Read Dagbani Ayuba 38 Bible Online

Ayuba 38 - Dagbani bible

Ayuba 38

¹Dimbɔŋɔ nyaaŋa ka Yawɛ daa tɔɣisi Ayuba yɛtɔɣa sanʒiɛɣu puuni yɛli,

²“Ŋuni n-lee biɛhindi n yɛm ni nyɛ shɛm, ka tɔɣisiri yɛtɔɣa ka bi mi di gbinni ŋɔ?

³Malimi shili kaman doo la, ka m bɔh’ a, ka a garigi ma.

⁴N ni daa nam dunia ŋɔ saha shɛli, a daa beni? A yi mi, nyin’ yɛlim’ ma.

⁵Ŋuni n-daa lee buɣisi di tariga, bee n-teei mii sɔŋ buɣisi li? Biɛhiŋ kani, a mi di zaa!

⁶Bimbɔ zuɣu ka di daantalisi daa lee tamiya? Bee ŋuni n-daa lee sɔŋ di tuuli tampuɣili?

⁷Biɛŋmarisi ni daa laɣim yili yila, ka alizanda ni malaikanim’ zaa yɔri suhupiɛlli vuri la, a daa beni?

⁸Ŋuni n-daa lee taɣi teeku kom zali saha shɛli di ni daa tahi yi tiŋgbani puuni la na?

⁹Mani n-daa zaŋ sagbana pil’ li, ka zaŋ zibisim titali vil’ li,

¹⁰ka zali di tariga, ka niŋ dunoya niŋ li n-kpari li zali,

¹¹ ka yɛli, ‘A ni yɛn kana ti paai shɛli tariga n-yɛn bɔŋɔ; di tirisi tooni. Kpe ka a kɔgbana din mali karimbaani maa yɛn zani.’

¹²A ni kul yiɣisina, a na mi n-zali asiba di ni yɛn piligi saha shɛli? Ka chɛ ka biɛɣu neebu mi di biɛhigu shee?

¹³A na mi n-chɛ ka biɛkaali neesim neei gili dunia zaa, n-kari ninvuɣ’ biɛri zaa di ni?

¹⁴Biɛkaali neesim chɛ ka daboya mini vinvama yi palo ni, kaman binyɛrigu kpabbu bɔba la, ka ne n-doya kaman bɛ ni zaŋ binshɛli dihi yaɣiri zuɣu ka yihi li ka di bɔbili doya shɛm la.

¹⁵Biɛkaali neesim kari ninvuɣ’ biɛri zibisim bahi, ka bɛ ni zaŋ bɛ bɔɣu shɛli duhi zuɣusaa kabi.

¹⁶A na mi n-siɣi teeku kɔbilnin’ ni bee n-tam teeku bulli ni tiŋgbani zuɣu chaŋ?

¹⁷Bɛ na mi n-vii kpiimba biɛhigu shee dunoya ka a nya, bee a na mi n-nya zibisim titali dunoya?

¹⁸A mi dunia ŋɔ yɛliŋ ni nyɛ shɛm? A yi mi dimbɔŋɔ zaa, nyin’ yɛlim’ ma!

¹⁹Soli din kuni neesim biɛhigu shee lee be ya, bee zibisim ni be luɣ’ shɛli lee be ya,

²⁰ka a ni tooi zaŋ li zali di tuma shee ka mi so’ shɛŋa din kuni di yiŋa?

²¹A shiri mi, dama di saha bɛ daa pun dɔɣ’ a ka a mi yuui pam!

²²A na mi n-kpe bɛ ni zaŋ saa ŋun noli maai pam zali du’ shɛŋa ni, bee a na mi n-nya bɛ ni zaŋ sakuɣa zali du’ shɛŋa ni,

²³n ni zaŋ shɛli zali gu muɣisigu saha mini zabili ni tɔbu tuhibu dal’ la?

²⁴So’ dini n-lee kuni neesim ni woligiwoligi luɣ’ shɛli bee wulimpuhili polo pɔhim ni yɛligiri gindi dunia ŋɔ ni luɣ’ shɛli polo?

²⁵Ŋuni n-daa lee gbi kɔsoli n-ti sa’ titali bee m-mali soli ti sakpani?

²⁶Ŋuni n-lee chɛ ka saa miri ninsalinim’ ni ka luɣ’ shɛli mini tiŋgban’ nɛli ni din nyɛ daadamnim’ ni ka luɣ’ shɛli?

²⁷Dimbɔŋɔ niŋdimi ni di chɛ ka tiŋgbani tiɣi kom, tiŋgban’ shɛli din nyɛ dabari ka ka buchi, ni di chɛ ka mɔri bili tiŋgban’ ni.

²⁸Saa malila ba? Bee ŋuni n-daa lee chɛ ka bɛ dɔɣi maligim din tɔɣiri luri ŋɔ?

²⁹Paɣ’ ŋuni pul’ ni ka maasim kpikpikpi lee yina? Ka ŋuni n-lee dɔɣi ko’ shɛli din kilim yiri alizanda ni na ŋɔ?

³⁰Kom maa kpaŋmi kaman kuɣili la, ka teeku bulli ni kom zuɣusaa kilim.

³¹ A ni tooi zaŋ zoligɔnim’ ga saŋmar’ shɛb’ bɛn laɣim taba ka bɛ booni ba ‘Gbiŋgbiŋ min’ o bihi la?’ Bee a ni tooi yihi binshɛli din gbibi saŋmar’ so bɛ ni booni ‘Goli wulan’ la?’

³²A ni tooi yɛli saŋmarisi bɛ ni yɛn yina saha shɛli? Bee a ni tooi wuhi saŋmar’ shɛb’ bɛn laɣim taba ka bɛ booni ba ‘Baa min’ o bihi la’ soli?

³³A mi zaligu shɛŋa din be zuɣusaa? A ni tooi zaŋ lala zaligunim’ zali dunia ŋɔ ni?

³⁴A ni tooi tahi sagbani zuɣu n-chɛ ka kom kpe n-lim’ a?

³⁵A ni tooi tim saanyaɣisibu ka di chaŋ ka labina ti yɛl’ a, ‘Mani m-bɔŋɔ’?

³⁶Ŋuni n-lee zaŋ yɛm niŋ nir’ puuni? Bee n-chɛ ka baŋsim be nir’ zuɣu ni?

³⁷Ŋuni n-lee mali yɛm din ni tooi kali sagbana? Bee ŋuni n-lee ni tooi gbiligi zuɣusaa kom kola

³⁸saha shɛli taŋkpagbiligu yi ti laɣim niŋ tampuɣa ka tampuɣa maa tabili taba?

³⁹A ni tooi gbahi binnɛma ti gbuɣinli bee n-dihi gbuɣimbihi ka bɛ tiɣi,

⁴⁰saha shɛli bɛ yi ti ŋuni bɛ biɛhigu shee, bee n-do bɛ dooshee n-gu?

⁴¹Ka ŋuni n-lee tiri kahiŋkɔɣu nimdi saha shɛli kum yi ti mal’ o bihi ka bɛ kumdi niŋdi man’ Naawuni, ka chani bɔri bindirigu?