Read Dagbani Yila 18 Bible Online

Yila 18 - Dagbani bible

Yila 18

¹[15] Yawɛ, Nyin’ ŋun nyɛ n kpiɔŋ ŋɔ, n yur’ a pam.

²Yawɛ n-nyɛ n tampiŋ mini n gooni din gili ma ni ŋun fari ma bahira. Ŋuna n-nyɛ n Naawuni ni n tampiŋ. Naawuni n-nyɛ n ni sɔɣiri so sani ni n nyɔtaɣirigu ni n tiliginsim yiligu ni m birini.

³N kuhi boli Yawɛ ŋun simdi paɣibu ŋɔ, ka tiligi n dimnim’ nuu ni.

⁴Kum mihi daa vili ma, ka kokpɛɣu din ni di nir’ varisi ma.

⁵Kpiimba biɛhigu shee mihi gbaai ma, ka kum zana do n tooni.

⁶Ka n daa kuhi boli Yawɛ m muɣisigu maa puuni; n daa kuhimi boli n Naawuni ni o sɔŋ ma. Ka n kuhigu maa daa chaŋ ti lu o tibili ni; ka o daa wum n kuhigu maa o jɛmbu duu puuni.

⁷Di saha ka tiŋgbani daa dam ka sɔhigi; ka zoya gbina ni gba sɔhigi ka dam, o suhu ni daa yiɣisi pam zuɣu.

⁸Ka nyɔhi daa yi o nyee ni na; ka buɣim niɛm din diri yi o nol’ ni na; ka sala buɣim niɛm yi o sanna.

⁹Ka o daa chɛ ka sagbana bɔɣi ka o siɣina, ka zibisim titali be o naba tiŋli.

¹⁰Ka o daa ba chɛrubi yiɣi; o daa bela pɔhim kpiŋkpama zuɣu n-kana yomyom.

¹¹O daa chɛ ka zibisim gil’ o; sagban’ tibisa din sabigi ka kom be di ni n-nyɛ o sampaa.

¹²Ka sagbana mini sakuɣa ni sala buɣim daa puhi yi neesim din be o tooni maa ni na.

¹³Di saha ka Yawɛ saa tahigu daa be zuɣusaa; ka Zallakudura Naa daa chɛ ka o kukoli yɛra.

¹⁴Ka o daa zaŋ o piɛma n-to n-wurim ba; ka chɛ ka o saa nyaɣisiri ginda.

¹⁵Di saha maa ka teeku puuni daa yi palɔni, ka tiŋgbani tanzaa daa yi palɔni. Yawɛ, a tahigu min’ a suhuyiɣisili tuma m-bala.

¹⁶Ka o daa be zuɣusaa ha, ka tirina gbaai ma n-voo’ ma yihi ko’ tital’ ni na.

¹⁷O daa fa ma n dim’ ŋun mali kpiɔŋ pam la mini bɛnkam zaa je ma la nuu ni bahi; dama bɛ daa mali kpiɔŋ gari ma.

¹⁸Bɛ daa kana nti liri ma la n ni daa be muɣisigu ni dahin’ shɛli; amaa ka n daa zaŋ mmaŋ’ dalim Yawɛ.

¹⁹O daa yihi ma na ti zali pal’ tital’ ni. O daa fa ma bahi, o nini ni daa tiɣ’ ma la zuɣu.

²⁰N wuntia biɛhigu laara ka Yawɛ daa ti ma maa; n ni ka galimi la samli ka o yo ma maa.

²¹Dama n doli Yawɛ zaligu; ka na ʒi m-birigi zaŋ chaŋ n Naawuni maa sani.

²²Dama o zaligunim’ zaa kul dola n tooni, ka n na ʒi n-zaɣis’ o zaligu shɛŋa din pahi la gba.

²³N ka galimi o sani; ka gbaai mmaŋa zaŋ chaŋ taali tumbu polo.

²⁴Dinzuɣu ka Yawɛ ti ma n wuntitali laara, n ni ka galimi o sani la zuɣu.

²⁵Ninvuɣ’ shɛb’ bɛn ʒe yim, a wuhiri ba ni a nyɛla ŋun ʒe yim; ka ninvuɣ’ shɛb’ bɛn ka galimi, a wuhiri ba ni a nyɛla ŋun ka galimi.

²⁶Ninvuɣ’ shɛb’ bɛn mali suhu yini, a wuhiri ba ni a nyɛla ŋun mali suhu yini; ka ninvuɣ’ shɛb’ bɛn nyɛ bilikɔɣinima, a nyɛla ŋun nyandi ba.

