Read Dagbani Yila 52 Bible Online

Yila 52 - Dagbani bible

Yila 52

¹[50] Nyin’ ŋun mali kpiɔŋ ŋɔ, bɔzuɣu ka a lee nyuri bara zaɣ’ biɛɣu tumbu ni? Naawuni nirilim niŋbu kul benimi sahakam. Dabisi’ muni puuni zaa,

²a kul lɔrila saɣiŋgu nia. A zilinli ŋmanila piliŋ. A kul dolila ʒiŋmabo soli sahakam.

³A yu zaɣ’ biɛɣu gari zaɣ’ viɛlli, ka yu ʒiri ŋmabu gari yɛlimaŋli yɛlibu.

⁴Nyin’ ʒirilana ŋɔ, a yu yɛtɔɣ’ shɛŋa din biɛri niriba tɔɣisibu!

⁵Amaa Naawuni ni bah’ a yoli zaa; o ni to n-kpuɣ’ a a yiŋ’ puuni yi nti chɛris’ a; o ni yih’ a dunia ŋɔ ni.

⁶Ka wuntizɔriba ni nya li ka zo dabiɛm, di saha ka bɛ ni la a ka yɛli,

⁷Nyamiya, ninvuɣ’ so ŋun zaɣisi ni o ku zo nti sɔɣi Naawuni sani tiligi, amaa ka naɣ’ niŋla o daazichi naani, ka zaŋ o daazichi maa n-leeg’ o sɔɣibu shee la.

⁸Amaa man’ ŋmanila olivi ti’ mahili din sa Naawuni jɛmbu duu puuni. N niŋla Naawuni yurilim maŋli la naani sahakam.

⁹N kul ni puhir’ a sahakam, a ni tum shɛm zuɣu. N ni duh’ a yuli ninvuɣ’ shɛb’ bɛn ʒe yim sani, dama a yuli maa viɛla.