Read Dagbani Ayuba 41 Bible Online

Ayuba 41 - Dagbani bible

Ayuba 41

¹ A ni tooi zaŋ ziŋgoo gbaai Lɛviatan n-labi duli na bee n-zaŋ mia lo o zilinli?

²A ni tooi zaŋ gabiga tu o nyee ni bee n-zaŋ goo kuh’ o yɛno pili yi?

³O ni balim a pam? O ni tɔɣis’ a suhumahili yɛtɔɣa?

⁴O ni lo a alikauli ni a zaŋm’ o leeg’ a tumtumda sahakam?

⁵A ni saɣi diɛmd’ o kaman noombil’ la bee n-lo o zal’ a tumtumdiba bɛn nyɛ bipuɣinsi?

⁶Daabihi ni saɣi di o daa? Bɛ ni saɣi pirig’ o ti kɔhigɔriba?

⁷A ni tooi zaŋ kpana pam to n-chib’ o gbaŋ bee n-zaŋ zahimgbahiri kpana to o zuɣu ni?

⁸Zaŋm’ a nuhi shih’ o, ka tɛhi a min’ o ni yɛn va shɛm, a ku lan niŋ lala yaha.

⁹Tahima shɛlikam bɛ ni niŋ zaŋ chaŋ o gbaabu polo ku di nasara. Hal niriba yi nya o, dabiɛm gbahiri ba mi.

¹⁰Ka so kani ŋun mali suhukpeeni din ni tooi niŋ o ka o suhu yiɣisi. Ŋuni n-lee ni tooi zan’ o tooni?

¹¹Ŋuni n-lee ni tooi lir’ o ka tiligi? Ŋuni n-lee ni tooi niŋ lala dunia zaa ni?

¹²N ni yɛl’ a o naba min’ o bɔɣiri ni o yaa ni o biɛhigu ni viɛl’ shɛm yɛla.

¹³Ŋuni n-lee ni tooi darigi fuɣ’ o gbaŋ? Ŋuni n-lee ni tooi to n-chib’ o kuriti gbaɣino ziɣinli ŋɔ?

¹⁴Ŋuni n-lee ni tooi darigi yaag’ o noli? Dabiɛm n kul be o nyina ni ti gili.

¹⁵Nyɔtaɣirisi n-kul gil’ o yaaŋa zuɣu zaa, di shɛbila tab’ ni kaman bɛ dihi li mi tabili la.

¹⁶Di kul shɛbisila tab’ ni hal ka pɔhim ku tooi kpe di sunsuuni gba.

¹⁷Di kul tuɣituɣila taba kirikiri, ka so ku tooi woligi li.

¹⁸O yi tihim, buɣim n-nyaɣisira, ka o nina ŋmani wuntaŋ’ m-puhirina asiba la.

¹⁹Buɣim niɛm mokpala n-yir’ o noli ni na n-tahiri yiɣiri ka buɣim yirina.

²⁰Ka nyɔhi yir’ o nyɛvoya ni kaman mɔri ka bɛ zaŋ mali buɣim n-zaŋ duɣu tam la.

²¹O yi vuhi, buɣim taarila sala, ka buɣim zibizibi yir’ o noli ni na.

²²Yaa be o nyiŋgoli ni, ka dabiɛmnim’ ʒe o tooni ka bɛ ni sɔhira.

²³O niŋgbuŋ kul kpɛla tab’ ni, di kpɛmmi kirikiri, ka so ku tooi dam li.

²⁴O suhu kpɛmmi kaman kuɣili la, di kpɛmmi kaman nɛli la.

²⁵O yi yiɣisi zani, dabiɛm gbahirila wuna, ka bɛ zɔri dabiɛm ka labi nyaaŋa.

²⁶Hal bɛ yi zaŋ takɔbi bee piɛma bee kpana bee baasali sua lir’ o bɛ ku tooi niŋ o shɛli.

²⁷Kurugu ŋmanila muriga o sani, ka daanya mi ŋmani da’ kpima.

²⁸Piɛm ku tooi kar’ o ka o guui, ka kuɣilɔŋ kuɣa ŋmani wurigu o sani.

²⁹O sani, jaambɔna ŋmanila kaɣa. Bɛ yi to kpani ka o wum di damli, o lari li mi.

³⁰O puli zuɣu gbaŋ ŋmanila salichɛhi; o teer’ omaŋ’ dooni baɣiri ni kaman kaburi dɔɣu la.

³¹O chɛ ka kɔbulli ni kom gbirigiri kaman duɣu ni ka di be la; o chɛ ka teeku bemi kaman kpaʒiɛrim m-be duɣu ni la.

³²O ŋmɛri bɔbili din nyaɣisira pari kom zuɣu o nyaaŋa. So ni tɛhi ni kɔbulli maa ni nyɛla zabipiɛla.

³³O kpee ka dunia ni, o nyɛla binnɛɔŋ ŋun bi zɔri dabiɛm.

³⁴O nyari binshɛɣukam din be zuɣusaa, o nyɛla biŋkɔbiri zaa naa.”