²⁷Dama a nyɛla ŋun fari tarimba bahira; amaa ka siɣisiri karimbaannima.

²⁸Nyini n-nyɛ ŋun nyo n firila. Yawɛ ŋun nyɛ n Naawuni ŋɔ n-chɛ ka neesim neei n zibisim ni.

²⁹A zuɣu, n ni tooi nyaŋ n dimnima. N Naawuni maa zuɣu, n ni tooi yiɣi yaɣi gooni.

³⁰Naawuni ŋɔ soya nyɛla din viɛl’ zaa! Yawɛ daalikauli nyɛla zaɣ’ maŋli. O nyɛla bɛnkam zo nti sɔɣ’ o sani nyɔtaɣirigu.

³¹Ŋuni n-lee nyɛ ti Naawuni ka pa ni Yawɛ? Ka ŋuni n-lee nyɛ ti tampiŋ pahi ti Naawuni ŋɔ zuɣu?

³²Ŋuna n-nyɛ Naawuni ŋun tiri ma kpiɔŋ, ka mali n soli ka di tuhi.

³³ Ŋuna n-chɛ ka n naba be kaman saŋkpaliŋ naba la, ka chɛ ka n du n-tam luɣ’ shɛŋa din du.

³⁴Ŋuna n-wuhi ma tɔbu tuhibu; ka chɛ ka n nuhi mali yaa din ni tooi zaŋ daanya tɔb’ to.

³⁵A ti ma a tiliginsim nyɔtaɣirigu, ka a nudirigu sɔŋ ma. A chɛ ka n leei ninvuɣ’ titali a sɔŋsim zuɣu.

³⁶A mali pal’ yɛlinli ti n naba, ka m bi sarigi.

³⁷N daa kari doli n dimnim’ hal ti gbahi ba; n daa bi chɛ ba dolibu hal ti ku bɛ zaa ha.

³⁸N daa ŋme ba luhi n naba ni, ka bɛ kɔŋ yiɣisibu.

³⁹Dama nyini n-ti ma kpiɔŋ ni n tuhi tɔbu; nyini n-chɛ ka n dimnim’ lu n naba ni.

⁴⁰A chɛ ka n dimnim’ ŋmaligi n sani guui, ka chɛ ka n ku bɛn je ma la.

⁴¹Bɛ daa kuhiya bɔri sɔŋsim, amaa ka so kani ŋun ni tiligi ba; ka bɛ daa kuhi boli Yawɛ, amaa ka o bi garigi ba.

⁴²Ka n daa bu n-nuɣisi ba kaman pɔhim ni ʒiɛri taŋkpa’ zim shɛli chana, ka n daa zaŋ ba labi kaman soli zuɣu baɣiri la.

⁴³Nyini n-nyɛ ŋun fa ma duŋtaariba nuu ni, ka chɛ ka n leei niriba naa; ka n ni ʒi ninvuɣ’ shɛb’ leei bɛn jɛmdi ma.

⁴⁴Tinzunnim’ luri ma la sizuura; ka man’ dee yi kul yɛli shɛlikam ka bɛ wum, bɛ deerila n noli.

⁴⁵Dabiɛm daa kul gbahila tinzunnim’ maa, ka bɛ yiri bɛ birininim’ ni zɔrina ka bɛ ni sɔhira.

⁴⁶Yawɛ nyɛla ŋun be! M paɣiri ŋuna ŋun nyɛ n tampiŋ maa! N kul ni tibigiri Naawuni ŋun nyɛ n tiliginsim maa.

⁴⁷Naawuni n-nyɛ ŋun bɔhi biɛri ti ma; ka nyaŋ ninvuɣ’ shɛb’ bɛn be n sulinsi ni ti ma.

⁴⁸Nyini n-fa ma n dimnim’ nuu ni bahi. Yɛlimaŋli, a duhi ma ka n gari n dimnima; ka yihi ma duŋtaariba nuu ni.

⁴⁹ Yawɛ, dimbɔŋɔ zuɣu, n ni paɣ’ a zuliya kam sani; ka yili yila paɣ’ a yuli.

⁵⁰Naawuni ti o naa nasara din galisi; ka wuhi yurilim maŋli ni nyɛ shɛm zaŋ chaŋ o ninvuɣ’ gahindili la polo; zaŋ chaŋ Dauda min’ o zuliya sani pumpɔŋɔ hal ni saha din ka bahigu.