Read Dagbani Yila 46 Bible Online

Yila 46 - Dagbani bible

Yila 46

¹[43] Naawuni n-nyɛ ti ni sɔɣiri so sani mini ti kpiɔŋ. Ŋuna n-kul be ti sani n-sɔŋdi ti ti muɣisigu saha.

²Dinzuɣu hal tiŋgbani yi damda, ka zoya vuuri ti luri teeku kɔbulli ni;

³ka hal teeku kɔgbana yi vuri ka ŋmuɣinda, ka hal di vubu maa yi chɛ ka zoya sɔhira, ti ku zɔri dabiɛm.

⁴Mɔɣ’ shɛli beni ka di kom nyɛla din tiri Naawuni tiŋ’ la suhupiɛlli, luɣ’ kasi shee din nyɛ Zallakudura Naa biɛhigu shee la.

⁵Naawuni be lala tiŋ’ maa sunsuuni, ka di kul ku vuui; Naawuni ni sɔŋ lala tiŋ’ maa biɛkaali saha.

⁶Zuliya kam kul taarila duŋ ka nam kam damda. O yi tɔɣisi yɛtɔɣa, tiŋgbani nyɛligirimi.

⁷Yawɛ ŋun nyɛ Tɔbbihi Naa ŋɔ be ti sani. Yaakubu Naawuni ŋɔ n-nyɛ ti ni sɔɣiri so sani.

⁸Kamiyana ti nya Yawɛ ni tum shɛm. Nyamiya o ni tum tuun’ shɛŋa ka di mali dabiɛm dunia ŋɔ ni.

⁹O chɛ ka tɔbu tuhibu chɛ dunia ŋɔ ni luɣ’ shɛlikam. O kab’ tɔbiri ka saɣim kpana, ka nyo nyɔtaɣirisi buɣim.

¹⁰O yɛliya, “Maamiya yi ni ka baŋ ni mani n-nyɛ Naawuni. N nyɛla ŋun yuli du zuliya kam sani, ka nyɛ ŋun yuli du dunia ŋɔ ni.”

¹¹Yawɛ ŋun nyɛ Tɔbbihi Naa ŋɔ be ti sani; Yaakubu Naawuni ŋɔ n-nyɛ ti ni sɔɣiri so sani.