Read Dagbani Yila 119 Bible Online

Yila 119 - Dagbani bible

Yila 119

¹Ninvuɣ’ shɛb’ bɛn doli Yawɛ zaligu, ka ka galimi bɛ biɛhigu ni mali alibarika.

²Ninvuɣ’ shɛb’ bɛn dol’ o zaligunima, ka jɛmd’ o ni bɛ suhuri zaa mali alibarika.

³Ninvuɣ’ shɛb’ bɛn dol’ o soya, ka bi tum taali gba mali alibarika.

⁴A zal’ a zaligunima ni niriba dol’ li viɛnyɛliŋga.

⁵N yuya ni n ʒe yim n soya ni, ka lala chɛ ka n tooi dol’ a zaligunima!

⁶N yi zaŋ n zaɣa niŋ a zaligunim’ maa zaa ni, n ku di vi.

⁷N yi baŋ a wuntia zaligunim’ maa, n ni paɣ’ a ni suhu yini.

⁸N ni dol’ a zaligunima; di chɛ ma bahi zaa.

⁹Wula ka bipala lee yɛn niŋ n-chɛ ka bɛ soya be kasi? A yɛligu ni wuhi shɛm ka bɛ ni doli n-chɛ ka di be kasi.

¹⁰N jɛmd’ a mi ni n suhu zaa, di chɛ ka m birig’ a zaligunima.

¹¹A yɛligu ka n zaŋ sɔɣi n suhu ni, ni di chɛ ka n ku tum alahichi a sani.

¹²Yawɛ, m paɣir’ a; wuhim’ ma a zaligunima.

¹³N ni yaai n noli yɛli a zaligunim’ din yi a nol’ ni na zaa yɛla.

¹⁴N yur’ a zaligunim’ soli maa pam kaman n ni yuri azichi balibu kam shɛm.

¹⁵N ni bɔhim a zaligunim’ maa, ka zaŋ n zaɣa niŋ a soya ni.

¹⁶N ni yu’ a zaligunim’ maa; n ku tam a yɛligu yɛla.

¹⁷Niŋm’ mani a dabili ŋɔ zaɣ’ viɛlli, ka lala zuɣu chɛ ka m be, ka doli a yɛligu.

¹⁸Neemi n nina ka lala zuɣu chɛ ka n nya alahiziba binshɛŋa din be a zaligu puuni.

¹⁹N ŋmanila sana dunia ŋɔ ni; di zaŋ a zaligunim’ sɔɣi ma.

²⁰N suhu kul yɛla a zaligunim’ dolibu zuɣu sahakam.

²¹A kpahiri karimbaannim’ bɛn mali taali ka bi dol’ a zaligunim’ la zuɣu ni.

²²Yihim’ ma bɛ daansarisi mini bɛ ninvuɣ’ tubo ni, dama n dol’ a zaligunima.

²³Hal nanim’ ni laɣindi ʒiini lɔri nia biɛri zaŋ chaŋ m polo la zaa yoli, mani a dabili ŋɔ kul ni bɔhind’ a zaligunima.

²⁴N yur’ a zaligunim’ maa pam. Di nyɛla n saawaranima.

²⁵N tarigimi do tiŋa; tim’ ma nyɛvili palli kaman a yɛligu ni wuhi shɛm.

²⁶N kahigi n ni tum shɛlikam wuh’ a, ka a deei n suhigu; wuhim’ ma a zaligunima.

²⁷Wuhim’ ma a zaligunim’ maa soya ka m bɔhim baŋ a daalahiziba tuma.

²⁸Suhugarigu chɛmi ka n yɛma ŋma; kpaŋsim’ ma kaman a yɛligu ni wuhi shɛm.

²⁹Yihim’ ma yɔhiŋgu ni, ka niŋ ma nirilim n-wuhi ma a zaligunima.

³⁰M piila ʒiɛyimtali soli. N zaŋla a zaligunim’ zali n tooni.

³¹Yawɛ, n gbib’ a zaligunim’ viɛnyɛliŋga. Di chɛ ka n di vi.

³²N zɔri dolila a zaligunim’ soli, dama a yɛligi m baŋsim.

