Read Dagbani Yila 36 Bible Online

Yila 36 - Dagbani bible

Yila 36

¹[34] Alahichi nyɛla din tɔɣisiri ninvuɣ’ biɛri yɛtɔɣa bɛ suhuri puuni. Bɛ nyɛla bɛn bi luri Naawuni sizuura bɛ suhuri ni.

²Dama bɛ nyurila bara zaŋ chaŋ bɛmaŋmaŋ’ biɛhigu polo, ka tɛhiri ni Naawuni ku tooi nya bɛ tuumbiɛri maa, ka kari ba saria di zuɣu.

³Bɛ yɛtɔɣa nyɛla ninvuɣ’ biɛtali yɛtɔɣa, ka ʒiri gba be di ni; ka bɛ je ni bɛ tum yɛm tuma ni din viɛla.

⁴Bɛ nyɛla ninvuɣ’ shɛb’ bɛn dooni bɛ gom shee n-lɔri nia biɛri. Bɛ bi zaŋ bɛmaŋ’ zali so’ viɛlli zuɣu; bɛ mi bi zaɣisiri din nyɛ zaɣ’ biɛɣu.

⁵Yawɛ, a yurilim maŋli la kul dumi hal ti kpe zuɣusaa; ka a ʒiɛyimtali mi du hal ni sagbana ni.

⁶A wuntitali ŋmanila zoya din du pam; ka a saria karibu ŋmani teeku bulli din zilim pam. Yawɛ, nyini n-nyɛ ŋun tiligiri ninsalinim’ zaŋ tabili binnɛma.

⁷Naawuni, a yurilim nyɛla yurilim maŋli! Ninsalinim’ zaa ni tooi sɔɣ’ a kpiŋkpama mahim.

⁸A yiŋ’ bindira din galisi la ka bɛ dira; ka a tiri ba bin’ suma din be kaman mɔɣili kom din zɔra ka bɛ nyura.

⁹Dama a sani ka nyɛvili kɔbilisirim be. A neesim zuɣu ka ti nyari neesim.

¹⁰Na kul yum’ ninvuɣ’ shɛb’ bɛn be tibi bɛ suhuri ni la, ka ʒe yim zaŋ chaŋ ninvuɣ’ shɛb’ bɛn be tibi bɛ suhuri ni la polo.

¹¹Di chɛ ka karimbaannim’ zaŋ bɛ naba du n-tam n zuɣu nɔra bee n-chɛ ka ninvuɣ’ biɛri zaŋ bɛ nuhi kari ma.

¹²Nimaani ka tuumbiɛtumdiba la lu n-doya. Bɛ daai ba mi luhi ka bɛ kɔŋ yiɣisibu.