Read Dagbani Ayuba 40 Bible Online

Ayuba 40 - Dagbani bible

Ayuba 40

¹Ka Yawɛ daa yɛli Ayuba,

²“Nyin’ ŋun nyari niriba galimi ŋɔ ni tooi mo Kpiɔŋlan’ Naa? Ŋunkam ŋmɛri Naawuni naŋgbankpeeni ŋun’ garigima.”

³Di saha ka Ayuba daa garigi yɛli Yawɛ,

⁴“Nyama, m pɔri pam. Wula ka n lee yɛn tooi garig’ a? N ni zaŋ n nuhi pɔbi n noli.

⁵M pun tɔɣisi yɛtɔɣa pam, n ku lan garigi; n ku lan yɛli shɛli yaha.”

⁶Di saha ka Yawɛ daa garigi yɛli Ayuba sanʒiɛɣu puuni,

⁷“Malimi shili kaman doo la, ka m bɔh’ a ka a yɛli ma.

⁸Hal a yɛn yɛlimi ni m mali galimi? A wuhimi ni m mali galimi din ni wuhi ni a mali yɛlimaŋli?

⁹A mali nuu ka di be kaman Naawuni nuu? A mali kukoli din ŋmani saa tahibu kaman o kukol’ la?

¹⁰Zaŋmi nam mini tibiginsim ye kaman salima nɛma la, ka zaŋ nam dariza mini yaa ye kaman situra la.

¹¹Yiɣisim’ a suhu zaa pam n-lihi bɛnkam mali karimbaani, ka a filim’ ba.

¹²Lihimi nya ninvuɣ’ shɛb’ bɛn zaa mali karimbaani, ka a filim ba, ka bahi ninvuɣ’ biɛri yoli bɛ ni be luɣ’ shɛlikam.

¹³Zaŋmi bɛ zaa laɣim sɔɣi tiŋgban’ ni, ka lo ba niŋ kpiimba biɛhigu shee.

¹⁴Di saha man’ gba ni saɣi ni amaŋmaŋ’ nudirigu ni tooi ti a nasara.

¹⁵Lihimi Bɛhɛmɔt[8] so n ni nam kaman n ni nam a shɛm ŋɔ; o ŋubirila mɔri kaman naɣilaa la.

¹⁶O yaa bela o shee polo, ka o yiko be o pugbana puuni.

¹⁷O zuli kpɛmmi kaman sida tia la; ka o gbalipina ni jila kpɛnkpe tab’ ni.

¹⁸O kɔba ŋmanila daanya mulima din mali yɔri, ka o gbaya min’ o bɔɣiri ŋmani kurimulima.

¹⁹Ŋuna n-nyɛ m binnamda zaa kpɛma, ŋun nam’ o kɔŋko n-ni tooi zaŋ takɔbi mir’ o.

²⁰Dama o ni ŋubiri mɔ’ shɛŋa bela zoya ni luɣ’ shɛli mɔɣu ni biŋkɔbiri zaa ni diɛmda.

²¹O doonila gɔtihi gbin’ ni, ka baa ni kaɣili lims’ o.

²²Ka gɔtihi maa tir’ o mahim, ka kuligara gil’ o niŋ sunsuuni.

²³Nyama, mɔɣili kopaliga yi ti kpɛma, o bi zɔri dabiɛm; ka Jɔɔdɛn Mɔɣili kopaliga yi ŋmɛr’ o noli o suhu ʒimi.

²⁴So ni tooi zaŋ ziŋgoo gbaag’ o bee n-zaŋ tɔŋ nyini kuh’ o nyee?