³³Yawɛ, wuhim’ ma a zaligunim’ soya, ka n dol’ li hal ni di tariga.

³⁴Tim’ ma baŋsim, ka n gbib’ a zaligu, ka dol’ li ni n suhu zaa.

³⁵Chɛ ka n dol’ a zaligunim’ soli, dama n suhu yuri li pam.

³⁶Ŋmaligim’ n suhu niŋ a zaligunim’ dolibu ni, ka chɛ azichi yoya bɔbu.

³⁷Di chɛ ka n lihiri binshɛŋa din ka buchi. Tim’ ma nyɛvili a soli zuɣu.

³⁸Kahigim’ a daalikauli din nyɛ bɛn lur’ a sizuura dini la wuhi mani ŋun nyɛ a dabili ŋɔ, ka n lu a sizuura.

³⁹Yihim’ ma vi shɛli n ni zɔri ni, dama a zaligunim’ viɛla.

⁴⁰N suhu kul yɛla a zaligunim’ zuɣu. A wuntitali puuni, tim’ ma nyɛvili.

⁴¹Yawɛ, chɛ ka a yurilim maŋli maa paai ma, ka tiligi ma kaman a daalikauli ni wuhi shɛm.

⁴²Di saha n ni tooi nya garigibu din ni garigi ninvuɣ’ shɛb’ bɛn maani ma ansarisi la, dama n niŋ a yɛligu naani.

⁴³Di yihi yɛlimaŋli n nol’ ni hal biɛla gba, dama n tahima bela a zaligunim’ ni.

⁴⁴N kul ni dol’ a zaligu sahakam.

⁴⁵N ni chani ni yolisim, dama m bo n-nya a zaligunima.

⁴⁶N ni tɔɣis’ a zaligunim’ maa yɛla nanim’ tooni, ka ku zo vi.

⁴⁷N nyari suhupiɛlli a zaligunim’ maa dolibu ni, dama n yuri li pam.

⁴⁸N tir’ a zaligunim’ din nyɛ n ni yuri shɛli maa jilima; n kul ni bɔhindi li.

⁴⁹Teem’ a ni daa yɛli mani a dabili ŋɔ shɛm, ka m mali tahima di zuɣu la yɛla.

⁵⁰A daalikauli nyɛla din tiri ma nyɛvili; dina n-nyɛ n suhu kpaŋsibo n wahala dibu puuni.

⁵¹Karimbaannim’ maani ma la ansarisi ka di ka yɛtɔɣa, amaa ka m bi ŋmaligi ka chɛ a zaligu maa dolibu.

⁵²Yawɛ, n yi tɛhi a zaligunim’ din yi kurimbuni na la yɛla, di kpaŋsirila n suhu.

⁵³Ninvuɣ’ biɛri yi zaɣis’ a zaligu dolibu di chɛrimi ka n suhu yiɣisi pam.

⁵⁴N yi be luɣ’ shɛlikam zaa, m malila a zaligunim’ maa yiini yila.

⁵⁵Yawɛ, n teer’ a yuli yɛla yuŋ, ka dol’ a zaligu.

⁵⁶N nyar’ alibarika a zaligunim’ maa dolibu zuɣu.

⁵⁷Yawɛ, nyini n-kul nyɛ n ni bɔri so; n lo alikauli ni n ni gbib’ a yɛligu.

⁵⁸N suh’ a ni n suhu zaa; zom’ ma nambɔɣu kaman a daalikauli ni wuhi shɛm.

⁵⁹N yi tɛh’ a soya yɛla, ŋ-ŋmaligirimi dol’ a zaligunim’ maa.

⁶⁰N ku guhi, n ni niŋ yomyom dol’ a zaligunim’ maa.

⁶¹Hal ninvuɣ’ biɛri ni bari ma zana la zaa yoli, n ku tam a zaligu maa yɛla.

⁶²N yiɣisirila yuntisuɣu m-paɣir’ a, a wuntia zaligunim’ maa zuɣu.

⁶³N nyɛla ninvuɣ’ shɛb’ bɛn zaa zɔr’ a mini ninvuɣ’ shɛb’ bɛn zaa dol’ a zaligunim’ maa zo.

