Read Dagbani Ayuba 42 Bible Online

Ayuba 42 - Dagbani bible

Ayuba 42

¹Di saha ka Ayuba daa garigi yɛli Yawɛ,

²“M mi ni a ni tooi niŋ binshɛɣukam, ka so ku tooi yiɣisi a ni lo ni a niŋ shɛli.

³ A bɔhiya, ‘Ŋuni n-lee beni n-sɔɣiri yɛm yɛtɔɣa, ka bi mi di gbinni ŋɔ?’ Yɛlimaŋli, mani n-daa tɔɣisi yɛtɔɣa ka bi mi di gbinni. N daa tɔɣisila binshɛŋa yɛla ka di niŋ ma alahiziba pam, ka m bi baŋ li.

⁴ A daa yɛli ma, ‘Wumma, ka n yɛl’ a yɛtɔɣa; n ni bɔh’ a bɔhigu, ka a garigi ma.’

⁵N daa wum a yɛla la n tibili ni, amaa pumpɔŋɔ n nini nya a;

⁶dinzuɣu ka n siɣisi mmaŋa n-niŋ tuuba ka do taŋkpaɣu mini tampiligim ni ŋɔ.”

⁷Yawɛ ni daa yɛli Ayuba yɛla ŋɔ zaa nyaaŋa, ka ŋun’ Yawɛ daa yɛli Ɛlifaz ŋun daa nyɛ Tɛman nir’ la, “N suhu yiɣisiya pam bahi a min’ a zɔnim’ ayi maa zuɣu, dama yi bi tɔɣisi n yɛla ka di nyɛ yɛlimaŋli kaman n dabili Ayuba ni tɔɣisi li shɛm.

⁸Dinzuɣu pumpɔŋɔ zaŋmiya naɣilahi ayopɔin mini piɛlahi ayopɔin n-chaŋ n dabili Ayuba sani ti mali bɛ ni zaŋdi sara shɛli nyɔri buɣim la yimaŋmaŋ’ zuɣu. Ka n dabili Ayuba ti suhi ma tin ya. Dama n ni deeg’ o suhigu ka ku darigi yi tibili yi jɛrilim maa zuɣu. Dama yi bi tɔɣisi n yɛla ka di nyɛ yɛlimaŋli kaman n dabili Ayuba ni tɔɣisi li shɛm maa.”

⁹Ka Ɛlifaz ŋun daa nyɛ Tɛman nir’ maa mini Bilidad ŋun daa nyɛ Shua nir’ la ni Zɔfar ŋun daa nyɛ Naama nir’ la daa chaŋ ti niŋ Yawɛ ni yɛli ba ni bɛ niŋ shɛm maa. Ka Yawɛ daa deei Ayuba suhigu.

¹⁰ Ayuba ni daa suhi Naawuni ti o zɔnim’ maa nyaaŋa, ka Yawɛ daa lan labisi Ayuba buni ti o. Yawɛ daa tila Ayuba o ni daa pun mali shɛli ʒii buyi zuɣu.

¹¹Di saha ka o mabidɔbba min’ o tizɔpaɣiba ni bɛnkam daa pun mi o zaa chaŋ o yiŋa, ka o mini ba ti di bindira, ka bɛ daa fabili sɔŋ o, ka maag’ o suhu Yawɛ ni daa chɛ ka yɛlibiɛ’ shɛŋa paag’ o maa zuɣu. Ka bɛ zaa yino kam daa ti o liɣiri mini salima nintua.

¹²Ka Yawɛ daa niŋ alibarika pam niŋ Ayuba ni dabisa shɛŋa din daa bahindi nyaaŋa maa ni n-gari o ni daa pun niŋ alibarika niŋ o ni shɛm piligu ni la. O daa malila piɛri tuhi’ pinaanahi mini laakumnim’ tusaayɔbu ni naɣilahi tusaayi ni bunnyama tuhili.

¹³O daa lan dɔɣi bidibis’ ayopɔin mini bipuɣins’ ata.

¹⁴Ka o daa boli bipuɣin’ kpɛm’ sani yuli Jɛmaima, ka boli ŋun paya yuli Kɛzia, ka boli ŋun pah’ ata maa mi yuli Kɛrɛnhapuk.[9]

¹⁵Ayuba bipuɣinsi maa viɛlim kpee daa ka tiŋgbɔŋ maa zaa ni. Ka bɛ ba daa ti ba fali pahi bɛ tizɔdɔbba maa zuɣu.

¹⁶Dimbɔŋɔ nyaaŋa, ka Ayuba daa lan niŋ yuun’ kɔbiga ni pihinahi pahi. Ka o nini daa nya o yaantibichahi mi yaansi.

¹⁷Ka Ayuba daa kurigi zaa, ka o dabisa ti pali ka o naanyi kpi.