Read Dagbani Yila 140 Bible Online

Yila 140 - Dagbani bible

Yila 140

¹[119] Yawɛ, fam’ ma ninvuɣ’ biɛri nuu ni bahi; guli ma, ka duŋtaariba ku paai ma.

²Bɛ nyɛla bɛn lo nia biɛri bɛ suhuri ni, ka kul bɔrila zabili.

³ Bɛ chɛ ka bɛ zilima dirimi kaman tinvura zilima la, ka garinsi lɔɣu be bɛ noya ni.

⁴Yawɛ, guli ma ka yihi ma ninvuɣ’ biɛri nuu ni, Guli ma ka yihi ma duŋtaariba bɛn lo ni bɛ chɛ ka n lu la nuu ni.

⁵Karimbaannim’ bari ma la tɔŋ, ka teei bɛ mihi sɔŋ kaman laŋ’ la, bɛ bari ma la zana soli zuɣu.

⁶N yɛli Yawɛ, “Nyini n-nyɛ n Naawuni. Yawɛ, gbilisim’ tibili wum n suhigu.”

⁷Yawɛ ŋun nyɛ n Duuma ŋɔ, nyini n-nyɛ n kpiɔŋlan’ ŋun fari ma bahira. A zaŋ bini pili n zuɣu tɔbu tuhibu dali.

⁸Yawɛ, di chɛ ka ninvuɣ’ biɛri suhuyubu niŋ; di chɛ ka bɛ di nasara bɛ ni lo nia biɛ’ shɛŋa ni.

⁹Ninvuɣ’ shɛb’ bɛn gili ma la, chɛ ka bɛ noya ni yɛli yɛlibiɛ’ shɛŋa la lab’ ʒini bɛ zuɣu.

¹⁰Chɛ ka buɣim salinɛma lu bɛ zuɣu. Chɛ ka bɛ zaŋ ba bahi bɔɣ’ zilima ni, ka bɛ ku lan tooi yi di ni na.

¹¹Di chɛ ka munaafichinim’ be tiŋgbɔŋ maa ni. Chɛ ka zaɣ’ biɛɣu di bɛn yuri duŋ taabu pam!

¹²M mi ni Yawɛ baɣa be nandaamba ni, ka o zabiri faranim’ zuɣu.

¹³Yɛlimaŋli, wuntizɔriba ni paɣ’ a yuli; ninvuɣ’ shɛb’ bɛn be tibi ni ti be a sani.