Read Dagbani Yila 25 Bible Online

Yila 25 - Dagbani bible

Yila 25

¹[23] Yawɛ, nyini ka n suhira.

²N Naawuni, nyini ka n niŋ naani. Di chɛ ka n di vi; a mi di chɛ ka n dimnim’ di nasara ka chɛ ma.

³Di chɛ ka ninvuɣ’ shɛb’ bɛn zaa niŋ a naani di vi; amaa chɛ ka ninvuɣ’ shɛb’ bɛn taari duŋ niŋd’ a ka di ka daliri la n-di vi.

⁴Yawɛ, wuhim’ ma a soya, ka chɛ ka m baŋ li.

⁵Chɛ ka n doli a yɛlimaŋli la, ka a wuhi ma, dama nyini n-nyɛ n tiliginsim Naawuni. Nyin’ ka n niŋ naani dabisili puuni zaa.

⁶Yawɛ, teem’ a nambɔzɔbo min’ a yurilim maŋli la yɛla; dama di nyɛla din daa pun beni kurimbuni ha.

⁷Chɛli n ni daa tum alahichi shɛŋa mini tuumbiɛ’ shɛŋa m bipalital’ ni la taali. Yawɛ, a yurilim maŋli min’ a nirilim zuɣu, teemi n yɛla!

⁸Yawɛ nyɛla ŋun be tibi ni ŋun niŋdi din viɛla, dinzuɣu ka o wuhiri alahichinima di soli maa.

⁹O wuhiri ninvuɣ’ shɛb’ bɛn siɣisiri bɛmaŋa din tuhi, ka wuhiri ba o soli.

¹⁰Yawɛ soya zaa nyɛla yurilim maŋli mini ʒiɛyimtali soya ninvuɣ’ shɛb’ bɛn gbib’ o daalikauli min’ o zaligunim’ sani.

¹¹Yawɛ, chɛli n taali a yuli zuɣu, dama n daalahichi galisiya pam.

¹²Ninvuɣ’ shɛb’ bɛn zɔri Yawɛ, bɛna ka o wuhiri di ni simdi ni bɛ doli so’ shɛli.

¹³Bɛ nyɛla bɛn ni tɔŋda, ka bɛ bihi ti su tiŋgbɔŋ ŋɔ.

¹⁴Ninvuɣ’ shɛb’ bɛn jɛmdi Yawɛ, bɛna n-nyɛ o zɔnima, ka o kahigir’ o daalikauli wuhiri ba.

¹⁵N kul zaŋ n nina kpala Yawɛ, dama ŋuna n-ni yihi n naba zana ni.

¹⁶Ŋmaligim’ m polo na n-zo ma nambɔɣu; dama m bela n ko ka be nahiŋgu ni.

¹⁷Yihim’ yɛlimuɣisira n suhu ni, ka yihi ma n nandahima ni.

¹⁸Lihimi n nahiŋgu mini n wahala ŋɔ, ka chɛ n daalahichi zaa.

¹⁹Nyam’ n dimnim’ ni galisi shɛm; ka nya bɛ ni je ma pam shɛm.

²⁰Guli ma, ka fa ma bahi; di chɛ ka n di vi, dama a sani ka n zona ti sɔɣi.

²¹Chɛ ka n galimi kalinsi mini m biɛhigu din tuhi gbib’ ma, dama nyini ka n niŋ naani.

²²Naawuni, tiligim’ Izraɛlnim’ bɛ wahala zaa ni.