Read Dagbani Ayuba 2 Bible Online

Ayuba 2 - Dagbani bible

Ayuba 2

¹Dahin shɛli ka malaikanim’ daa ti lan kana ni bɛ ti zaŋ bɛmaŋ’ wuhi Yawɛ, ka Sintani gba daa kana ti pahi bɛ zuɣu.

²Ka Yawɛ daa bɔhi Sintani, “Ya polo ka a lee yina?” Ka Sintani garigi yɛli Yawɛ, “N yila dunia ni na, n chaŋmi ti gɔŋgo di ni ka chaŋchaŋ gili di ni.”

³Ka Yawɛ bɔhi Sintani, “A tɛhi n dabili Ayuba yɛla? So bi ŋman’ o dunia ni. O nyɛla ŋun ka galimi, ka o biɛhigu be tibi zaa, ka o nyɛ ŋun zɔri Naawuni, ka bi tumdi zaɣ’ biɛɣu. Hal a ni kul zaŋ m min’ o zuɣuri tuɣili tab’ ni a bah’ o yoli, ka di ka daliri maa zaa yoli, o na kul gbibila o galimi kalinsi maa kirikiri.”

⁴Ka Sintani garigi yɛli Yawɛ, “Nyɛvili bi ʒir’ ka dimsira! Ninsal’ ni zaŋ o ni mali binshɛɣukam zaa taɣi o nyɛvili.

⁵Amaa a yi zaŋ a nuu shihi o kɔbili min’ o niŋgbuŋ pumpɔŋɔ, o ni tu a a ninni.”

⁶Ka Yawɛ daa yɛli Sintani, “Di viɛla, a mal’ o yiko, amaa leei di ku o.”

⁷Di saha ka Sintani daa yiɣisi Yawɛ sani n-chaŋ ti chɛ ka yumaha gbaai Ayuba, o zuɣutaliga ni zaŋ hal ni o naba puuni.

⁸Ka Ayuba daa bo salichee kɔriti omaŋa. O daa ʒila tampiligim ni.

⁹Di saha ka o paɣ’ daa bɔh’ o, “A na kul gbibila a galimi kalinsi maa kirikiri? Tum’ Naawuni ka kpi.”

¹⁰Amaa ka Ayuba garigi yɛl’ o, “A yɛtɔɣa maa ŋmanila paɣ’ shɛb’ bɛn nyɛ jɛra la yɛtɔɣa. Ti deemi din viɛli Naawuni nuu ni, ka ku deei din bie dina?” Yɛla ŋɔ zaa ni, Ayuba daa bi tum alahichi o noli yɛtɔɣa puuni.

¹¹Ayuba zɔnim’ ata ni daa wum zaɣ’ biɛ’ shɛli din paag’ o maa, ka bɛ zaa daa yi bɛ tinsi ni kana. O zɔnim’ maa n-daa nyɛ Ɛlifaz ŋun daa nyɛ Tɛman nir’ la mini Bilidad ŋun daa nyɛ Shua nir’ la ni Zɔfar ŋun daa nyɛ Naama nir’ la. Bɛ daa zalila tab’ saha shɛli bɛ ni yɛn chaŋ ti wuhi bɛ suhusaɣiŋgu ni nyɛ shɛm, ka maag’ o suhu.

¹²Bɛ ni daa nya o katiŋa, bɛ daa bi baŋ o, ka bɛ daa duhi bɛ yee n-kum pam; ka dari chahi bɛ binyɛra, ka kɔriti taŋkpaɣu chɛri zuɣusaa ka di puɣiri bɛ zuɣuri.

¹³Ka bɛ daa ʒini tiŋa o sani wuntaŋ’ ni mini yuŋ hal ni daba ayopɔin, ka bɛ ni so daa bi yɛl’ o shɛli, dama bɛ daa nyaya ka o be biɛrim pam ni.