Read Dagbani Yila 107 Bible Online

Yila 107 - Dagbani bible

Yila 107

¹ “Paɣimiya Yawɛ, dama o nyɛla ŋun viɛla, ka o yurilim maŋli bi naara!”

²Chɛ ka Yawɛ ni tiligi ninvuɣ’ shɛb’ zaa yɛli lala, bɛna n-nyɛ o ni tiligi shɛb’ muɣisigu ni,

³ka yihi ba tiŋgbɔn’ shɛŋa ni, wulimpuhili polo mini wulinluhili polo ni nuzaa polo ni nudirigu polo na la.

⁴Shɛb’ daa bela tiŋgban’ nɛl’ ni n-dari ginda, ka bi nya tiŋ’ ʒiina.

⁵Kum mini kɔnyuri n-daa yɛn ku ba, hal ka bɛ daa ti yihi tahima.

⁶Bɛ wahala maa puuni ka bɛ daa suhi Yawɛ, ka o daa yihi ba bɛ nandahima maa ni.

⁷O daa zaŋ ba doli soli din tuhi hal ti paai bɛ ni yɛn ʒini tin’ shɛl’ ni.

⁸Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

⁹O tiri kɔnyuri ni mali ninvuɣ’ shɛb’ kom, ka tiri kum ni mali ninvuɣ’ shɛb’ bindir’ suma.

¹⁰Shɛb’ daa ʒila zibisim mini bumbɔn’ ni, ka nyɛ sarikanima, ka bɛ ba ba bandi ʒili ka bɛ diri wahala,

¹¹bɛ ni daa zaɣisi Naawuni yɛligu, ka lihi ʒiɛm ŋun’ Zallakudura Naa wuhibu la zuɣu.

¹²Ka o daa chɛ ka bɛ tum tuun’ kpɛma. Bɛ daa tuui lu ka kɔŋ ŋun ni sɔŋ ba.

¹³Di saha ka bɛ daa suhi Yawɛ bɛ wahala maa puuni, ka o daa tiligi ba bɛ nandahima maa ni.

¹⁴O daa yihi ba bumbɔni mini zibisim ni, ka kabi bɛ bandi.

¹⁵Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

¹⁶O kabiri daanya dunoyɔriti ka kabiri kuriti dunokparitisi.

¹⁷Shɛb’ daa nyɛla jɛra n-tum tuumbiɛri, ka daa di wahala bɛ tuumbiɛri maa zuɣu.

¹⁸Bɛ daa je bindirigu kam; di daa chɛ biɛla ka bɛ kpi.

¹⁹Di saha ka bɛ daa suhi Yawɛ bɛ wahala maa puuni, ka o daa yihi ba bɛ nandahima maa ni.

²⁰O daa tim o yɛligu na ti tib’ ba, ka daa yihi ba kum ni.

²¹Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

²²Chɛ ka bɛ mali wumpaɣibo sara, ka yili suhupiɛlli yila yɛl’ o tuma yɛla.

²³Shɛb’ daa zaŋla ŋariŋ kara n-kpe teeku puuni nti tumdi daabiligu tuma ko’ titali maa ni.

²⁴Bɛ nini daa nya Yawɛ tuma din nyɛ o daalahiziba tuma la teeku bulli maa ni.

²⁵Dama o daa zali zaligu n-chɛ ka sanʒiɛɣu yiɣisi n-kpuɣi teeku kɔgbana zuɣusaa.

²⁶Bɛ daa yiɣi du zuɣusaa ha n-lab’ ti lu bulli ni, ka dabiɛm daa kpe ba bɛ barina maa puuni.

²⁷Bɛ daa ʒiɛhira ka jeeni kaman ninvuɣ’ shɛb’ bɛn nyu dam kuli, ka bɛ yɛm zaa daa naai la.

²⁸Di saha ka bɛ daa suhi Yawɛ bɛ wahala maa puuni, ka Yawɛ daa yihi ba bɛ nandahima maa ni.

²⁹O daa chɛ ka sanʒiɛɣu maa chɛ ʒiɛbu, ka teeku kɔgbana daa fo n-dɔni baalim.

³⁰Ka bɛ suhuri daa paligi di ni daa fo n-dɔni baalim maa zuɣu, ka o daa zaŋ ba na ti zali bɛ ni bɔri ni bɛ zani kulino’ shɛl’ ni.

³¹Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

³²Chɛ ka bɛ tibig’ o niriba laɣiŋgu ni, ka paɣ’ o kpamba laɣiŋgu ni.

³³O daa chɛ ka mɔɣa leei tiŋgban’ nɛli doya, ka chɛ ka kɔbil’ nina kuui.

³⁴O daa chɛ ka tiŋgbani din vuhiri leei wubilim tiŋgbani, ninvuɣ’ shɛb’ bɛn be nimaani ninvuɣ’ biɛtali zuɣu.

³⁵O daa chɛ ka kom puhigi zɔri tiŋgban’ nɛl’ ni, ka chɛ ka kom puhiri yiri tiŋgban’ kuŋ ni na.

³⁶O daa chɛ ka kum ni mali ninvuɣ’ shɛb’ me bɛ tiŋ’ ʒini nimaani.

³⁷Bɛ daa koya m-biri bimbira ka sa tihi, ka di daa niŋ, ka tihi maa gba daa wali pam.

³⁸Ka o daa niŋ alibarika niŋ bɛ ni, ka bɛ nab’ pam, ka bi chɛ ka bɛ biŋkɔbiri filim.

³⁹Ka nahiŋgu mini wahala ni suhugarigu daa ti chɛ ka bɛ filim,

⁴⁰ka o daa dihi bɛn nahindi ba vi, ka chɛ ka bɛ dari gindi tiŋgban’ nɛl’ ni.

⁴¹Amaa ka o daa yihi nandaamba bɛ nandahima ni, ka chɛ ka bɛ malibu nabi kaman biŋkɔbbaligu la.

⁴²Ka wuntizɔriba daa nya li ka bɛ suhuri paligi, amaa ka ninvuɣ’ biɛri daa fo bɛ noya.

⁴³Ŋunkam mali yɛm, ŋun’ wummi dimbɔŋɔnim’ viɛnyɛliŋga, ka tɛhi Yawɛ yurilim maŋli ŋɔ yɛla.