Read Dagbani Ayuba 30 Bible Online

Ayuba 30 - Dagbani bible

Ayuba 30

¹Amaa pumpɔŋɔ n ni kpɛm ninvuɣ’ shɛba m-maani ma ansarisi la; n ni daa yuli ʒiɛm shɛb’ banima, ka ku saɣi zaŋ ba pahi m bahi zuɣu ka bɛ doli m piɛri la.

²Nyo’ bɔ ka n daa naan tooi nya bɛ nuhi tuma ni? Bɛ yaa zaa daa naaya.

³Bɛ ni daa nyɛ faranima ka ka bindirigu diri zuɣu, bɛ daa nyirila taŋkpa’ kuma tiŋgbani nɛli ni.

⁴Bɛ daa wɔbirila giŋgaɣiri mini tuturi vari ni sɔɣu jila ŋ-ŋubira.

⁵Bɛ kari ba niriba ni bahi; niriba yɔhiri ba mi kaman tayiɣ’ la.

⁶Kulibɔn shɛŋa din kom nyuui mini tiŋgbani voya ni ni tampima voya ni n-nyɛ bɛ biɛhigu shee.

⁷Bɛ daa bela mɔɣu ni kuhiri kaman bunsi la, ka laɣim do gɔhi tihi gbinni.

⁸Ninvuɣ’ shɛb’ bɛn ka buchi, ka so bi mi bɛ yɛla, ka bɛ nyɛ bɛ ni daa fiɛbi ninvuɣ’ shɛb’ yihi tiŋgbɔŋ maa ni.

⁹Ka pumpɔŋɔ bɛ yiinila yila maani ma ansarisi, ka n leei bɛ ni maani so ansarisi.

¹⁰Bɛ zaɣisi ma, ka kaɣi ʒe kpaŋa ka chɛ ma. Bɛ bi zɔri dabiɛm ni bɛ tuhi nintɔri n tooni.

¹¹Naawuni gbaɣisi n tɔbu ka filim ma, lala zuɣu ka bɛ liri ma ka binshɛli bi gu ba soli.

¹²Salo daa yiɣisi zani n nudirigu polo, bɛ daa kari ma bahi, ka ŋma n kubu pala sɔŋ.

¹³Bɛ ŋari n soli, ka luhi ma, ka bi bɔri so sɔŋsim.

¹⁴Bɛ kabi kana kaman tɔbbihi n-doli gooni voli ni kpɛna la; binshɛɣukam ni daa luri saha shɛl’ la, ka bɛ daa kul kabirina.

¹⁵Dabiɛm gbaai ma, n jilima zoya kaman pɔhim n-ʒe li chaŋ la, ka n tɔŋsim zo kaman sagbani n-fuɣi gari la.

¹⁶Ka pumpɔŋɔ n shia yɛn siɣi; ka wahala dabisa gbaai ma gbibi.

¹⁷Yuŋ nyoorila n kɔb’ tuɣa ni; ka biɛrim shɛli din dimdi ma bi naara.

¹⁸O darigi deei m binyɛrigu, o ʒe n-dila m binyɛrigu nyiŋgoli mali.

¹⁹O zaŋ ma luhi baɣiri ni, ka m be kaman taŋkpaɣu mini tampiligim la.

²⁰N kuhi niŋ a m-bɔri sɔŋsim ka a bi garigi ma, ka n ʒiɛya ka a baɣa ka n ni.

²¹A leela ninkuunsilana zaŋ chaŋ n sani, ka niŋ ma alaka ni a yaa zaa.

²²A chɛ ka pɔhim kpuɣi ma, ka chɛ ka m ba pɔhim maa, ka a tɔri ma gindi sanʒiɛɣu ni.

²³M mi ni a ni chɛ ka n kpi n-kuli yili shɛli a ni zaŋ zali nyɛvililan’ kam la ni.

²⁴Biɛhiŋ kani, n na ʒi n-zaɣisi nandaamba sɔŋbu, bɛ yi ti be muɣisigu ni n-kuhiri bɔri sɔŋsim.

²⁵N daa fabindi ninvuɣ’ shɛb’ bɛn be muɣisigu ni zuɣu, ka m puu biɛri nandaamba zuɣu.

²⁶Amaa n ni daa yuuni bɔri zaɣ’ viɛlli saha shɛli, zaɣ’ biɛɣu n-daa paai ma; ka n ni daa guhiri neesim saha shɛli, zibisim n-daa ti kana.

²⁷N suhu dammi, ka bi lan doya; ka wahala dabisa kul paari ma.

²⁸N kul bela zibisim ni chana ka wuntaŋ’ kani; ka n ʒe kpamba laɣiŋgu ni n-kuhiri bɔri sɔŋsim.

²⁹N kpalimla yɔbahi mabia, ka nyɛ taatahi dolinikpee.

³⁰N niŋgbuŋ gbaŋ leela zaɣ’ sabinli ŋ-ŋmaari lura, ka tulim diri n kɔba.

³¹N goonje kumsi leela fabila, ka n yua kumsi be kaman ninvuɣ’ shɛb’ bɛn kumdi kukoya.