Read Dagbani Ayuba 14 Bible Online

Ayuba 14 - Dagbani bible

Ayuba 14

¹Daadam ŋun nyɛ paɣ’ ni dɔɣi so ŋɔ dabisa bi yaɣi lala, ka wahala n-kul pali di ni.

²O yirimina kaman tipum la, ka lan kpi, o vuurila yomyom kaman shilinshia la, o bi yuura.

³A zaŋla a nini kpa lala nira? A zaŋ ma mi na ni a ti kari ma saria?

⁴Ŋuni n-lee ni tooi yihi binshɛli din ka daɣiri binshɛli din mali daɣiri ni na? So ku tooi.

⁵Ninsalinim’ dabisa pun buɣisimi zali, ka a mi bɛ chira kalinli ni nyɛ shɛm. Nyini n-zali bɛ tariga ni nyɛ luɣ’ shɛli ka bɛ ku tooi yaɣi di zuɣu.

⁶Zaŋm’ a nini lab’ kpaŋa ka chɛ ba, ka bɛ di bɛ dabisa nyaɣisim kaman tumtumdiba la.

⁷Dama tia mali tahima, bɛ yi ŋmaai li luhi, di ni lan kpiri, ka ku chɛ zoobu.

⁸Hal di nyaɣa yi kul kurigi tiŋgban’ ni, ka di mundili kuui do tiŋa,

⁹di yi ti wum kom ʒiɛɣu, di ni puhi n-niŋ wula kaman ti’ polli la.

¹⁰Amaa daadamnim’ bɛn’ yi kpi, bɛ lan ka yaa. Daadamnim’ yi bahi, ya ka bɛ lee lan be?

¹¹Kaman kom ni nyuui biaŋ ni, ka kulibɔŋ kom nyuui ka di kuui shɛm la,

¹²lala ka daadamnim’ doya ka ku lan yiɣisi yaha, hal ka sagbana ti lan kani, bɛ ku lan yiɣisi, bee n-neei bɛ gom maa ni.

¹³N di yuya ni a zaŋ ma sɔɣi kpiimba biɛhigu shee, ka a zaŋ ma sɔɣi nimaani hal ka a suhu ti maai, ka a di zali ma saha shɛli a ni yɛn teei n yɛla.

¹⁴Daadam yi kpi o ni lan tooi be? Amaa n kul ni guhi n ni tumdi tuma dabisi’ shɛŋa ŋɔ ni zaa hal ti nya faako.

¹⁵A ni ti boli ma, ka n saɣi. A kɔre ni ti be a nuhi tuma ni.

¹⁶Dama di saha a ti ku lan kaani n napɔna yaabu, a ti ku lan yuuni n daalahichi.

¹⁷A ni ti zaŋ n taali niŋ kpalaŋ’ ni lo li, ka a ti zaŋ bini limsi n tuumbiɛri.

¹⁸Amaa zoli nyɛla din luri wurinda, ka tampiŋ vuɣiri di dooshee.

¹⁹Kaman kom ni yi zo n-liilii kuɣa, ka kopaliga ʒi tiŋgbani taŋkpaɣu chaŋ shɛm, lala ka a saɣindi daadam tahima.

²⁰Nyini n-nyandi ba sahakam, ka bɛ kpira, ka a taɣi bɛ ninni biɛhigu ka kari ba bahi.

²¹Bɛ bihi yi nya jilima, bɛ bi mi; ka bɛ yi nya filiŋ, so baɣa ka di ni.

²²Bɛ maŋmaŋ’ niŋgbuna biɛrim kɔŋko n-naɣi mali ba, ka bɛ kuhiri bɛmaŋmaŋ’ kɔŋko zuɣu.”