ kpariti, ka sooni ba piɛtɔnima.

¹⁹Ŋuna n-fuɣiri maligumaaniba situra ka mali ba chana, ka luhiri wɔɣira.

²⁰Ŋuna n-chɛ ka niriba ni niŋ shɛb’ naani leeri biriti, ka mɔŋdi kpamba baŋsim.

²¹Ŋuna n-dihiri nabihi vi, ka lɔrigiri bɛn mali kpiɔŋ shɛlɔriti.

²²Ŋuna n-yihiri teeku bulli puuni zibisim, ka chɛ ka neesim neeri zibisim titali ni.

²³Ŋuna n-chɛ ka zuliya niŋdi yaa, di nyaaŋa ka o bahi ba yoli. Ŋuna n-chɛ ka zuliya yɛligira, di nyaaŋa ka o zaŋ ba bahi.

²⁴Ŋuna n-deeri dunia ŋɔ zuɣulaannim’ yɛm ka chɛ ka bɛ dari gindi mɔɣu.

²⁵Bɛ bɔbindimi gindi liɣa, ka ka firila, ka o chɛ ka bɛ ʒiɛhiri gindi kaman nir’ ni nyu dam kul’ la.