Read Dagbani Yila 44 Bible Online

Yila 44 - Dagbani bible

Yila 44

¹[41] Naawuni, ti yaannim’ daa pun yɛli ti ka ti wum a ni daa tum tuun’ kar’ shɛŋa bɛ ʒiɛman’ ni kurimbuni ha la yɛla.

²A daa kari zuliya shɛba ka zaŋ ba ʒili bɛ tiŋgbɔŋ ni. A daa darigi lala zuliyanim’ maa tibili, amaa ka chɛ bɛna.

³Pa bɛ takɔbiri ka bɛ daa zaŋ tuhi deei tiŋgbɔŋ maa; pa bɛ mi maŋmaŋ’ yiko ka bɛ daa zaŋ tuhi di nasara maa; amaa di daa nyɛla a yiko min’ a kpiɔŋ ni a ni daa be bɛ sani la zuɣu, dama a nini daa tiɣi ba.

⁴Nyini n-nyɛ n Naa ni n Naawuni ŋun chɛ ka Yaakubu zuliya di nasara gbaliŋ ŋɔ.

⁵A yiko ni ka ti nyaŋ ti dimnima. A yuli zuɣu ka ti no n-taai bɛn kana ti lir’ ti la.

⁶Dama m bi niŋ n tɔbu naani bee n-niŋ n takɔb’ yɛda ni di ni tiligi ma.

⁷Amaa nyini n tiligi ti ti dimnim’ nuu ni, ka chɛ ka bɛn je ti la birim.

⁸Nyin’ Naawuni zuɣu ka ti kul nyuri bara, ka ni paɣir’ a yuli sahakam.

⁹Amaa dimbɔŋɔnim’ zaa yoli, a zaɣisi ti ka filim ti. Ka ti tɔbbihi yi chani tɔb’ tuhibu, a lan ka bɛ sani.

¹⁰A chɛ ka ti ŋmaligi guui ka chɛ ti dimnima, ka ti dimnim’ maa di ti nɛma.

¹¹A chɛ ka ti ŋmanila piɛ’ shɛb’ bɛ ni kɔrita; ka wurim ti kpɛhi tinzun’ tinsi ni.

¹²A zaŋ a niriba kɔhi alaha, a bi zali ba da’ kpiɔŋ.

¹³A chɛ ka ti ʒiʒiinitab’ nya a ni niŋ ti shɛm maa, ka maani ti ansarisi, ka bɛn gili ti lari ti.

¹⁴A chɛ ka ti leela zuliya kam ni maani shɛb’ ansarisi; ka leei niriba ni lari shɛba.

¹⁵N kul bela filiŋ ni dabisili kam; ka vi kul mali ma;

¹⁶ansarisimaaniba mini ninvuɣ’ turiba ni yɛri ti shɛm ti dimnim’ mini bɛn bɔri ni bɛ bɔhi ti biɛri ninni la zuɣu.

¹⁷Dimbɔŋɔnim’ zaa niŋ ti hal ti ni kul bi tam a yɛla bee n-saɣim’ a ni daa lo ti alikauli shɛl’ la zaa.

¹⁸Ti bi ŋmaligi ti suhuri ka chɛ a; ti mi bi birigi ka chɛ a soli.

¹⁹Amaa di zaa yoli, a chɛ ti bahi yɔbahi sunsuuni, ka lan chɛ ti niŋ zibisim tital’ ni.

²⁰Ti yi di chɛ nyin’ ŋun nyɛ ti Naawuni ŋɔ jɛmbu ka ŋmaligi jɛmdila buɣa,

²¹nyin’ Naawuni naan dii nya, dama a mi ti daashili tɛha din be ti suhuri ni.

²² Amaa a zuɣu, bɛ kul kuri ti mi dabisili kam, ka niŋdi ti kaman piɛ’ shɛb’ bɛ ni kɔrita.

²³Ti Duuma, neema! Bɔ n-niŋ ka a gbihira? Neema! Di chɛ ti bahi sahakam!

²⁴Bɔ n-niŋ ka a lɛb’ a nyaaŋa biri ti? Di tam ti wahala dibu mini ti nahiŋgu ŋɔ yɛla!

²⁵Ti luya zaa; ti kul teei dola taŋkpaɣu ni.

²⁶Yiɣisim’ sɔŋ ti! Tiligim’ ti a yurilim maŋli la zuɣu!