Read Dagbani Ayuba 16 Bible Online

Ayuba 16 - Dagbani bible

Ayuba 16

¹Di saha ka Ayuba daa garigi yɛli,

²“N pun wum dimbɔŋɔnim’ pam; yi zaa bɛn di yɛn maai n suhu ŋɔ nyɛla bɛn lan saɣindi n suhu pam.

³Yɛtɔɣ’ shɛŋa din ka buchi ka naabu? Bee bɔ n-lee muɣisi ya ka yi na kul tɔɣisiri yɛtɔɣa?

⁴Yi yi di be n ni be shɛm ŋɔ, n gba naan tooi yɛli kaman yi ni yɛri shɛm ŋɔ. N naan tooi yɛli ya yɛtɔɣa pam, ka vili n zuɣu niŋ ya.

⁵N naan tooi zaŋ n nol’ ni yɛtɔɣa kpaŋsi yi suhuri, ka n suhumaabo yɛtɔɣa naan ku yi biɛrim maa.

⁶N yi tɔɣisiri yɛtɔɣa, di bi maari biɛrim n niŋgbuŋ ni, ka n yi fo, di sɔŋsim lee nyɛ ma dini?

⁷Yɛlimaŋli, pumpɔŋɔ Naawuni naai ma zaa, o ku m mini bɛn be zaa.

⁸O gurim ma ʒili, ka di leei shɛhira jɛndi ma; ka n kɔɣisibu nyɛ din di shɛhira jɛndi ma.

⁹O suhu daa yiɣisiya, ka o lan je ma, ka dari tɔhi ma. O daa dim o nyina ni niŋ ma. O mirig’ o nina niŋ ma kaman o dima n-nyɛ ma la.

¹⁰Niriba yɛla bɛ noya gu ma, bɛ lab’ ma tapaɣisi din ku dɔni, ka laɣim tab’ liri ma.

¹¹Naawuni zaŋ ma tila ninvuɣ’ biɛri, ka zaŋ ma niŋ putɔɣunim’ nuu ni.

¹²N daa malila suhudoo, ka o pirigi ma buyi, o daa gbaala n nyiŋgol’ ni n-zaŋ ma ŋme n-chɛrisichɛrisi, ka kul liriti ma.

¹³O peentɔriba tari gili ma, ka o bɔɣibɔɣi n yaannina, ka bi zo ma nambɔɣu. O puhigi m binsom bahi tiŋa.

¹⁴O kul tiri ma la dansi, o karitimi doli ma kaman tɔbbia la.

¹⁵N shɛla buɣu m-pɔbi mmaŋa, ka zaŋ n yaa sɔŋ taŋkpaɣu ni.

¹⁶N kuhimi ka n nina mɔhi, ka zibisim titali limsi n niŋkari,

¹⁷hal n ni bi tum taali, ka kul suhiri Naawuni viɛnyɛliŋga maa zaa yoli.

¹⁸Yaa tiŋgbani, miri ka a pi n ʒim; di chɛ ka n kuhigu zani soli.

¹⁹ Hal pumpɔŋɔ n shɛhiralana bela alizanda ni, ka ŋun ʒe n nyaaŋa nyɛla ŋun be zuɣusaa.

²⁰N zɔnim’ maani ma la ansarisi, ka n kuhi ni nintam niŋ Naawuni,

²¹ni o chɛ ka binshɛɣukam mali zani dɛde daadam mini Naawuni sani kaman nir’ min’ o ʒiʒiinikpee la.

²²Dama di yi niŋ daba ayi n ni doli soli chaŋ ka ku lan labina.