Read Dagbani Ayuba 7 Bible Online

Ayuba 7 - Dagbani bible

Ayuba 7

¹Daadamnim’ bi malila tuun’ kpɛma tumbu dunia ŋɔ ni? Ka bɛ dabisa bi ŋmanila bɛ ni bu so paa dabisa?

²Di ŋmanila dabili ŋun suhu ye mahim zuɣu, ka ŋmani tumtumdiba bɛn guhiri bɛ yɔri.

³Lala ka bɛ zaŋ chira din ka binshɛli ti ma, ka zaŋ yuŋ shɛŋa din mali wahala ti ma.

⁴N yi dɔni tiŋa m bɔhirimi, “Bɔ saha ka n lee yɛn yiɣisi? Amaa ka biɛɣu neebu wɔɣa. Ka n kul mali mmaŋ’ wolisiri hal ka biɛɣu ti miri neebu.

⁵Zunzuya mini daɣiri m-pali n niŋgbuŋ ni, ka n niŋgbuŋ gbaŋ kul mɔri ti puhigira.

⁶N dabisa chani yomyom gari kpalua gombo, ka m paari di tariga, ka tahima kani.

⁷Teemi ni n nyɛvili nyɛla vuhim kɔŋko, n nini ku lan nya din viɛla.

⁸Ŋunkam nini nya ma ku lan nya ma yaha. A nina kul yɛn lihiri ma mi, ka n chaŋ.

⁹Kaman sagbana ni yi wurim naai shɛm la, lala ka ninvuɣ’ shɛb’ bɛn kpi ku lan labina.

¹⁰Bɛ ku lan labi bɛ yinsi, ka bɛ ni daa be luɣ’ shɛli maa nim’ ku lan baŋ ba yaha.

¹¹Dinzuɣu n ku shini n noli, N ni tɔɣisi yɛtɔɣa ni biɛrim pam n shia ni. N ni fabili ni naŋgbantom n suhu ni.

¹²Teeku n-nyɛ ma bee binneen’ titali [4] ŋun be teeku ni n-nyɛ ma, ka a chɛ ka bɛ guli ma?

¹³N yi yɛli, ‘N garo ni maai n suhu, n garibil’ ni chɛ ka n fabila naai;

¹⁴di saha ka a chɛ ka zahima varisiri ma, ka chɛ ka ʒiinim’ nyabu kpɛhiri ma dabiɛm;

¹⁵hal ka n ti paɣi ni bɛ mirisi n nyiŋgol ni ka n kpi n-gari m biɛhigu.

¹⁶N nyee nyɔni m biɛhigu; n ku beni hal ni saha din ka bahigu. Miligim’ ka chɛ ma, dama n dabisa kul nyɛla vuhim.

¹⁷ Ninsalinim’ mi lee nyɛla bɔ, ka a tibigi ba pam, ka zaŋ a zaŋsim niŋ bɛ ni,

¹⁸ka kaari ba asiba kam, ka zahindi ba saha shɛlikam?

¹⁹A ku ŋmaligi a nini bahi kpaŋ’ biɛla, ka chɛ ma hal ka n ti vali n nintɔri?

²⁰Nyin’ ŋun lihiri daadamnim’ ŋɔ, n yi tumla alahichi, tuun’ bɔ ka n lee tum a? Bɔ n-chɛ ka a kul zaŋ dolila mani? Ka a kul liritila mani? Bɔ n-niŋ ka n yɛla muɣis’ a?

²¹Bɔzuɣu ka a bi chɛ n taali ka kpihim n daalahichi maa? Dama pumpɔŋɔ n yɛn dɔnila tiŋgban’ ni. A ni ti lihi bo ma, amaa ka n ku beni.”