Read Dagbani Ayuba 33 Bible Online

Ayuba 33 - Dagbani bible

Ayuba 33

¹Amaa pumpɔŋɔ, nyini Ayuba, wummi n yɛtɔɣa ŋɔ, ka gbilisi tibili wum n yɛtɔɣa maa zaa.

²Nyama, n yaai n noli, ka n zilinli din be n nol’ ni tɔɣisiri yɛtɔɣa.

³N yɛtɔɣa ŋɔ wuhirila n ʒiɛyimtali n suhu ni, ka n ni mi shɛli dina, ka n yɛn yɛli ni n suhu zaa.

⁴Naawuni shia n-nam ma, ka Kpiɔŋlan’ Naa vuhim ti ma nyɛvili.

⁵A yi ni tooi garigi ma, nyin’ garigim’ ma; malimi a yɛtɔɣa shili n-zani n tooni.

⁶Nyama, m min’ a zaa nyɛla yim Naawuni sani. Taŋkpaɣu ka o daa zaŋ nam man’ gba.

⁷Di chɛ ka n yɛla gbaag’ a dabiɛm, m bi yɛn nahim a pam.

⁸Yɛlimaŋli, a tɔɣisi yɛtɔɣa ka n wum li. N wum a yɛtɔɣa maa vuri.

⁹A yɛliya, ‘N ka taali, m bi tum birigi shɛli, n kul bela kasi, ka taali shɛli ka n kɔbili ni.

¹⁰Nyama, Naawuni nya daliri jɛndi ma, ka kali ma pah’ o dimnim’ ni.

¹¹ O zaŋ bandi ba n naba, ka kul zaŋ o nina kpa n soya zaa.’

¹²Amaa dimbɔŋɔ puuni, a ka yɛlimaŋli, n ni garig’ a: Naawuni galisiya gari daadam kam.

¹³Wula ka a tah’ o ʒiishee ka yɛra, ‘O ku garigi n yɛtɔɣa ŋɔ shɛli?’

¹⁴Naawuni kul tɔɣisirila yɛtɔɣa sahakam, amaa ka ninsalinim’ bi baŋdi li.

¹⁵ Zahindi ni mini yuŋ ʒii puuni, saha shɛli gom yi ti gbaai niriba, ka bɛ do bɛ bindɔhi zuɣu gbihiri la,

¹⁶di saha ka o luɣiri ninsalinim’ tiba, ka kpahiri bɛ zuɣuri ni ka dabiɛm mali ba

¹⁷ni di chɛ ka o yihi ba kpaŋa, ka bɛ chɛ bɛ tuumbiɛri, ka yihi ba karimbaani ni,

¹⁸ka tiligi bɛ shihi ka di ku kpe gballi ni; ka chɛ ka bɛ ku kpi.

¹⁹Bɛ lan nyɛla bɛn nyari tibidarigibo ni biɛrim bɛ bindoo zuɣu, ka kul nyari biɛrim bɛ kɔba ni.

²⁰Ka di chɛ ka bɛ bi lan bɔri bindirigu, ka bɛ kɔre lan ka bindir’ viɛlli ni gba.

²¹Bɛ niŋgbuna zaa sheei lu, ka nir’ ku lan tooi nya li, ka bɛ kɔba din daa bi tooi nyarila yina.

²²Bɛ shihi vu m-miri gballi ni, ka bɛ nyɛviya miri bɛn tahiri kum na.

²³Malaika yi di be bɛ sani, ŋun nyɛ sandaantimda, ka nyɛ malaikanim’ tuhili ni yino, n-wuhi ni daadam nyɛla ŋun bebu tuhi,

²⁴o naan zo dilan’ nambɔɣu ka yɛli, ‘Famiy’ o bahi, ka o ku siɣi gballi ni; dama n nya soli ni n fa o bahi.

²⁵Chɛ ka o niŋgbuŋ leei zaɣ’ palli kaman bipolli niŋgbuŋ la; ka chɛ ka o lan mali yaa kaman o ni daa nyɛ bipolli la.’

²⁶Di saha o ni suhi Naawuni ka o deeg’ o suhigu, ka o ni tooi chaŋ Naawuni tooni ni suhupiɛlli, ka Naawuni ti o wuntia tuma maa laara.

²⁷Ka dilan’ naan yili yila yɛli niriba, ‘N daa tumla alahichi, ka bi lan gbibi yɛlimaŋli, amaa ka bɛ daa bi labisi di samli yo ma.

²⁸O tiligi n shia ka di bi faai siɣi gballi ni, ka n nyɛvili ni lan nya neesim.’

²⁹Yɛlimaŋli, Naawuni n-kul niŋdi dimbɔŋɔnim’ tiri daadamnim’ sahakam,

³⁰ni o yihi bɛ shihi gballi ni na, ka di chɛ ka bɛ lan nya nyɛvili neesim.

³¹Nyin’ Ayuba, gbilisim tibili wum n ni yɛn yɛl’ shɛm ŋɔ; fom’ ka n yɛl’ a.

³²A yi mali yɛtɔɣ’ shɛli ni a yɛli, nyin’ garigim’ ma. Tɔɣisima, dama m bɔri ni n wuhi ni a ka taali.

³³Ka a yi ka shɛli, nyin’ wumma; foma, ka n wuh’ a yɛm.”