⁶⁴Yawɛ, a yurilim maŋli la n-kul pali dunia ŋɔ zaa. Wuhim’ ma a zaligunim’ maa.

⁶⁵Yawɛ, niŋm’ mani ŋun nyɛ a dabili ŋɔ zaɣ’ viɛlli kaman a yɛligu ni wuhi shɛm.

⁶⁶Tim’ ma yɛm mini baŋsim, dama n niŋ a zaligunim’ yɛda.

⁶⁷A ni daa na bi darigi n tibili la, n daa birigiya; amaa pumpɔŋɔ n dol’ a yɛligu.

⁶⁸A nyɛla Naawuni suŋ, ka tumdi din viɛla; wuhim’ ma a zaligunima.

⁶⁹Karimbaannim’ kul ŋmarila ʒiri pari ma, amaa n dolila a zaligunim’ ni n suhu zaa.

⁷⁰Bɛ nyɛla halibiɛrinima, amaa man’ yur’ a zaligunim’ pam.

⁷¹A ni daa darigi n tibili maa, di viɛla. Di ni chɛ ka m baŋ a zaligunim’ maa yɛla.

⁷²A zaligu din yi a nol’ ni na nyɛla bin’ viɛlli n sani gari salima mini anzinfa kpila tusa shɛm.

⁷³A nuhi ka a daa zaŋ nam ma, tim’ ma yɛm, ka m baŋ a zaligunima.

⁷⁴Chɛ ka ninvuɣ’ shɛb’ bɛn zɔr’ a nya ma ka mali suhupiɛlli, dama m mali tahima a yɛligu ni.

⁷⁵Yawɛ, m mi ni a saria karibu nyɛla din tuhi. Ʒiɛyimtali puuni ka a daa darigi n tibili maa.

⁷⁶Chɛ ka a yurilim maŋli la ti ma suhumahili kaman a ni lo mani a dabili ŋɔ alikauli shɛm la.

⁷⁷Zom’ ma nambɔɣu, ka m be, dama n suhu yu a zaligunim’ maa pam.

⁷⁸Chɛ ka karimbaannim’ di vi bɛ ni ŋmari ʒiri pari ma la zuɣu, amaa n kul ni tɛhir’ a zaligunim’ maa yɛla.

⁷⁹Chɛ ka ninvuɣ’ shɛb’ bɛn zɔr’ a ka mi a zaligunim’ ka n sanna.

⁸⁰Di chɛ ka m mali galimi n suhu ni zaŋ chaŋ a zaligunim’ maa polo, ka lala zuɣu ni chɛ ka n ku di vi.

⁸¹N suhu kul yɛla a tiliginsim zuɣu hal ti tarigi; amaa m mali tahima a yɛligu ni.

⁸²N lihila a daalikauli soli hal ka n nina ti fulim; ka m bɔhira, “Ka bɔ saha ka a yɛn kpaŋsi n suhu?”

⁸³Dama n leela ŋun ka buchi kaman wain koligu din yili nyɔhi ni; amaa m bi tam a zaligunim’ yɛla.

⁸⁴A dabili yɛn guhi hal ti paai bɔ saha? Bɔ saha ka a yɛn darigi ninvuɣ’ shɛb’ bɛn niŋdi ma alaka la tibili?

⁸⁵Karimbaannim’ gbi ma la bɔɣ’ biɛri. Bɛ maanila a zaligu ansarisi.

⁸⁶A zaligunim’ nyɛla yɛlimaŋli. Niriba nahindi ma ka di ka soli. Sɔŋm’ ma!

⁸⁷Bɛ loya ni bɛ yihi ma la dunia ŋɔ ni, amaa m bi zaɣis’ a zaligunim’ maa.

⁸⁸A yurilim maŋli la puuni, tiligim’ ma, ka n dol’ a zaligunim’ din yi a nol’ ni na maa.

⁸⁹Yawɛ, a yɛligu kul ni beni sahakam. Di nyɛla din kul ba n-ʒe alizanda ni sahakam.

⁹⁰A ʒiɛyimtali kul ni be ʒiɛmani kam ni. Nyini n-daa nam dunia ŋɔ, ka di mi kul ni beni sahakam.

