Read Dagbani Yila 29 Bible Online

Yila 29 - Dagbani bible

Yila 29

¹[27] Yinim’ bɛn be alizanda ni, paɣimiya Yawɛ, paɣimiy’ o o jilima min’ o kpiɔŋ zuɣu.

² Paɣimiya Yawɛ yuli din mali jilima ŋɔ. Jɛmmiya Yawɛ ni jilima din be kasi.

³Yawɛ kukoli vuri be teeku kom zuɣu; Naawuni ŋun nyɛ jilimalan’ ŋɔ n-tahiri maa, Yawɛ m-be ko’ titali maa zuɣu maa.

⁴Yawɛ kukoli nyɛla din mali yiko; o kukoli mali jilima pam.

⁵Yawɛ kukoli vuri kabirila sida tihi luhira. Yawɛ kabi Lɛbanɔn sida tihi luhi.

⁶O chɛ ka Lɛbanɔn zoya yiɣiri jɛmdi kaman naɣibil’ la; ka chɛ ka Siriɔn Zoli[28] gba yiɣiri jɛmdi kaman yɔnaɣila’ bil’ la.

⁷Yawɛ kukoli vuri chɛ ka saa nyaɣisira.

⁸Yawɛ kukoli vuri chɛ ka mɔɣu ni damda. Yawɛ chɛ ka Kadɛshi mɔɣu ni dam.

⁹Yawɛ kukoli vuri chɛ ka oki tihi laani ginda, ka chɛ ka nyɔŋ tihi vari suu. Ka bɛnkam zaa be o jɛmbu duu puuni yɛli, “Timiya Naawuni jilima!”

¹⁰Yawɛ ʒin’ o nam ʒiishee kokpɛɣu zuɣu. Yawɛ n-ʒi o nam ʒiishee n-nyɛ naa ŋun kul beni sahakam.

¹¹Yawɛ tim’ o niriba kpiɔŋ, ka niŋ alibarika niŋ bɛ ni, ka ti ba suhudoo.