Read Dagbani Ayuba 27 Bible Online

Ayuba 27 - Dagbani bible

Ayuba 27

¹Ka Ayuba daa lan gbaag’ o yɛtɔɣa yɛli,

²“Naawuni Kpiɔŋlan’ Naa ŋun be ka nyɛ ŋun mɔŋ ma yɛlimaŋli ka chɛ ka m biɛhigu niŋ tom ŋɔ,

³saha shɛli zaa n ni na kul vuhira, ka Naawuni shia be n nyɛvoya ni ŋɔ,

⁴n naŋgbampiba ku ŋma ʒiri, ka n zilinli mi ku tɔɣisi yɔhiŋ yɛtɔɣa.

⁵Din’ kariya, ka n yɛli ni yi mali yɛlimaŋli. Ka pa ni n kpimi, n kul ku bahi n nimmaŋtali maa.

⁶N gbibila n wuntitali kirikiri ka ku wɔɣisi li; n suhu bi wuhi ni m mali galimi m biɛhigu ni dahin’ shɛli.

⁷Chɛ ka n dimnim’ be kaman ninvuɣ’ biɛri la, ka chɛ ka bɛn je ma be kaman bɛn pa wuntizɔriba la.

⁸Dama ninvuɣ’ shɛb’ bɛn baɣa ka Naawuni ni, bɛ tahima lee nyɛ dini saha shɛli Naawuni yi ti chɛ ba bahi, saha shɛli Naawuni yi ti deei bɛ nyɛviya?

⁹Muɣisigu yi ti paai ba ka bɛ kuhira, Naawuni ni sɔŋ ba?

¹⁰Bɛ suhuri ni piɛli Kpiɔŋlan’ Naa zuɣu? Bɛ ni suhiri Naawuni sahakam?

¹¹N ni wuhi ya Naawuni yiko ni nyɛ shɛm; n ku sɔɣi ya din be Kpiɔŋlan’ Naa sani.

¹²Yi zaa nya li yimaŋmaŋa, ka wula ka yi zaa leei bɛn ka buchi?”

¹³“Ninvuɣ’ biɛri tarili ni nyɛ shɛli Naawuni sani m-bɔŋɔ, ninvuɣ’ shɛb’ bɛn niŋdi bɛ taba alaka ni deeri pin’ shɛli Kpiɔŋlan’ Naa sani m-bɔŋɔ:

¹⁴Bɛ yi dɔɣi bihi pam takɔbi n-yɛn ku bɛ zaa, ka bɛ bihi ka bindirigu din ni di n-tiɣi.

¹⁵Ka bɛ shɛb’ bɛn kpalim, alɔbo ni di ba, ka bɛ pakoya ku kum bɛ kuya.

¹⁶Hal bɛ ni kul zaŋ anzinfa duhi kaman taŋkpaɣu la, ka zaŋ situra duhi kaman yaɣiri maa zaa yoli,

¹⁷bɛ ni tooi zaŋ li duhi, amaa ninvuɣ’ suma n-ni ye li, ka bɛn ka taali mi ti pirigi anzinfa maa ti taba.

¹⁸Bɛ ni mɛri yiya shɛŋa maa ŋmanila tɛri, ka ŋmani puguliba suɣa.

¹⁹Bɛ nyɛla bundaannima bɛ gom saha, amaa bɛ yi ti neei, bɛ ku lan mali shɛli.

²⁰Dabiɛm ni kpe ba kaman kokpɛɣu la, ka pɔhimʒiɛpiliŋga ti ʒe ba chaŋ yuŋ.

²¹Ka wulimpuhili polo pɔhim kpuɣi ba zuɣusaa bɛ yinsi n-ʒe ba chaŋ.

²²Ka pɔhim maa ʒiɛri ba, ka bi chɛra, ka bɛ zo yomyom ni bɛ yi pɔhim kpiɔŋ maa ni.

²³Ka pɔhim maa ni ti mali ba ansarisi, ka sabisi ba bɛ ni be luɣ’ shɛlikam.