Read Dagbani Yila 34 Bible Online

Yila 34 - Dagbani bible

Yila 34

¹[32] N kul ni paɣiri Yawɛ sahakam. O paɣibu yɛla kul ni be n nol’ ni sahakam.

²N kul ni nyuri bara Yawɛ zuɣu. Chɛ ka bɛn nyari nahiŋgu wum li ka mali suhupiɛlli!

³Pahimiya n zuɣu ka ti tibigi Yawɛ, ka chɛliya ka ti laɣim duh’ o.

⁴N suhi Yawɛ, ka o deei n suhigu; ka yihi ma n dabeenzɔbo zaa ni.

⁵Lihimiy’ o ka mali suhupiɛlli; ka vi ku be yi ninni.

⁶Tarim’ ŋɔ daa kuhiya, ka Yawɛ wum, ka yih’ o o muɣisigu kam zaa ni.

⁷Yawɛ malaika kul gulila ninvuɣ’ shɛb’ bɛn lur’ o sizuura; ka fari ba bahira.

⁸ Buɣisim’ nya Yawɛ ni viɛli shɛm; ninvuɣ’ shɛb’ bɛn zo nti sɔɣ’ o sani mali alibarika.

⁹Yinim’ bɛn nyɛ Yawɛ ninvuɣ’ gahinda ŋɔ, lumiy’ o sizuura; dama ninvuɣ’ shɛb’ bɛn lur’ o sizuura binshɛli bi poori ba.

¹⁰Gbuɣim’ pola mi n-ti kɔŋ bindirigu dira, ka kum mali ba; amaa ninvuɣ’ shɛb’ bɛn jɛmdi Yawɛ bɛn’ kul ku kɔŋ binsuma.

¹¹M bihi, kamiyana nti wum n ni yɛn yɛli ya shɛm ŋɔ; n yɛn wuhi ya la Yawɛ sizuura lubu.

¹²Yi ni ŋuni n-lee bɔri nyɛvili, ka bɔri ni o mali nyɛvili wɔɣinli, n-di din viɛli nyaɣisim?

¹³Di simdi ni dilan’ gbaag’ o zilinli ni yɛtɔɣ’ biɛri tɔɣisibu mini ʒiŋmabo.

¹⁴Zom’ ka chɛ zaɣ’ biɛɣu, ka tummila din viɛla; bom’ suhudoo n-gbibi li.

¹⁵Yawɛ nina kul kpala wuntizɔriba, ka gbilisir’ o tibili wumdi bɛ kuhigu.

¹⁶ Yawɛ je tuumbiɛtumdiba. O bɔri ni o kpihim bɛ birili dunia ŋɔ ni.

¹⁷Wuntizɔriba yi kumdi bɔri sɔŋsim, Yawɛ wumda, ka yihiri ba bɛ muɣisigu kam zaa ni.

¹⁸Yawɛ miri ninvuɣ’ shɛb’ bɛn suhuri saɣim, ka tiligiri ninvuɣ’ shɛb’ bɛn yihi tahima.

¹⁹Wuntizɔriba muɣisigu galisiya pam, amaa Yawɛ yihiri ba di zaa ni.

²⁰ O kul gbibila bɛ kɔba zaa, ka di zaɣ’ yini gba ku kabigi.

²¹Zaɣ’ biɛɣu ni ku ninvuɣ’ biɛri, ka ninvuɣ’ shɛb’ bɛn je wuntizɔriba ni nya tibidarigibo.

²²Yawɛ tiligir’ o daba nyɛviya; ka bɛnkam zo nti sɔɣ’ o sani so ku nya tibidarigibo.