Read Dagbani Ayuba 24 Bible Online

Ayuba 24 - Dagbani bible

Ayuba 24

¹Bɔzuɣu ka Kpiɔŋlan’ Naa bi zali saria karibu saha? Ka bɔzuɣu ka bɛn mi o na ʒi n-nya o ni zali saha dabisa shɛŋa ni?

²Ninvuɣ’ biɛri nahiri tintarisi vulɔnima, ka fari biŋkɔbbaligu n-zaŋdi ba chani ka bɛ ti ŋubiri mɔri bɛmaŋmaŋ’ biŋkɔbiri mɔri ŋubbu shee.

³Bɛ taɣi kpibiga buŋ’ chaŋ, ka deei pakoli nahu talima.

⁴Bɛ daai nandaamba baɣili palli kpaŋa, ka nandaamba zaa zo n-sɔɣi.

⁵Bɛ yirimi chani bɛ tuma ni kaman mɔɣu ni bunsi m-be tiŋgban’ nɛli ni la m-bɔri bindirigu tiŋgban’ shɛli din chaɣisi puuni ni bɛ ti ti bɛ bihi.

⁶Bɛ gahindila bindira pu’ shɛŋa din pa bɛ dina ni, ka yihiri wain tiwal’ yiha ninvuɣ’ biɛɣu wain tihi puu ni.

⁷Bɛ doonila bɛ zaɣim yuŋ kam, ka ka situra. Bɛ ka binshɛli din ni pili wari saha.

⁸Ka zoya ni saa buri ba, ka bɛ ka bɛ ni yɛn kpe shɛli yi saa bubu ni, ka baɣila tampima.

⁹Bɛna n-nyɛ bɛn darigiri gbabigiri kpibisi bɛ manim’ biha ni, ka deeri nandaamba biliɛri talima.

¹⁰Bɛ chanila bɛ zaɣim, ka ka situra, ka ʒiri kabɔba, ka kum mali ba.

¹¹Bɛ bela bɛ olivi tihi folinsi ni n-kahindi kpam, ka kahindi wain, amaa ka kɔnyuri kuri ba.

¹²Ninvuɣ’ shɛb’ bɛn yɛn kpi bela fɔŋ ni ŋuhira, ka bɛn mali dansi kuhiri bɔri sɔŋsim, amaa ka Naawuni baɣa ka bɛ suhigu ni.

¹³Bɛna n-nyɛ ninvuɣ’ shɛb’ bɛn zaɣisiri neesim la, bɛna n-nyɛ bɛn bi mili di soya ka bi ʒe di soya zuɣu la.

¹⁴Ŋun kur’ niriba yiɣisirila zaawuni n-chana ni o ku nandaamba mini faranima. Yuŋ yi paai, o ŋmanila tayiɣa.

¹⁵Zinaniŋda gba kul guhirila wuntaŋ’ lubu ka yɛra, ‘N je ni so nya ma.’ Ka zaŋ bini pili limsi o ninni.

¹⁶Yuŋ yi paai, bɛ chani kabirila yiya kpɛra, ka biɛɣu neei, ka bɛ kpari bɛmaŋ’ niŋ duri; bɛ bi mi neesim.

¹⁷Bumbɔni nyɛla asiba bɛ zaa sani, dama bɛ nyɛla bumbɔni mini dabiɛm zɔnima.

¹⁸‘Kopaliga zaŋ ba guui yomyom, ka noli di bɛ ni su tiŋgban’ shɛli, ka so napɔŋ bi lan no bɛ wain tihi puri ni yaha.’

¹⁹Sanzali mini biisim ni chɛ ka maligim kuuri shɛm, lala ka kpiimba biɛhigu shee gba darigiri deeri alahichinima.

²⁰Bidɔɣirisurigu tam bɛ yɛla, ka zunzuya di ba ka bɛ nyaɣisa; ka so bi lan teeri bɛ yɛla; dinzuɣu ninvuɣ’ biɛtali lurimi kaman tia la.

²¹Bɛ nahindila paɣ’ so ŋun bi dɔɣi bihi, ka bi niŋdi pakoli zaɣi viɛlli.

²²Amaa Naawuni yiko puuni o kuri wɔɣira. O yi tum o tuma, ninvuɣ’ biɛri kpirimi.

²³Ŋuna n-chɛ ka bɛ be ni alaafee, amaa ka o lee pa nina lihiri bɛ tuma.

²⁴Bɛ nyarila tibiginsim saha biɛla, di nyaaŋa ka bɛ chaŋ. Bɛ ni suui lu n-kuui kaman vari la; ka bɛ ŋmahi bɛ zuɣuri kaman ka’ zuɣuri la.

²⁵Di yi pa lala ŋuni n-lee ni wuhi ni n nyɛla ʒirilana, ka wuhi ni n ni yɛli shɛm maa kani?”