Read Dagbani Ayuba 23 Bible Online

Ayuba 23 - Dagbani bible

Ayuba 23

¹Di saha ka Ayuba daa garigi yɛli,

²“Zuŋɔ gba n fabila maa lan kɔŋla tim. Di mini n ŋuhibu ŋɔ zaa yoli, Naawuni na kul pahiri ma la biɛrim.

³N di bi zaɣisi ka m mi n ni yɛn nya o luɣ’ shɛli polo, ka n di chaŋ hal ni o biɛhigu shee.

⁴N naan zaŋ n yɛtɔɣa maa sɔŋ o tooni ka ti tɔɣisi di yɛla.

⁵N naan wum o ni yɛn garigi ma shɛm, ka baŋ o ni yɛn yɛli ma shɛm.

⁶O naan zaŋ o yiko din galisi ŋɔ zab’ ma? Aai, amaa o naan gbilisi tibili wum n yɛligu.

⁷Nimaani ka ŋun gbibi yɛlimaŋli ŋɔ min’ o naan tɔɣisi yɛtɔɣa, ka n sariakarita maa naan bahi ma zaa.

⁸N yi chaŋ tooni ha, o ka nimaani bee n yi labi nyaaŋa, n ku tooi nya o.

⁹Ka m bo o nuzaa polo, ka o sɔɣi, ka n ku tooi nya o, ka n ŋmaligi nudirigu polo, amaa ka bi tooi nya o.

¹⁰Amaa ŋun’ mi n ni doli so’ shɛli, o yi vihi ma o ni nya ka n viɛlimi kaman salima la.

¹¹N kul dolila o ni wuhi ma shɛm; n kul dolila o soli ka na ʒi m-birigi.

¹²N na bi birigi zaligu shɛli din daa yi o noli ni na, n zaŋ o noli ni yɛligu niŋ n suhu ni.

¹³Amaa o bela o kɔŋko, ka ŋuni n-lee ni tooi taɣ’ o? O ni bɔri shɛli, dina ka o niŋda.

¹⁴Dama o ni lo ni o niŋ ma shɛli maa, o ni niŋ li naai; ka lala binyara pam kul be o suhu ni.

¹⁵Dinzuɣu n yi be o tooni, dabiɛm m-mali ma, ka n yi tɛhi o yɛla, dabiɛm m-mali ma.

¹⁶Naawuni n-chɛ ka n suhu ŋooi; Kpiɔŋlan’ Naa n-chɛ ka dabiɛm gbaai ma.

¹⁷M bi zaɣisi ka n lili kpe zibisim ni, ka zibisim titali limsi n ninni.