Read Dagbani Yila 106 Bible Online

Yila 106 - Dagbani bible

Yila 106

¹ Paɣimiya Yawɛ! Puhimiya Yawɛ, dama o nyɛla ŋun viɛla, ka o yurilim maŋli bi naara.

²Ŋuni n-lee ni tooi wuhi Yawɛ ni pun tum tuun’ kar’ shɛŋa tariga? Ka ŋuni n-lee ni tooi puh’ o ka di saɣi?

³Ninvuɣ’ shɛb’ bɛn niŋdi din tuhi, ka tumdi wuntia tuma sahakam mali alibarika.

⁴Yawɛ, saha shɛli a yi ti niŋ a niriba nirilim, nyin’ teemi n yɛla; saha shɛli a yi ti tiligi ba, nyin’ sɔŋm’ ma,

⁵ka lala zuɣu chɛ ka m pah’ a ninvuɣ’ gahinda maa zuɣu tɔŋ, ka pah’ a zuliya zuɣu nya suhupiɛlli, ka pah’ a niriba zuɣu tibig’ a.

⁶Ti mini ti yaannim’ zaa tum alahichi. Ti nyɛla ninvuɣ’ biɛri, ka tum tuumbiɛri.

⁷ Ti yaannim’ maa ni daa be Ijipti saha shɛl’ la, bɛ baɣa daa ka a daalahiziba tuma ni. Bɛ daa tam a yurilim maŋli din galisi la yɛla, ka daa taai duŋ niŋ nyin’ Kpiɔŋlan’ Naa ŋɔ Teeku Ʒiɛɣu ni.

⁸Amaa di zaa yoli, a daa tiligi ba a yuli zuɣu, ni lala chɛ ka a wuh’ a yiko tuma ni nyɛ shɛm.

⁹A daa tahi Teeku Ʒiɛɣu zuɣu ka di kom vuui; ka chɛ ka bɛ no tiŋkuŋ zuɣu kaman tiŋgban’ nɛl’ la du.

¹⁰A daa fa ba bɛn je ba nuu ni bahi; ka tiligi ba bɛ dimnim’ nuu ni.

¹¹Kom daa lim bɛ dimnim’ maa, ka bɛ ni yino gba daa bi tiligi.

¹² Di saha ka bɛ daa niŋ a daalikaulinim’ yɛda, ka yili yila paɣ’ a.

¹³Amaa di daa bi yuui ka bɛ tam a tuma maa yɛla, ka daa bi guhi n-deeg’ a wuhibu.

¹⁴Bɛ daa dolila bɛ kɔribiɛri soli mɔɣu maa ni, ka daa buɣisi Naawuni ni bɛ nya tiŋgban’ nɛli maa ni.

¹⁵ Ka o daa ti ba bɛ ni suhi shɛli, amaa ka daa chɛ ka dɔr’ biɛri gbahi ba.

¹⁶Bɛ daa zab’ Musa nyuli bɛ sansan’ ni, ka zab’ Aduna ŋun daa nyɛ Yawɛ ninvuɣ’ kasi la gba nyuli.

¹⁷Tiŋgbani daa bɔɣiya m-mum Datan, ka pi Abiram min’ o nyaandoliba.

¹⁸ Ka buɣim daa taai bɛ salo maa sunsuuni n-di ninvuɣ’ biɛri.

¹⁹Bɛ daa mali salima naɣibila n-zali Sinai Zoli gbini; ka daa jɛm salima binnani.

²⁰Bɛ daa zaŋ bɛ jilima n-taɣi naɣibil’ ŋun ŋubiri mɔri kɔtomsi.

²¹Bɛ daa tam Naawuni ŋun nyɛ bɛ tiligira, ka lan nyɛ ŋun daa tum tuun’ kara Ijipti la yɛla.

²²O daa lan tum alahiziba tuma Ham tiŋgbɔŋ ni, ka daa lan tum tuun’ shɛŋa din mali dabiɛm Teeku Ʒiɛɣu ni.

²³ Dinzuɣu ka o daa yɛli ni o ni ku ba, ka Musa ŋun nyɛ o ninvuɣ’ gahindili daa zan’ o tooni n-taɣ’ o ni o maag’ o suhu; ka o ku ku ba.

²⁴Di nyaaŋa bɛ daa bi niŋ o daalikauli yɛda, ka daa ʒiɛm tiŋgbɔn viɛlli maa.

