Read Dagbani Yila 10 Bible Online

Yila 10 - Dagbani bible

Yila 10

¹Yawɛ, bɔ n-niŋ ka a ʒe katiŋa? Bɔ n-niŋ ka a sɔɣ’ amaŋ’ yɛlimuɣisira saha?

²Ninvuɣ’ biɛri karimbaani puuni bɛ niŋdi nandaamba alaka. Chɛ ka bɛ ni bari tɔn’ shɛŋa ŋmaligi gbahi ba.

³Ninvuɣ’ biɛri kul nyurila bara bɛ suhuri ni kɔr’ biɛri zuɣu; ka bɛn nyɛ diribarilimnim’ mi kul zaɣisiri Yawɛ ka tur’ o.

⁴Bɛ karimbaani biɛhigu zuɣu, bɛ yɛrimi, “Naawuni ku niŋ shɛli zaŋ chaŋ di polo”; ka bɛ tɛha zaa kul nyɛla, “Naawuni kani.”

⁵Bɛ kul tɔŋdimi bɛ soya ni sahakam. Bɛ ku tooi baŋ a ni kariti saria shɛm. Bɛ kul maanila bɛ dimnim’ ansarisi.

⁶Bɛ kul yɛrila bɛ suhuri ni, “Ti kul ku vuui; ʒiɛmani kam puuni muɣisigu shɛli ku paai ti.”

⁷ Turi mini yɔhiŋgu ni niriba nahiŋgu yɛla n-kul be bɛ noya ni; ka zilima yɛlibu mini yɛtɔɣ’ biɛri kul be bɛ yɛtɔɣa ni.

⁸Bɛ sɔɣirimi dooni tiŋkpansi n-guri ni bɛ ku ninvuɣ’ shɛb’ bɛn ka taali. Bɛ kul lihirimi ni bɛ nya bɛn ku tooi sɔŋ bɛmaŋa.

⁹Bɛ sɔɣimi do bɛ sɔɣibu shee kaman gbuɣinli la guhira. Bɛ domi gu tarimba ni bɛ zaŋ bɛ zana bari gbahi ba n-vo n-chaŋ.

¹⁰Bɛ yi kurim bee bɛ yi damdi, bɛ ni yɛn gbahi shɛb’ maa lurimi bɛ kpiɔŋ zuɣu,

¹¹Bɛ tɛhirila bɛ suhuri ni, “Naawuni tamiya. O ŋmaligila o nini bahi kpaŋa, o kul ku nya li sahakam.”

¹²Yawɛ, yiɣisim’ zani; Naawuni, kpuɣim’ a nuu zuɣusaa, di tam ninvuɣ’ shɛb’ bɛn nyari nahiŋgu yɛla.

¹³Bɔzuɣu ka ninvuɣ’ biɛri zaɣisi Naawuni, ka yɛri bɛ suhuri ni, “A ku kari ti saria di zuɣu?”

¹⁴Amaa a nyara, hal a nya muɣisigu mini wahala shɛŋa bɛ ni dira, chɛ ka yɛla maa be a nuu ni. Ninvuɣ’ shɛb’ bɛn bɔri sɔŋsim zaŋ bɛmaŋ’ niŋla a nuu ni; a mi pun nyɛla kpibisi sɔŋda.

¹⁵Saɣimmi ninvuɣ’ biɛri mini tuumbiɛtumdiba yiko; darigim’ bɛ tibili bɛ tuumbiɛri maa zuɣu hal ka bɛ tuumbiɛri maa ti ku lan beni yaha.

¹⁶Yawɛ nyɛla saha din ka bahigu naa. Ka zuliya shɛb’ bɛn kpalim ni bahi yoli o tiŋgbani ŋɔ ni.

¹⁷Yawɛ, a nyɛla ŋun wumdi nandaamba suhigu; ka lan nyɛ ŋun kpaŋsiri bɛ suhuri, ka ni gbilis’ a tibili wum,

¹⁸ka kari saria din tuhi n-sɔŋ kpibisi mini ninvuɣ’ shɛb’ bɛn nyari nahiŋgu, ka lala chɛ ka dabiɛm ku lan mali daadamnim’ yaha.