Read Dagbani Yila 32 Bible Online

Yila 32 - Dagbani bible

Yila 32

¹[31] Bɛ ni chɛ ninvuɣ’ shɛb’ daalahichi, ka bɛ daalahichi maa kpihim, mali alibarika.

² Yawɛ ni bi maani ninvuɣ’ shɛb’ taali laasabu mini yɔhiŋgu ni ka ninvuɣ’ shɛb’ biɛhigu ni mali alibarika.

³N ni daa bi yɛli shɛli zaŋ chaŋ n daalahichi polo, n kɔba ni daa chɔɣisimi, ka n kul ŋuhiri hal ka wuntaŋ’ ti lu.

⁴Wuntaŋ’ ni mini yuŋ zaa, a kul darigirila n tibili; ka n kpiɔŋ zaa naai kaman wuuni saha tulim ni nyuuri mahili shɛm la.

⁵Ka n daa kahigi n daalahichi wuh’ a; ka bi sɔɣi n ni tum taal’ shɛŋa. N daa yɛliya, “Yawɛ, n ni kahigi n daalahichi maa wuh’ a,” ka a daa chɛ n daalahichi maa zaa.

⁶Dinzuɣu chɛ ka wuntizɔriba zaa suh’ a bɛ muɣisigu saha, ka kokpɛɣu din mali kpiɔŋ ku paai ba.

⁷Nyini n-nyɛ n ni sɔɣiri so sani. A nyɛla ŋun gbib’ ma wahala ni, ka chɛ ka faako yila gili ma.

⁸Yawɛ yɛliya, “N ni wuh’ a so’ shɛli a ni yɛn doli; n shiri ni wuh’ a a ni yɛn niŋ shɛm ka gul’ a.

⁹Di benya kaman wɔhu bee buŋa bɛn be zilinsi ni la, bɛ ni zaŋdi galige n-lɛri shɛb’ pɔi ka bɛ naanyi tumdi bɛ laamba yubu la.”

¹⁰Ninvuɣ’ biɛɣu ni di wahala pam, amaa ninvuɣ’ shɛb’ bɛn niŋ Yawɛ naani, o yurilim maŋli ni be bɛ sani.

¹¹Yinim’ bɛn nyɛ wuntizɔriba ŋɔ, chɛliya ka yi suhuri piɛl’ Yawɛ sani, ka mali suhupiɛlli. Yinim’ bɛn be tibi yi suhuri ni mi, tahimiya suhupiɛlli tahigu.