Read Dagbani Ayuba 39 Bible Online

Ayuba 39 - Dagbani bible

Ayuba 39

¹A mi kparibuhi ni dɔɣiri saha shɛli? A na mi n-nya saŋkpaliŋ ni dɔɣiri shɛm?

²A ni tooi kali bɛ ni dandi bɛ baɣa chɛra shɛm tariga? Ka a mi bɛ dɔɣibu saha?

³A mi saha shɛli bɛ ni dooni dɔɣiri bɛ bihi? Ka a mi saha shɛli bɛ bihi maa ni yirina?

⁴Ka bɛ bihi maa yi zooi mɔɣu maa ni n-niŋ yaa, bɛ chanimi ka ku lan labi bɛ sani yaha.

⁵Ŋuni n-lee chɛ ka mɔɣu ni buŋ’ gɔr’ o yubu? Ka ŋuni n-lee gaai mɔɣu ni bun’ so ŋun zɔri pam naba ni tanachi?

⁶N zaŋla tiŋgban’ nɛli ti ba ni di nyɛ bɛ yiŋa, ka zaŋ tiŋgban’ shɛli din ka kulim ti ba ni di nyɛ bɛ biɛhigu shee.

⁷Bɛ baɣa ka fɔŋ ni vuri ni, so mi bi mali ba tumdi tuma ka bɛ wumd’ o tahigu.

⁸Bɛ chani gindila zoya zuɣu bɔri mɔri, ka chani bɔri momaha kam.

⁹Yɔnahu ni saɣi tum a tuma? O ni saɣi gbe a naɣikpahi ni yuŋ?

¹⁰A ni tooi lo o mihi n-chɛ ka o ko a? Bee o ni tooi yɛbisi a kɔbu ti a ka a biri?

¹¹A ni niŋ o naani o ni mali kpiɔŋ zuɣu ka chɛ a tuma jɛl’ o?

¹²A niŋ yɛda ni o ni ʒi a puu atam labina ti sɔŋ a kabɔɣili ni?

¹³Taataa kpiŋkpama vibiri ni suhupiɛlli, amaa o ka kpiŋkpaŋkɔbiri kaman tɔrili la.

¹⁴Dama o kul chɛrila o gala sɔŋ tiŋa, ka chɛ ka tiŋgbani biisim kpɛr’ li,

¹⁵ka bi tɛhi ni napɔŋ ni tooi no ŋ-ŋma li, ka mɔɣu ni biŋkɔbiri gba ni tooi no li.

¹⁶O mali ninkuunsi ni o bihi, di bi ŋman’ o bihi n-nyɛ ba; hal o wahala ni yɛn bahi yoli maa o baɣa kani.

¹⁷Dama Mani Naawuni m-mɔŋ o yɛm, ka mɔŋ o baŋsim.

¹⁸Amaa o yi yiɣisi ni o guui, o larila wɔribara min’ o wɔhu.

¹⁹Nyini n-ti wɔhu yaa? Nyini n-zaŋ gbɛm tam o nyiŋgoli zuɣu?

²⁰Nyini n-chɛ ka o yiɣiri kaman toli la? O nyeeni firisibu din mali jilima la mali dabiɛm.

²¹O zaŋd’ o naba kɔrisiri tiŋa ni yaa, o mali suhupiɛlli pam o yaa maa zuɣu, ka zɔri tuhiri bidibbina soli.

²²O larila dabiɛm, o bi zɔri dabiɛm, o bi tiriti gbini takɔbi zuɣu.

²³Bɛ zaŋ lɔɣu din chaɣisira n-nyaɣil’ o, ka zaŋ kpan’ titali din nyaɣisira mini banchiriga n-nyaɣil’ o pahi.

²⁴O ni yi nyam, ka o ni sɔhira, o varila tiŋa. Bɛ yi ti piɛbi kikaa, o bi tooi zaani luɣ’ yini.

²⁵Bɛ yi ti piɛbi tɔbu kikaa, o kumdimi ni suhupiɛlli. Tɔbu yi be katiŋa, o taɣirila di ʒiɛɣu, ka wumdi sapashin’ kpamba ni tahira kaman saa tahigu la.

²⁶A yɛm n-chɛ ka wubiga pa zuɣusaa yiɣiri ka teeg’ o kpiŋkpama kpa nudirigu polo ŋɔ?

²⁷Nyini n-zali tɔrili ni o yiɣimi du zuɣusaa katiŋa ka tɛr’ o tiɛɣu luɣ’ shɛli din du pam la?

²⁸O bela tampima shee, ka zaŋ tampin’ choya zuɣusaa leeg’ o yiŋa.

²⁹O bela nimaani lihiri bɔr’ o ni yɛn gbaai binshɛli di, di yi be haliya o nina ni nya li.

³⁰ O bihi nyurila ʒim. Bɛ ni ku binyara luɣ’ shɛli, nimaani ka o be.”