Read Dagbani Yila 118 Bible Online

Yila 118 - Dagbani bible

Yila 118

¹ Paɣimiya Yawɛ dama o nyɛla ŋun viɛla, ka o yurilim maŋli bi naara.

²Izraɛlnima, yɛlimiya, “O yurilim maŋli bi naara.”

³Aduna zuliya, yɛlimiya, “O yurilim maŋli bi naara.”

⁴Ninvuɣ’ shɛb’ bɛn zɔri Yawɛ, yɛlimiya, “O yurilim maŋli bi naara.”

⁵M muɣisigu puuni, n daa suhi Yawɛ, ka o deei n suhigu, ka fa ma bahi.

⁶ Yawɛ be n sani, m bi zɔri dabiɛm. Bɔ ka ninsal’ ni tooi niŋ ma?

⁷Yawɛ bela n sani ni o sɔŋ ma. N ni di nasara bɛn je ma sani.

⁸Nir’ yi sɔɣi Yawɛ sani, di so ni a niŋ ninsalinim’ naani.

⁹Nir’ yi sɔɣi Yawɛ sani, di so ni a niŋ nabihi naani.

¹⁰Zuliya kam zaa teemi gili ma, amaa ka n nyaŋ ba Yawɛ yuli zuɣu!

¹¹Bɛ kul teemi gili ma luɣilikam zaa, amaa ka n nyaŋ ba Yawɛ yuli zuɣu!

¹²Bɛ kul bemi kaman shihi la n-gili n luɣilikam, ka ŋmaligi kpi yomyom kaman buɣim n-di gɔhi la, ka n nyaŋ ba Yawɛ yuli zuɣu!

¹³Bɛ daa daai ma la pam ka n yɛn lu, amaa ka Yawɛ daa sɔŋ ma.

¹⁴ Yawɛ n-nyɛ n kpiɔŋ ni n yaa; ŋuna n-nyɛ n tiliginsim.

¹⁵Nasara dibu suhupiɛlli yila be wuntizɔriba suɣa shee, “Yawɛ nudirigu n-tum tuun’ kara maa.

¹⁶Yawɛ nudirigu nya duhibu, Yawɛ nudirigu n-tum tuun’ kara maa.”

¹⁷N ku kpi, amaa n ni be, ka moli Yawɛ tuma yɛla.

¹⁸Yawɛ darigi n tibili pam, amaa o bi chɛ ka n kpi.

¹⁹Yoomi wuntitali dunoya ti ma, ka n dol’ li kpe nti puhi Yawɛ.

²⁰Yawɛ dunoli m-bɔŋɔ; wuntizɔriba kɔŋko n-ni tooi dol’ li kpe.

²¹M puhir’ a a ni deei n suhigu ka leei n tiligira ŋɔ zuɣu.

²² Kuɣ’ shɛli tammɛriba ni zaɣisi la, n-yipa leei kuɣ’ gahindili.

²³ Yawɛ niŋsim m-bala, ka di mali ti alahiziba.

²⁴Zuŋɔ nyɛla Yawɛ ni nam dabisi’ shɛli. Chɛliya ka ti suhuri paligi ka mali suhupiɛlli di ni.

²⁵ Yawɛ, ti suhir’ a, tiligim ti! Yawɛ, ti suhir’ a, tim ti nasara!

²⁶ Ŋum mali Yawɛ yuli kanna ŋɔ mal’ alibarika. Yawɛ jɛmbu duu ka ti be ka puhiri ya maa.

²⁷Yawɛ n-nyɛ Naawuni. O chɛ ka o neesim paai ti. Ŋahimiya tihi vari ka ti di chuɣu puhibu dari n-chaŋ ti gili sara maligu bimbini.

²⁸Nyini n-nyɛ n Naawuni; n ni paɣ’ a. Nyini n nyɛ n Naawuni; n ni tibig’ a.

²⁹Paɣimiya Yawɛ, dama o nyɛla ŋun viɛla; ka o yurilim maŋli kul beni sahakam.