Read Dagbani Ayuba 26 Bible Online

Ayuba 26 - Dagbani bible

Ayuba 26

¹Di saha ka Ayuba daa garigi yɛli,

²“Yi sɔŋ ninvuɣ’ so ŋun ka yiko pam; yi tiligi bɔɣu din ka yaa ŋɔ.

³Yi zaŋ kpamli yɛtɔɣa tɔɣisi ninvuɣ’ so ŋun ka yɛm, ka tɔɣisi yɛm yɛtɔɣa pam.

⁴Ŋuni n-lee sɔŋ ya ka yi tɔɣisi yɛtɔɣa ŋɔ? Ka ŋuni shia n-lee yi yi sanna maa?”

⁵“Kpiimba shihi sɔhirimi, ka bɛn be kpiimba biɛhigu shee sɔhira.

⁶Kpiimba biɛhigu shee dola palo ni Naawuni tooni, ka bahiyoli ka binshɛli din ni pili.

⁷Ŋuna n-daa yɛrigi nuzaa polo sagbana limsi vau, ka daa bi zaŋ dunia ŋɔ yili binshɛli.

⁸Ŋuna n-daa zaŋ kom niŋ o sagban’ tibisa ni, ka sagbana maa bi cheei.

⁹Ŋuna n-zaŋ bini pɔbi goli muni ninni, ka yɛrig’ o sagbani pa di zuɣu.

¹⁰Ŋuna m-booi booli pa teeku kom zuɣu luɣ’ shɛli neesim mini zibisim ni chirigi taba.

¹¹Zuɣusaa daantalisi sɔhigimi, ka di gari ba o ni kpahi bɛ zuɣu ni maa zuɣu.

¹²O yiko ni ka o chɛ ka teeku fo n-dɔni baalim. O yɛm ka o daa zaŋ ku Reehab.

¹³O vuhim pɔhim daa ʒe n-neei zuɣusaa, ka o daa zaŋ o nuu kuhi wahu ŋun zɔri ni o tiligi.

¹⁴Dimbɔŋɔnim’ shiri nyɛla o yiko yaɣ’ shɛli polo, ka ti ni wumd’ o yɛla shɛm pɔra pam. Amaa o yiko din galisi ŋɔ, ŋuni n-lee ni tooi baŋ li?”