Read Dagbani Yila 31 Bible Online

Yila 31 - Dagbani bible

Yila 31

¹[30] Yawɛ, a sani ka n zona ti sɔɣi; di chɛ ka n di vi. A wuntitali puuni, tiligim’ ma!

²Wummi n suhigu ka tiligi ma yomyom! Leemi n ni sɔɣiri tampin shɛli gbini mini birini shɛli din mali kpiɔŋ din ni tiligi ma.

³Nyini n-shiri nyɛ n tampiŋ mini m birini; a yuli zuɣu, be n tooni, ka wuhiri ma.

⁴Tiligim’ ma bɛ ni bari ma zana shɛl’ la ni; dama nyini n-nyɛ n ni sɔɣiri so sani.

⁵ A nuu ni ka n zaŋ n shia niŋ; Yawɛ ŋun nyɛ Naawuni ŋun ʒe yim ŋɔ, nyini n-daa tiligi ma.

⁶A je ninvuɣ’ shɛb’ bɛn jɛmdi buɣa, amaa nyin’ Yawɛ ka man’ niŋ naani.

⁷M mali suhupiɛlli, ka di niŋ ma nyaɣisim a yurilim maŋli zuɣu. Dama a nya n ni diri wahala shɛli; ka mi n ni be muɣisigu shɛl’ ni.

⁸A bi saɣi n-chɛ ka n dimnim’ gbaai ma; a zaŋ ma zali palo ni.

⁹Yawɛ, zom’ ma nambɔɣu, dama m bela muɣisigu ni. N kummi hal ka n nina ti biɛra, ka n niŋgbuŋ gba gbarigi.

¹⁰Suhugarigu chɛmi ka n gbarigi zaa; n kul malila nandahima m biɛhigu puuni. Ka n ni be nandahima shɛŋa ni maa zuɣu chɛ ka n gbarigi zaa ka n kɔba ni zaa kul chɔɣisichɔɣisi.

¹¹N dimnim’ zaa maani ma la ansarisi, ka n ʒiʒiinitab’ kaɣiri ma, ka n leei binzɔrigu bɛnkam mi ma sani; ka bɛnkam mi nya ma sol’ ni guurimi ka chɛri ma.

¹²Sokam zaa tamla n yɛla, kaman bɛ ni tamdi ŋun kpi yɛla shɛm la, hal n ŋmanila salichee gba.

¹³Dama n wum ka niriba pam sɔɣiri yɛra; ka dabiɛm kul be luɣilikam zaa. Bɛ laɣimmi lo nia biɛɣu zaŋ chaŋ m polo m-bɔri ni bɛ ku ma.

¹⁴Amaa Yawɛ, nyini ka n niŋ naani; n yɛliya, “Nyini n-nyɛ n Naawuni.”

¹⁵N saha yɛla zaa bela a nuu ni; tiligim’ ma n dimnim’ mini bɛn niŋdi ma alaka nuu ni.

¹⁶Niŋm’ man’ ŋun nyɛ a dabili ŋɔ nirilim; ka tiligi ma a yurilim maŋli la zuɣu.

¹⁷Yawɛ, nyini ka n kul kuhiri boona, di chɛ ka n di vi. Chɛ ka ninvuɣ’ biɛri di vi; chɛ ka bɛ fo baalim n-chaŋ ti be kpiimba biɛhigu shee.

¹⁸Chɛ ka ʒiŋmariba bɛn tɔɣisiri ʒeensi yɛtɔɣa zaŋ chaŋ wuntizɔriba polo mini karimbaannim’ bɛn ʒiɛmdi bɛ taba la fo.

¹⁹A ni lo nia ni a niŋ bin’ suŋ shɛŋa ti ninvuɣ’ shɛb’ bɛn lur’ a sizuura galisiya pam. Ka a lan nyɛ ŋun lo nia ni a niŋ ninvuɣ’ shɛb’ bɛn zo na ti sɔɣ’ a sani din viɛli pam sokam zaa ninni.

²⁰Nyini n-zaŋ ba sɔɣi sɔɣibu shee a sani, ka ninsalinim’ ku tooi niŋ ba zaɣ’ biɛɣu. A gbib’ ba a ni zaŋ ba niŋ a sani luɣ’ shɛli maa viɛnyɛliŋga; ka so ku tooi paa’ ba tu ba.

²¹M paɣiri Yawɛ, bɛ ni daa teei gili ma kaman tin’ shɛli bɛ ni liri, ka o tum ma o yurilim maŋli tuun’ shɛli din mali alahiziba la zuɣu.

²²N dabeenzɔbo puuni n daa yɛliya, “Bɛ kari ma a sani tahi katiŋa.” Amaa ka n daa kuhi niŋ a bɔri sɔŋsim, ka a daa wum n ni kuhi niŋ a ni a zo ma nambɔɣu maa.

²³Yinim’ bɛn nyɛ wuntizɔriba, Yumiya Yawɛ! Yawɛ guli ninvuɣ’ shɛb’ bɛn ʒe yim, amaa ka darigiri ninvuɣ’ so ŋun nyɛ karimbaandan’ tibili pam.

²⁴Yinim’ bɛn zaa mali tahima zaŋ chaŋ Yawɛ sani ŋɔ, maliya kpiɔŋ mini suhukpeeni.