Read Dagbani Yila 50 Bible Online

Yila 50 - Dagbani bible

Yila 50

¹[48] Yawɛ ŋun nyɛ Naawuni Kpiɔŋlan’ ŋɔ n-yɛra, ka booni dunianim’ zaa bɛn be wulimpuhili polo mini wulinluhili polo.

²Naawuni yi Ziɔn din nyɛ tin’ suŋ la ni n-kanna ka kul nyɛlisira.

³Ti Naawuni la kanna, o mi bi fo, ka buɣim din diri ni nimmoo be o tooni, ka sanʒiɛ’ titali ʒiɛri gind’ o.

⁴O kuhi boli zuɣusaa mini tiŋgbani ni di di o shɛhira, ka o kar’ o niriba saria.

⁵Ka yɛli, “Laɣimmiya n niriba bɛn ʒe ma yim la ti ma na, ninvuɣ’ shɛb’ bɛn lo ma sara maligu alikauli la.”

⁶Zuɣusaa kahigi Naawuni wuntitali wuhi, dama Naawuni maŋmaŋa n-nyɛ sariakarita.

⁷O yɛliya, “N niriba, gbilisimiya tibili ka n yɛli ya ka yi wum. Izraɛlnima, n ni di shɛhira jɛndi ya. Mani n-nyɛ Naawuni ŋun nyɛ yi Naawuni la.

⁸M bi galim ya yi sara maligu mini yi ni kul mali biŋkɔb’ shɛb’ maani sara n-zaŋdi ba nyɔri buɣim tiri ma la zuɣu.

⁹Amaa di zaa yoli, m bi bɔri yi naɣikpahi ni naɣilahi bee yi buzɔna ni buhi.

¹⁰Mani n-su mɔɣu ni biŋkɔbiri zaa mini naɣ’ shɛb’ bɛn be zoya tusatusa shɛm zuɣu la.

¹¹M mi noonsi zaa, ka biŋkɔbiri zaa bɛn gɔri ginda nyɛla n dini.

¹²Kum n-yi di mali ma, n naan ku yɛli ya, dama mani n-su dunia ŋɔ mini binshɛɣukam din be di ni.

¹³Ka n ŋubirila naɣilahi nimdi bee n nyurila buhi ʒim?

¹⁴Zaŋmiya wumpaɣibo mali sara ti Naawuni, ka zaŋ yi ni lo alikauli ni yi zaŋ binshɛŋa ti Zallakudura Naa ti o.

¹⁵Kuhimiya boli ma yi muɣisigu dali, ka n tiligi ya, ka yi ti ma jilima.

¹⁶Amaa man’ Naawuni bɔhiri ninvuɣ’ biɛri, ‘Bɔzuɣu ka yi kul tɔɣisiri n zaligunim’ yɛla sahakam? Bee bɔzuɣu ka yi tɔɣisiri n daalikauli yɛla?

¹⁷Dama yi je saɣisigu; ka zaŋ n yɛligu labisi yi kpali nyaaŋa.

¹⁸Yi nini yi nya tayiɣ’ kam, yi laɣir’ o la zɔri, ka lan chɛ ka yi mini zinaniŋdiba be.’

¹⁹Yi yuri yɛtɔɣ’ biɛri tɔɣisibu; ka ŋmari ʒiri.

²⁰Yi zuri yi mabihi nyaaŋa, ka zaŋdi yimaŋmaŋ’ mapuuni bihi taali.

²¹Dimbɔŋɔnim’ zaa ka yi niŋ, ka n shini, ka yi tɛhi ni m bemi kaman yinim’ la. Amaa pumpɔŋɔ n wuhi ya yi taali, ka galim ya.

²²Zahimmiya dimbɔŋɔ, yinim’ bɛn tam Naawuni yɛla ŋɔ, di yi pa lala n ni dari tɔhi ya zaa ka so ku tooi fan ya bahi.

²³Bɛnkam zaŋ wumpaɣibo mali sara ti ma la ti ma la jilima, ka bɛnkam mi doli soli din tuhi, n ni chɛ ka bɛ nya tiliginsim man’ Naawuni sani.”