²⁵Bɛ daa bela bɛ suɣa ni ŋ-ŋumdi bɛ kparima ni, ka zaɣisi Yawɛ yɛligu.

²⁶ Dinzuɣu ka o daa kpuɣ’ o nuu zuɣusaa, ka po ni o ni chɛ ka bɛ kpi yɔɣu maa ni,

²⁷ ka chɛ ka bɛ bihi kpi tinzun’ tinsi ni, ka wurim ba ka bɛ chaŋ ti be tinduya ni.

²⁸Di saha ka bɛ daa zaŋ bɛmaŋ’ ti tabili Pɛɔr tiŋgbɔŋ ni Baal, ka diri kpiimba maligu nimdi.

²⁹Bɛ daa chɛ ka bɛ tuma yiɣisi Yawɛ suhu, ka o daa chɛ ka alɔbo lu bɛ zuɣu.

³⁰Di saha ka Finɛhas daa yiɣisi zani n-tim sandaani ka alɔbo maa chɛ.

³¹ Ka di zuɣu daa chɛ ka bɛ wuhi ni o nyɛla wuntizɔra ʒiɛmani kam ni.

³²Mɛriba kom la gbini bɛ daa chɛ ka Yawɛ suhu yiɣisi pam, ka yɛla daa paai Musa bɛ zuɣu.

³³ Dama bɛ daa chɛ ka o suhu miligi, ka o yɛli yɛtɔɣ’ shɛŋa din bi simdi.

³⁴Bɛ daa bi ku niriba maa zaa kaman Yawɛ ni daa zali ba ni bɛ niŋ shɛm.

³⁵Amaa bɛ daa zaŋla bɛmaŋ’ bali niriba maa ni n-niŋdi bɛ ni niŋdi shɛm.

³⁶ Bɛ daa jɛm bɛ wuna, ka di daa leei zana gbahi ba.

³⁷ Bɛ daa zaŋ bɛ bidibisi mini bɛ bipuɣinsi n-kɔri ba ti alizinnima.

³⁸ Bɛ daa yihi bɛ bidibisi mini bɛ bipuɣinsi bɛn bi tum taali ʒim, bɛ daa kɔri ba m-mal’ la Keenan wuna; ka bɛ ʒim maa daa ta tiŋgbɔŋ maa daɣiri.

³⁹Lala ka bɛ daa niŋ ta bɛmaŋ’ daɣiri bɛ tumtumsa ni, ka bɛ tuma maa zuɣu daa chɛ ka bɛ bi ʒe yim.

⁴⁰Dinzuɣu ka Yawɛ suhu daa yiɣisi pam bah’ o niriba maa zuɣu, ka o daa zaɣis’ o ni su ninvuɣ’ shɛb’ maa.

⁴¹O daa zaŋ ba niŋ zuliya shɛb’ nuu ni, ka ninvuɣ’ shɛb’ bɛn je ba su ba.

⁴²Ka bɛ dimnim’ maa daa nahim ba pam, ka zaŋ bɛ yiko su ba.

⁴³Siɣimsiɣim bushɛm ka o daa fa ba bahi, amaa ka bɛ daa yi o nyaaŋa, ka bɛ daalahichi daa chɛ ka bɛ nya filiŋ.

⁴⁴Amaa ka o daa nya bɛ nandahima maa, ka wum bɛ fabila.

⁴⁵Bɛ zuɣu ka o daa teeg’ o daalikauli la yɛla, ka daa taɣi o tɛha o yurilim maŋli la zuɣu.

⁴⁶ Ka o daa chɛ ka bɛ ni nyɛ daba ninvuɣ’ shɛb’ nuu ni zaa daa zo ba nambɔɣu.

⁴⁷Yawɛ ŋun nyɛ ti Naawuni ŋɔ, tiligim ti, ka yihi ti zuliya kam ni na n-laɣim luɣ’ yini, ka ti paɣ’ a yuli din be kasi ŋɔ, ka ti a jilima ti paɣibu maa puuni.

⁴⁸ Paɣimiya Yawɛ ŋun nyɛ Izraɛl Naawuni ŋɔ, pumpɔŋɔ zaŋ hal ni saha din ka bahigu. Sokam yɛlima, Ami! Paɣimiya Yawɛ!