Read Dagbani Yila 103 Bible Online

Yila 103 - Dagbani bible

Yila 103

¹[98] M paɣiri Yawɛ n suhu ni. N niŋgbuŋ luɣili pinaayi zaa paɣir’ o yuli din be kasi ŋɔ.

²M paɣiri Yawɛ n suhu ni, ka di bi simdi ni n tam o nirilim yɛla.

³O chɛ n daalahichi zaa, ka tibi n dɔriti zaa.

⁴O yihi ma gballi ni. O zaŋ yurilim maŋli min’ o nambɔzɔbo leei zuɣupiligu pili ma.

⁵O zaŋ bin’ suma dihi ma n ni yɛn be saha shɛli puuni, ka di chɛ ka m bipolitali kpiɔŋ labina kaman tɔrili kpiɔŋ la.

⁶Yawɛ doli yɛlimaŋli soli, ka tumdi wuntia tuma tiri bɛn nyari nahiŋgu.

⁷O daa wuhi Musa o soya, ka wuhi Izraɛlnim’ o tuma.

⁸ Yawɛ nambɔzɔbo min’ o nirilim galisiya. O suhu bi yiɣisiri yom, ka o yurilim maŋli galisi pam.

⁹O kul ku nyari nir’ taali sahakam, bee n-jɛri suli sahakam.

¹⁰O bi darigiri ti tibili kaman ti daalahichi ni simdi shɛm bee n-yɔri ti ti tuumbiɛri samli.

¹¹Zuɣusaa ni du ka chɛ tiŋgbani shɛm, lala ka o yurilim maŋli galisi zaŋ chaŋ ninvuɣ’ shɛb’ bɛn zɔr’ o sani.

¹²Wulimpuhili zaŋ chaŋ wulinluhili ni waɣ’ shɛm, lala ka o yihi ti daalahichi bahi katiŋa.

¹³Ba ni zɔr’ o bihi nambɔɣu shɛm, lala ka Yawɛ zɔri ninvuɣ’ shɛb’ bɛn zɔr’ o la nambɔɣu.

¹⁴Dama o mi o ni zaŋ binshɛli nam ti. O teeya ni ti nyɛla taŋkpaɣu.

¹⁵Ninsalinim’ biɛhigu ŋmanila mɔri. Bɛ zoorimi kaman mɔɣu ni tipum la;

¹⁶ka pɔhim yi ti ʒe li, di kpahirimi lu, ka so ku lan tooi baŋ di ni di be shɛli.

¹⁷Amaa Yawɛ mali yurilim maŋli sahakam zaŋ chaŋ ninvuɣ’ shɛb’ bɛn zɔr’ o sani, ka chɛ ka o wuntitali yiri zahira bɛ bihi mini bɛ yaansi sani ʒiɛmani kam ni.

¹⁸Bɛna n-nyɛ bɛn gbib’ o daalikauli, ka dol’ o zaligunima.

¹⁹Yawɛ zal’ o nam ʒiishee la alizanda ni. O nyɛla naa ŋun su sokam zaa.

²⁰Yinim’ malaikanima, Paɣimiya Yawɛ! Yinima n-nyɛ bɛn mali yaa ka tumd’ o ni yɛli shɛm, ka dol’ o yɛligu.

²¹Yinim’ bɛn nyɛ alizanda ni tumtumdiba, ka nyɛ o daba bɛn tumd’ o yubu ŋɔ, paɣimiya ŋun’ Yawɛ.

²²Yinim’ bɛn nyɛ o binnamda zaa, ka be o nam sulinsi ni zaa ŋɔ, paɣimiya ŋun’ Yawɛ. M paɣiri Yawɛ n suhu ni.