Read Dagbani Yila 40 Bible Online

Yila 40 - Dagbani bible

Yila 40

¹[38] N di suɣilo guhi Yawɛ, ka o gbilis’ o tibili wum n kuhigu.

²O vooi ma yihi barina bɔɣ’ zilinli ni na, ka firigi ma baɣiri ni. O zaŋ ma tam tampiŋ zuɣu n-chɛ ka m ba n-zani viɛnyɛliŋga.

³O wuhi ma yili’ palli, di nyɛla yil’ shɛli din nyɛ ti Naawuni paɣibu yilli. Niriba pam ni nya ka lu Yawɛ sizuura, ka niŋ o naani.

⁴Ninvuɣ’ shɛb’ bɛn niŋ Yawɛ naani ka chɛ buɣa jɛmbu bee n-woligi bɛmaŋ’ ka chɛ ninvuɣ’ shɛb’ bɛn jɛmdi buɣa mali alibarika.

⁵Yawɛ ŋun nyɛ n Naawuni ŋɔ, a tum alahiziba tuma ti ti; a lo ti nia suma pam; ka so mi bi ŋman’ a. N yi yɛn yɛli di zaa yɛla, di ni galisi pam ka nira ku tooi kal’ li!

⁶A bi bɔri biŋkɔbiri sara maligu mini sara maligu balibu kam; a mi bi bɔri alahichi kpihimbu sara maligunima bee bɛ ni zaŋdi biŋkɔb’ shɛba m-maani sara nyɔri ba buɣim bimbini zuɣu la; amaa a luɣila n tiba ti ma.

⁷Di saha ka n daa yɛli, “Mani m-bɔŋɔ; di pun sabi n yɛla Kundi ni.

⁸ N Naawuni, n suhu yɛmi ni n tumla a yubu, a zaligu be n suhu ni.”

⁹Yawɛ, n zaŋ tiliginsim lahiba’ suŋ la yɛla n-yɛli niriba pam laɣiŋgu ni. Yawɛ, nyama, a mi ni n kul ku fo n noli zaŋ chaŋ di polo.

¹⁰M bi sɔɣi a tiliginsim sɔŋsim yɛla n suhu ni, n kul yɛr’ a ʒiɛyimtali min’ a sɔŋsim maa yɛla. M bi sɔɣ’ a ʒiɛyimtali min’ a yurilim maŋli yɛla niriba pam laɣiŋgu ni.

¹¹Yawɛ, di chɛ ma nambɔɣu zɔbu. Chɛ ka a yurilim maŋli min’ a ʒiɛyimtal’ la kul guli ma.

¹²Yɛl’ biɛri din ka kalinli n-kul gili ma, di galisiya pam. N daalahichi dumi hal ti yaɣi n zuɣu, ka n ku lan tooi lihi nya binshɛli; di galisi gari n zabiri; ka n kɔba ni chɔɣisi zaa.

¹³Yawɛ, n suhir’ a, tiligim ma. Yawɛ, niŋm’ yomyom sɔŋ ma.

¹⁴Chɛ ka ninvuɣ’ shɛb’ bɛn bɔri ni bɛ ku ma la di vi, ka birim. Chɛ ka ninvuɣ’ shɛb’ bɛn bɔri ni wahala paai ma la ŋmaligi labi ni vi.

¹⁵Chɛ ka vi di ninvuɣ’ shɛb’ bɛn maani ma ansarisi yɛra, “N-yɛwaa! N-yɛwaa! la.”

¹⁶Amaa chɛ ka bɛnkam zaa ka a sanna suhuri paligi ka bɛ mali suhupiɛlli. Chɛ ka bɛnkam zaa yur’ a tiliginsim la kul yɛra, “Yawɛ galisiya!”

¹⁷N Duuma, n nyɛla faralana ni nandana; amaa a bi tam n yɛla. N Naawuni, nyini n-nyɛ n sɔŋsim ni n tiligira. Niŋm’ yomyom sɔŋ ma!