Read Dagbani Yila 22 Bible Online

Yila 22 - Dagbani bible

Yila 22

¹[19] N Naawuni, n Naawuni, bɔ n-niŋ ka a zaŋ ma bahi? Bɔ n-niŋ ka a be katiŋ’ ka chɛ ma sɔŋbu n ŋuhigu yɛtɔɣa ŋɔ saha.

²N Naawuni, n kuhi bol’ a wuntaŋ’ ni, amaa ka a bi garigi ma; ka n kuhi bol’ a yuŋ, ka bi nya gom gbihi.

³Amaa nyini n-nyɛ ŋun be kasi, ka ʒi a nam ʒiishee, ka Izraɛlnim’ paɣir’ a.

⁴Nyin’ ka ti yaannim’ daa niŋ naani; ka bɛ ni daa niŋ a naani maa zuɣu daa chɛ ka a tiligi ba.

⁵Bɛ daa kuhi bol’ a, ka a fa ba bahi; bɛ daa niŋ a naani ka bi di vi.

⁶Amaa n ŋmanila zunzuli, ka pa ni ninsala; ka n tab’ ʒiɛm ma, ka niriba maani ma ansarisi!

⁷ Bɛnkam zaa nya ma kul maani ma la ansarisi; ka mɛrigiri bɛ noya niŋdi ma, ka viini bɛ zuɣuri niŋdi ma ka yɛra,

⁸ “Zaŋm’ a yɛla niŋ Yawɛ nuu ni; ka chɛ ka o tilig’ a. Chɛ ka o fa o nini ni tiɣi so bahi.”

⁹Amaa nyini n-daa yihi ma m ma pul’ ni na; nyini n-daa chɛ ka m mɔɣi m ma bihim baai.

¹⁰Bɛ ni dɔɣ’ ma dahin’ shɛli zaŋ na hal ni pɔŋɔ, nyini ka n zaŋ mmaŋ’ dalim, ka m ma ni dɔɣ’ ma hal ni zuŋɔ, nyini n-kul nyɛ n Naawuni.

¹¹Di be katiŋ’ ka chɛ ma, dama muɣisigu be yoma, ka so kani ŋun ni sɔŋ ma.

¹²Naɣilahi pam n-teei gili ma. Bashan naɣilahi bɛn mali kpiɔŋ n-kul teei gili ma.

¹³Bɛ yaala bɛ noya gu ma. Bɛ bemi kaman gbuɣinli ŋun bɔri ni o dari tɔhi ma, ka ŋumdi la.

¹⁴Bɛ kpaai ma mi bahi kaman kom la, ka n kɔbituɣa zaa miligimiligi; ka n suhu be kaman kpam din nyɛligi la n nyɔɣu ni.

¹⁵N yaa kuumi kaman salichee la, ka n zilinli chaŋ ti tabili n yɛno; a zaŋ ma sɔŋ la kum taŋkpaɣu ni.

¹⁶Bahi n-kul gili ma; tuumbiɛtumdiba pam n-teei gili ma. Bɛ malila binyara kuhiri n nuhi mini n naba.

¹⁷N kɔba zaa kul yimi paya. Bɛ kul kpaala bɛ nina kpa ma lihiri ma.

¹⁸ Bɛ to tɛte di m binyɛrigu, ka piri n situra ti taba.

¹⁹Yawɛ, di be katiŋ’ ka chɛ ma, n sɔŋda, kamina yomyom ti sɔŋ ma.

²⁰Tiligim’ ma takɔb’ kum ni, fam’ n nyɛvili baa nuu ni bahi.

²¹Fam’ ma gbuɣinli nol’ ni bahi! Fam’ ma yɔnaɣilahi yila ni bahi.

²² N ni yɛli m mabi’ dɔbba ni paɣiba a yɛla; N ni paɣ’ a a jɛmbu laɣiŋgu ni;

²³Yinim’ bɛn jɛmdi Yawɛ ŋɔ, paɣimiy’ o! Yinim’ bɛn zaa nyɛ Yaakubu zuliya ŋɔ, timiy’ o jilima! Yinim’ bɛn zaa nyɛ Izraɛl zuliya ŋɔ, lumiy’ o sizuura.

²⁴O na ʒi n-zaɣisi bee n-siŋ ninvuɣ’ so ŋun nyari nahiŋgu; bee n-chɛ ka o baɣa ka n ni. O mi bi lɛbir’ o nyaaŋa biriti ma, amaa n yi kuhi niŋ o bɔri sɔŋsim, o wumda.

²⁵A sani ka n ni paɣir’ a shɛm yirina a niriba laɣiŋgu tital’ ni; ka n ni mali n ni pun po pɔri ni m mali sara shɛli ninvuɣ’ shɛb’ bɛn lur’ a sizuura sani la.

²⁶Nandaamba ni ti di n-tiɣi; ka ninvuɣ’ shɛb’ bɛn jɛmdi Yawɛ ni paɣ’ o. Naawuni chɛ ka yi kul tɔŋdi sahakam.

²⁷Dunia ŋɔ luɣ’ shɛlikam nim’ zaa ni ti teei, ka ŋmaligi lab’ Yawɛ sanna, ka zuliya kam niriba zaa ni ti jɛm’ o.

²⁸Dama Yawɛ n-nyɛ naa, ŋuna n-su zuliya kam zaa.

²⁹Dunia ŋɔ wɔɣira zaa ni ti gbani n-jɛm’ o; bɛnkam zaa nyɛ bɛn ni ti dɔni taŋkpaɣu ni ni ti gban’ o tooni, ka n ti beni sahakam.

³⁰Ʒiɛmana din kanna niriba ni ti jɛm o; bɛ ni ti yɛli ʒiɛman’ shɛŋa din kanna niriba ti Duuma yɛla.

³¹Bɛ ni ti mol’ o tiliginsim yɛla molo bɛ ni na bi dɔɣi ninvuɣ’ shɛb’ sani yɛra, o pun niŋ li.