Read Dagbani Ayuba 21 Bible Online

Ayuba 21 - Dagbani bible

Ayuba 21

¹Di saha ka Ayuba daa garigi yɛli,

²“Gbilisimiya tibili viɛnyɛliŋga n-wum n yɛtɔɣa ŋɔ, ka chɛ ka dimbɔŋɔ n-nyɛ yi ni yɛn zaŋ shɛli maai n suhu.

³Timiya ma soli ka n tɔɣisi yɛtɔɣa, ka n yi tɔɣisi yɛtɔɣa maa naai, di nyaaŋa, yin’ malimiya ma ansarisi.

⁴Pa ninsal’ ka n fabindi niŋdi maa, ka bɔzuɣu ka n yɛn niŋ suɣilo?

⁵Lihimiya ma ka chɛ ka di gari ya, ka yi zaŋ yi nuhi pɔb’ yi noya.

⁶N yi tɛhi di yɛla, di gariti ma mi, ka dabiɛm mali ma, ka n ni’ sɔhira.

⁷Bɔzuɣu ka ninvuɣ’ biɛri beni hal ti kurigi ka kul mali yiko pam?

⁸Bɛ bihi ʒiɛla bɛ tooni, ka bɛ nina nya bɛ yaansi.

⁹Dabiɛm ka bɛ yinsi puuni, ka Naawuni bi darigiri bɛ tibili.

¹⁰Bɛ naɣilahi kul durila viɛnyɛliŋga, ka bɛ naɣinyama kul dɔɣira, ka na ʒi n-zaŋ bahi.

¹¹Bɛ mali bɛ bihi yiri chani kaman biŋkɔbbaligu la, ka bɛ bihi maa yiɣiri jamda.

¹²Bɛ yiinila yila saɣisiri guŋgombihi mini mɔɣilo, ka kalambua kumsi niŋdi ba nyaɣisim.

¹³Bɛ zaŋ bɛ dahima zaa niŋla buni nyaɣisim dibu ni, bɛ ni ti chaŋ kpiimba biɛhigu shee ni suhudoo.

¹⁴Bɛ yɛrila Naawuni, ‘Zom ka chɛ ti! Ti bi bɔri ni ti baŋ a soli.’

¹⁵Bɛ yɛra, ‘Kpiɔŋlan’ Naa mi lee nyɛ bɔ ka ti jɛmd’ o? Ka ti yi suhir’ o, nyo’ bɔ ka ti lee yɛn nya?’

¹⁶Nyama, pa bɛ buni ka bɛ gbibi bɛ nuhi ni maa? Man’ kul ku deei ninvuɣ’ biɛri yɛtɔɣa.

¹⁷Ninvuɣ’ biɛri firila na mi n-kpi? Bɛ na mi n-nya ashaara? Ka Naawuni suhu na mi n-yiɣisi ka o chɛ ka biɛrim paai ba?

¹⁸Bɛ na mi m-be kaman pɔhim ni ʒiɛri mɔ’ shɛŋa ka be kaman wurigu ka pɔhim ʒe n-chaŋ la?

¹⁹Yi yɛliya, ‘Naawuni zaŋla bɛ zaɣ’ biɛɣu maa sɔŋ gu bɛ bihi; chɛ ka o zaŋ li labisi yo ba ka bɛ baŋ li.’

²⁰Chɛ ka bɛmaŋmaŋ’ nini nya bɛ bahigu, ka chɛ ka bɛ nyu Kpiɔŋlan’ Naa suhuyiɣisili.

²¹Dama bɛ chira tariga yi ti paai, bɛ baɣa bɔ n-lee lan be bɛ malibu ni, bɛ kalinsi nyaaŋa?

²²So ni tooi wuhi Naawuni ŋun kariti wɔɣira saria ŋɔ yɛm?

²³So mi n-nyɛ bundana, ka mali suhudoo ka binshɛli yɛla bi muɣis’ o, ka o ti kpi.

²⁴O kum maa saha, o kul yɛn ŋmɛlimmi, ka o kɔba ni kpam kul maha.

²⁵Ka so mi beni, o ka suhupiɛlli, ka ti kpi ni suhugarigu.

²⁶Bɛ zaa mi yɛn dɔnila taŋkpaɣu ni, ka zunzuya di ba.

²⁷M mi yi tɛha mini yi ni lo nia shɛli na ni yi ti birigi ma.

²⁸Dama yi bɔhira, ‘Nabia maa yil’ la be ya? Ninvuɣ’ biɛɣu maa ni daa be yili shɛl’ ni la lee be ya?’

²⁹Yi na bi bɔhi ninvuɣ’ shɛb’ bɛn nyɛ sochandiba? Yi bi saɣi bɛ ni yɛli shɛm

³⁰ni ashaara dali ninvuɣ’ biɛri bɛn’ tiligirimi, ka nyari faako suhuyiɣisili dali?

³¹Ŋuni n-lee ni wuhiri ba bɛ galimi ni nyɛ shɛm bɛ ninni? Ka ŋuni n-lee yɔri ba bɛ tuma samli?

³²Ka bɛ yi ti zaŋ ba sɔɣi gballi ni, bɛ gulila bɛ gballi maa.

³³Vinvamli ni taŋkpaɣu niŋdi ba la nyaɣisim, ka sokam ni doli bɛ nyaaŋa. Ka ninvuɣ’ shɛb’ bɛn pun daŋ tooni ka kalinli.

³⁴Ka wula ka yi ni tooi zaŋ binshɛŋa din ka buchi ŋɔ maai n suhu? Yi lan ka yi ni yɛn garigi ma shɛm naɣila ʒiri kɔŋko.”