Read Dagbani Yila 104 Bible Online

Yila 104 - Dagbani bible

Yila 104

¹M paɣiri Yawɛ n suhu ni. Yawɛ ŋun nyɛ n Naawuni ŋɔ, a galisiya pam. A zaŋla jilima mini nam yiko ye kaman situra la.

²A zaŋla neesim ye kaman binyɛrigu la. A teela sagbana sɔŋ kaman tanti la.

³A me a yili tamla zuɣusaa kom[99] zuɣu, ka zaŋ sagbana leeg’ a chɛchɛbuŋa, ka ba pɔhim kpiŋkpama.

⁴ A zaŋ pɔhim leeg’ a tuumba, ka zaŋ buɣim mini buɣim niɛm leeg’ a tumtumdiba.

⁵A me dunia tamla di tanzaa zuɣu, ka shɛli kul ku tooi dam li sahakam.

⁶A teei teeku pa di zuɣu kaman binyɛrigu la, ka chɛ ka kom lim zoya.

⁷A yi tahi kom maa zuɣu, di guurimi, ka a yi chɛ ka saa tahi, kom maa zɔrimi chana.

⁸Di zɔrimi duri zoya, ka zɔri siɣiri vinvama ni n-chani ti dooni a ni zali ni di dɔni luɣ’ shɛli.

⁹A zali di tariga ni di di chaŋ yaɣi di zuɣu, ka lala chɛ ka di ku lan tooi zo n-tiɛli dunia ŋɔ yaha.

¹⁰A chɛ ka kɔbil’ nina kom puhiri yiri vinvama ni na n-zɔri gariti daboya sunsuuni.

¹¹Ka di tiri mɔɣu ni biŋkɔbiri kom, ka mɔɣu ni bunsi nyuri li kuri kɔnyuri.

¹²Ka noonsi bɛn be zuɣusaa tɛri bɛ tɛri tihi din baɣi li zuɣu, ka be di wula zuɣu kumda.

¹³A bela a biɛhigu shee ka chɛ ka saa yiri zuɣusaa luri zoya zuɣu na, ka tiŋgbani diri a tuma nyɔri.

¹⁴A chɛ ka mɔri zoori ka biŋkɔbiri ŋubira, ka chɛ bindira bimbilima ti ninsalinim’ ni bɛ kɔri li ka di yihiri bindirigu tiŋgban’ ni na,

¹⁵ka yihiri wain na ka di tiri ninsalinim’ suhupiɛlli, ka yihiri olivi tihi kpam na ka di chɛ ka ninsalinim’ ninni nyɛlisira, ka chɛ ka ninsalinim’ nyari bindirigu diri ka di tiri ba kpiɔŋ.

¹⁶Saa miri niŋdi Yawɛ tihi pam, o ni biri Lɛbanɔn sida ti’ shɛŋa la.

¹⁷Ka noonsi tɛri bɛ tɛri di zuɣu, ka shinshingoorɔnim’ tɛri bɛ tɛri gɔhi tihi zuɣu.

¹⁸Yɔbuhi bela zoya din du pam zuɣu, ka sisirisi sɔɣiri di kuɣa lɔna ni.

¹⁹Nyini n-chɛ ka goli wuhiri saha, ka chɛ ka wuntaŋ’ mi o lubu saha.

²⁰Nyini n-nam zibisim, ka di nyɛ yuŋ, ka biŋkɔbiri bɛn be yɔɣu ni yirina gɔra.

²¹Gbuɣimbihi yi bɔri bindirigu Naawuni sani, bɛ chanimi ŋumdi ginda.

²²Ka wuntaŋ’ yi ti puhina, bɛ zɔrimi ti kpe bɛ biɛhigu shee.

²³Niriba yi chaŋ bɛ tuma ni, bɛ tumdimi hal ni zaawuni.

²⁴Yawɛ, a ni nam binshɛŋa galisiya pam. A yɛm puuni ka a nam di zaa. A binnɛma n-kul pali dunia ŋɔ zaa.

²⁵Teeku n-doya ŋɔ, di galisiya ka yɛlim’ pam, biŋgbamda bɛn ka kalinli m-be di ni. Bɛ nyɛla binneen’ kara ni zaɣ’ bihi.

²⁶ Ŋariŋ kara pala di kom zuɣu chana, ka Lɛviatan be di ni diɛmda.

²⁷Bɛmbɔŋɔ zaa lihirila a ninni ni a ti ba bɛ bindirigu di tibu saha.

²⁸A yi ti ba bindirigu maa, bɛ laɣisiri li mi sɔŋ. A yi teeg’ a nuu, bɛ nyarila binsuŋ kam tiɣi.

²⁹A yi ŋmalig’ a nini bahi kpaŋa ka chɛ ba, bɛ suhuri zɔhirimi. A yi deei bɛ vuhim, bɛ kpirimi n-lab’ taŋkpaɣu ni.

³⁰Amaa nyini n-chɛ ka a shia kanna ti kpɛri bɛ ni, ka bɛ leeri a ni nam shɛba; ka a ti tiŋgbani nyɛvil’ palli.

³¹Yawɛ, chɛ ka a jilima kul be sahakam. Yawɛ, chɛ ka a suhu piɛl’ a tuma zuɣu.

³²Nyini n-nyɛ ŋun lihiri tiŋgbani ka di sɔhiri ŋɔ. Nyini n-nyɛ ŋun shihi zoya, ka di tuɣiri nyɔhi.

³³N ni yiini yila paɣiri Yawɛ hal ni n nyɛvili tariga; n ni kul be ŋɔ, n ni yiini yila paɣiri n Naawuni.

³⁴Chɛ ka n jɛma tiɣ’ a nini, dama m mali suhupiɛlli Yawɛ zuɣu.

³⁵Kpihimmi alahichinim’ birili dunia ni, ka chɛ ka ninvuɣ’ biɛri ku lan beni. M paɣiri Yawɛ n suhu ni! Paɣimiya Yawɛ!