Read Dagbani Ayuba 32 Bible Online

Ayuba 32 - Dagbani bible

Ayuba 32

¹Niriba ata maa daa bi lan garigi Ayuba o ni daa wuhi ni o ka taali maa zuɣu.

²Di saha ka Barakɛl bia Ɛlihu suhu daa yiɣisi. O daa nyɛla Buz daŋ ni nira, ka yi Ram malibu ni na. O suhu daa yiɣisimi bahi Ayuba zuɣu, o ni daa wuhi ni o ka taali, amaa ni Naawuni m-mali taali la zuɣu.

³O suhu daa lan yiɣisi bahi Ayuba zɔnim’ ata la gba zuɣu bɛ ni daa bi tooi garigi Ayuba maa zuɣu; hal bɛ ni daa yɛli ni Ayuba mali galimi maa zaa yoli.

⁴Ɛlihu daa guhirimi ni bɛ naai pɔi ka o naanyi tɔɣisi Ayuba yɛtɔɣa, dama bɛna n-daa nyɛ ninkura.

⁵Amaa Ɛlihu ni daa nya ka niriba ata maa ni so bi yaag’ o noli garigi maa zuɣu ka o suhu daa yiɣisi.

⁶Ka Barakɛl ŋun daa nyɛ Buz daŋ ni nir’ la bia Ɛlihu maa daa garigi yɛli, “Man’ nyɛla bia, ka yi mi nyɛ ninkura, dinzuɣu ka n di zɔri dabiɛm ka shini, ka bi yɛli ya din be n suhu ni maa.

⁷N di yɛlimi, ‘Chɛ ka ninkura tɔɣisi yɛtɔɣa, ka chɛ ka bɛn yuma galisi pam mi wuhi yɛm.’

⁸Amaa yɛlimaŋli shia din be daadam ni, ka nyɛ Kpiɔŋlan’ Naa vuhim ŋɔ n-chɛ ka daadam baŋdi binyara.

⁹Di pala ninkura kɔŋko m-mali yɛm bee bɛn gbaai kpamli kɔŋko m-mi din tuhi.

¹⁰Dinzuɣu n yɛriya mi, ‘Wummiya; chɛliya ka n gba yɛli din be n suhu ni.’

¹¹Nyamiya, n di kul guhirila yi ni yɛn yɛli shɛm, ka gbilisiri tibili ni n wum yi yɛtɔɣa, saha shɛli yi ni di na tɛhiri yi ni yɛn yɛli shɛm la.

¹²N di kul gbilisirila tibili, amaa yɛlimaŋli, yi ni so bi wuhi ni Ayuba mali taali bee n-garig’ o yɛtɔɣa maa shɛli.

¹³Amaa miriya ka yi ti yɛli, ‘Ti mali yɛm, Naawuni n-ni nyaŋ o, pa daadam.’

¹⁴Pa mani ka o di tɔɣisiri yɛtɔɣa maa jɛndira, ka n ku zaŋ yi yɛtɔɣa maa garig’ o.

¹⁵Bɛ kɔba ni chɔɣisiya, bɛ bi lan garigi shɛli. Bɛ lan ka yɛtɔɣ’ shɛli din ni yɛli.

¹⁶N kul guhima, bɛ ni ka yɛtɔɣ’ shɛli din ni yɛli maa zuɣu? Bee bɛ ni ʒiɛya ka bi lan garigi n-yɛli shɛli zuɣu?

¹⁷Man’ gba ni garigi, Man’ gba ni yɛli din be n suhu ni.

¹⁸Dama m mali yɛtɔɣa pam, ka n ku chɛ li tɔɣisibu.

¹⁹N suhu ŋmanila wain koligu din pali wain, ka n yi bi tɔɣisi yɛtɔɣa, di ni tahi.

²⁰Di simdi ka n tɔɣisi yɛtɔɣa ka nya faako. Di simdi ni n yaai n noli garigi.

²¹M bi yɛn pahi so zuɣu bee n-niŋ so naŋgban’ malisim.

²²Dama n ʒi naŋgban’ malisim niŋbu, di yi nyɛ lala ŋun nam ma ŋɔ ŋun’ chɛ ka m bahi pumpɔŋɔ.