⁹¹A zaligu zuɣu ka binshɛɣukam beni zuŋɔ, dama binshɛɣukam zaa nyɛla a daba.

⁹²A zaligu maa yi di pala n suhu ni yu shɛli, n naan bahi yoli n nandahima ŋɔ ni.

⁹³N kul ku tam a zaligunim’ maa yɛla; dama di zuɣu ka a ti ma nyɛvili.

⁹⁴N nyɛla a ni su so. Tiligim’ ma, dama n loya ni n dol’ a zaligunim’ maa.

⁹⁵Ninvuɣ’ biɛri sɔɣimi doya gu ma ni bɛ ku ma; amaa a zaligunim’ maa yɛla ka man’ kul tɛhira.

⁹⁶M pun nya ka binshɛɣukam zaa viɛlim malila tariga, amaa a zaligunim’ din’ viɛlim nyɛla din ka tariga.

⁹⁷N yuri a zaligu pam! N kul tɛhirila di yɛla dabisili kam.

⁹⁸A zaligunim’ maa chɛ ka m mali yɛm gari n dimnima, dama di kul bela n suhu ni.

⁹⁹M mali baŋsim gari n karimbanima, dama n kul tɛhirila a zaligunim’ maa yɛla.

¹⁰⁰M mali baŋsim gari ninkura, dama n kul gbibila a zaligunim’ maa.

¹⁰¹N gbaala mmaŋ’ ni so’ biɛɣu kam dolibu, ni di chɛ ka n tooi gbib’ a yɛligu.

¹⁰²M bi chɛ a zaligu shɛŋa dim pahi la dolibu, dama nyini n wuhi ma li.

¹⁰³A yɛtɔɣa nyaɣisi pam n sani, hal di nyaɣisi n nol’ ni pam gari shiri!

¹⁰⁴N nyari baŋsim a zaligunim’ maa puuni, dinzuɣu n je ʒiri soli kam.

¹⁰⁵A yɛligu nyɛla n naba firila mini n soli neesim.

¹⁰⁶M pola pɔri ka ʒe di nyaaŋa ni n dol’ a wuntia zaligunim’ la.

¹⁰⁷Yawɛ, n nya wahala pam. Dolimi n nyɛvili kaman a ni daa lo ma alikauli shɛm la.

¹⁰⁸Yawɛ, deemi n wumpaɣibo pini ŋɔ, ka wuhi ma a zaligunim’ la.

¹⁰⁹N nyɛvili kul bela barina ni sahakam, amaa m bi tam a zaligu maa yɛla.

¹¹⁰Ninvuɣ’ biɛri bari ma la zana, amaa m bi birigi a zaligunim’ maa.

¹¹¹A zaligunim’ maa nyɛla n fali sahakam. Dina n-tiri ma suhupiɛlli.

¹¹²N lo n suhu ni ni n ni dol’ a zaligunim’ maa sahakam.

¹¹³N je ninvuɣ’ shɛb’ bɛn mali tɛha buyiyi, amaa n yur’ a zaligu dina.

¹¹⁴Nyini n-nyɛ n daashili sɔɣibu shee ni n nyɔtaɣirigu; m mali tahima a yɛligu ni.

¹¹⁵Yinim’ tuumbiɛtumdiba ŋɔ zomiya ka chɛ ma; ka n doli n Naawuni zaligunima.

¹¹⁶Gbib’ ma kaman a ni lo alikauli shɛm la, ka m be. Di chɛ ka n di vi n tahima niŋbu ni.

¹¹⁷Gbib’ ma ka n tiligi, ka kul dol’ a zaligunim’ sahakam.

¹¹⁸A je ninvuɣ’ shɛb’ bɛn zaɣis’ a zaligunim’ dolibu. Bɛ yɔhiŋgu soya nyɛla yoli.

¹¹⁹A niŋdi ninvuɣ’ biɛri kaman saɣiri la, dinzuɣu ka n yur’ a zaligunima.

¹²⁰N zɔr’ a mi, ka n ni sɔhira, ka zɔr’ a saria karibo.

