Read Dagbani Yila 42 Bible Online

Yila 42 - Dagbani bible

Yila 42

¹[40] Naawuni, bambua suhu ni ye kulibɔŋ ni kɔzɔrim zuɣu shɛm la, lala ka n gba suhu kul ye a zuɣu.

²N suhu kul yɛla nyin’ Naawuni ŋun be ŋɔ zuɣu. Naawuni, ka bɔ saha ka n yɛn kana ti nya a ninni?

³N nintam n-kul nyɛ m bindirigu wuntaŋ’ ni mini yuŋ zaa, ka niriba kul bɔhiri ma sahakam, “A Naawuni maa lee be ya?”

⁴N yi teei dahin’ shɛli ha yɛla, n suhu saɣindimi. Dina n-nyɛ: m mini salo ni daa yi doli chani Naawuni jɛmbu duu, ka mani n-nyɛ bɛ toondan’ la. Bɛ mi daa yi nyɛla salo bɛn mali suhupiɛlli yiini yila, ka duhiri bɛ yɛhi m-paɣiri Naawuni.

⁵Ka di chaŋ wula ka nandahima mali ma pam? Di chaŋ wula ka n suhu kul zɔhira? N ni mali tahima Naawuni sani, n ni ti lan paɣ’ o yaha, ŋuna n-nyɛ n sɔŋsim

⁶ni n Naawuni. N suhu kul saɣindimi. Dinzuɣu ka n teer’ a yɛla Jɔɔdɛn tiŋgbɔŋ ni mini Hɛrimɔn Zoli zuɣu ni Mizar Zoli zuɣu.

⁷Mbusim din be kaman kokpɛɣu la vuri niŋdi ma, ka a kɔgbana zaa min’ a kopaliga kana ti du ma gari.

⁸Yawɛ, chɛ ka a yurilim maŋli la kul be n sani wuntaŋ’ ni, ka chɛ ka a yilli mi be n sani yuŋ. Di nyɛla n suhigu zaŋ chaŋ n Naawuni ŋun nyɛ n nyɛvil’ la sani.

⁹M bɔhirila n Naawuni ŋun nyɛ n tampiŋ ŋɔ, Bɔ n-niŋ ka a tam n yɛla? Bɔ n-niŋ ka a chɛ ka n fabindi n dim’ ni nahindi ma shɛm zuɣu?

¹⁰Di ŋmanila yu’ biɛɣu m-be n niŋgbuŋ ni, ka n dimnim’ maani ma ansarisi, ka kul bɔhiri ma, ka a Naawuni maa lee be ya?

¹¹Ka di chaŋ wula ka nandahima mali ma pam? Di chaŋ wula ka n suhu kul zɔhira? N ni mali tahima Naawuni sani, dama n ni ti lan paɣ’ o yaha. Ŋuna n-nyɛ n sɔŋsim ni n Naawuni.