¹²¹N tum din nyɛ yɛlimaŋli ni din tuhi. Di chɛ ma ti ninvuɣ’ shɛb’ bɛn nahindi ma.

¹²²Lom’ mani ŋun nyɛ a dabili ŋɔ alikauli ni a ni gbib’ ma viɛnyɛliŋga. Di chɛ ka karimbaannim’ nahim’ ma.

¹²³N lihila a tiliginsim min’ a ni lo ma alikauli maŋli shɛl’ la soli hal ka n nina ti fulim.

¹²⁴Niŋm’ mani ŋun nyɛ a dabili ŋɔ kaman a yurilim maŋli la ni nyɛ shɛm, ka wuhi ma a zaligunima.

¹²⁵N nyɛla a dabili; tim’ ma baŋsim, din ni chɛ ka m baŋ a zaligunima.

¹²⁶Saha paaya ni nyin’ Yawɛ niŋ shɛli, dama niriba saɣim a zaligu.

¹²⁷Yɛlimaŋli, n yur’ a zaligunim’ maa gari salima din viɛlli pam.

¹²⁸Yɛlimaŋli, n kul dol’ a zaligunim’ maa zaa. N je ʒiri soli kam.

¹²⁹A zaligunim’ viɛli pam, dinzuɣu ka n dol’ li n suhu ni.

¹³⁰A yɛligu baŋbu nyɛla din tiri neesim. Di chɛmi ka tarim nyari baŋsim.

¹³¹N kul yɛla n noli vuhiri nyahigira, dama n suhu kul yɛla a zaligunim’ maa zuɣu.

¹³²Ŋmaligim’ m polo na zo ma nambɔɣu kaman a ni pun niŋdi ninvuɣ’ shɛb’ bɛn yur’ a yuli shɛm la.

¹³³Chɛ ka n naba yaabu doli soli ka n chani kaman a yɛligu ni wuhi shɛm, ka di chɛ ka tuumbiɛri nyaŋ ma.

¹³⁴Tiligim’ ma ninsalinim’ nahiŋgu ni, ka n dol’ a zaligunima.

¹³⁵Chɛ ka a ninni neesim neei niŋ man’ ŋun nyɛ a dabili ŋɔ, ka wuhi ma a zaligunima.

¹³⁶N nintam kul zɔrimi, niriba ni bi dol’ a zaligunim’ maa zuɣu.

¹³⁷Yawɛ, a nyɛla wuntialana ka a saria karibu nyɛ din tuhi.

¹³⁸Wuntia puuni ka a daa zal’ a zaligunim’ maa ni ʒiɛyimtali zaa.

¹³⁹Biɛrim yɛn ti ma la daŋa, n dimnim’ ni tam a yɛligu yɛla zuɣu.

¹⁴⁰A daalikaulinim’ nyɛla alikauli maŋa! Ka mani a dabili ŋɔ yuri li.

¹⁴¹N nyɛla ŋun pɔra ka bɛ ʒiɛm ma, amaa m bi tam a zaligunim’ yɛla.

¹⁴²A wuntitali nyɛla wuntitali din bi naara, ka a zaligunim’ nyɛ yɛlimaŋli.

¹⁴³Wahala mini nandahima m-mali ma, amaa a zaligunima n-nyɛ n suhu ni yu shɛli.

¹⁴⁴A zaligunim’ kul nyɛla din tuhi sahakam. Tim’ ma baŋsim din ni chɛ ka m be.

¹⁴⁵Yawɛ, n kul kuhirimi ni n suhu zaa, garigim’ ma, n ni dol’ a zaligunima.

¹⁴⁶Nyin’ ka n kuhiri niŋda. Tiligim’ ma, ka n dol’ a zaligunima.

¹⁴⁷N yiɣisirila nolɔɣu kukoli saha n kumdi niŋd’ a, n zaŋ n tahima niŋla a yɛligu ni.

¹⁴⁸N kul nɛla yuŋ zaa ni di chɛ ka m bɔhim’ a daalikaulinim’ yɛla.

¹⁴⁹A yurilim maŋli la puuni, deemi n suhigu. Yawɛ, dolimi n nyɛvili kaman a ni lo ma alikauli shɛm.

¹⁵⁰Ninvuɣ’ shɛb’ bɛn niŋdi ma alaka ka mali nia biɛri la mirina. Bɛ nyɛla ninvuɣ’ shɛb’ bɛn be katiŋa ka chɛ a zaligu.

¹⁵¹Yawɛ, amaa a miri ma, ka a zaligunim’ zaa nyɛla yɛlimaŋli.

¹⁵²M bɔhim din be a zaligunim’ puuni ka di wɔɣa, ni a zal’ li mi ni di kul be sahakam.

¹⁵³Nyam’ n wahala ŋɔ, ka tiligi ma, dama m bi tam a zaligu yɛla.

¹⁵⁴Zabimi n zuɣu n-tiligi ma. Dolimi n nyɛvili kaman a ni lo ma alikauli shɛm.

¹⁵⁵Ninvuɣ’ biɛri mini tiliginsim shee waɣ’ pam, dama bɛ bi bɔri a zaligunima.

¹⁵⁶Yawɛ, a nambɔzɔbo galisiya pam. Dolimi n nyɛvili kaman a yɛlimaŋli biɛhigu ni nyɛ shɛm.

¹⁵⁷N dimnim’ mini bɛn nahindi ma galisiya pam, amaa m bi chɛ a zaligunim’ dolibu.

¹⁵⁸Ninvuɣ’ shɛb’ bɛn bi ʒe yim, m mihirila n ninni niŋdi ba, bɛ ni bi dol’ a zaligunim’ maa zuɣu.

¹⁵⁹Nyam’ n ni yur’ a zaligunim’ maa shɛm. Yawɛ, a yurilim maŋli la zuɣu, dolimi n nyɛvili.

¹⁶⁰A yɛligu nyɛla yɛlimaŋli zaa, ka a wuntia zaligunim’ zaa nyɛla din kul ni be sahakam.

¹⁶¹Zuɣulaannim’ kul nahindi ma mi ka di ka soli, amaa n kul lurila a yɛligu sizuura n suhu ni.

¹⁶²N kul malila suhupiɛlli a yɛligu zuɣu kaman ninvuɣ’ so ŋun ŋme n-di nɛma pam.

¹⁶³N je ʒiri, ka zaɣisi li, amaa n yur’ a zaligu.

¹⁶⁴Siɣimsiɣim buyopɔin ka n paɣir’ a dahin yini, a wuntia zaligunim’ la zuɣu.

¹⁶⁵Ninvuɣ’ shɛb’ bɛn yur’ a zaligunim’ mali suhudoo pam; ka binshɛli ku chɛ ka bɛ tuui lu.

¹⁶⁶Yawɛ, n kul guhirila a tiliginsim, ka dol’ a zaligunima.

¹⁶⁷N dol’ a zaligunima, dama n yuri li pam.

¹⁶⁸N dol’ a zaligunim’ min’ a wuhibu, dama a mi n soya zaa.

¹⁶⁹Yawɛ, chɛ ka n fabila paag’ a sanna. Tim’ ma baŋsim kaman a ni pun lo ma alikauli shɛm.

¹⁷⁰Chɛ ka n suhigu paag’ a sanna ka a tiligi ma kaman a ni pun lo ma alikauli shɛm.

¹⁷¹N kul ni paɣir’ a, dama a wuhi ma a zaligunima.

¹⁷²N kul ni yiini yila yɛr’ a yɛligu yɛla, dama a zaligunim’ zaa nyɛla din tuhi.

¹⁷³Kul sɔŋm’ ma, dama m piila a zaligunima.

¹⁷⁴Yawɛ, n suhu kul yɛla a tiliginsim zuɣu, ka n suhu kul yu’ a zaligu.

¹⁷⁵Chɛ ka m be din ni chɛ ka m paɣir’ a, ka chɛ ka a zaligunim’ sɔŋ ma.

¹⁷⁶N kpɛla yɔɣu kaman piɛ’ so ŋun bɔrigi la. Bom’ mani ŋun nyɛ a dabili ŋɔ shee, dama m bi tam a zaligunim’ maa yɛla.