Read Dagbani Yila 65 Bible Online

Yila 65 - Dagbani bible

Yila 65

¹[64] Naawuni, di simdi ni ti paɣ’ a Ziɔn. Ka zaŋ ti ni lo alikauli ni ti ni zaŋ binshɛŋa ti a la ti a,

²nyini ŋun deeri ti suhigu ŋɔ! Ninsalinim’ zaa ni ka a sanna.

³Ti daalahichi galisiya nyaŋ ti, amaa ka a chɛ li paŋ ti.

⁴A ni pii ninvuɣ’ shɛba n-zaŋ ba na ka bɛ ti be a biɛhigu shee mal’ alibarika! Ti nini ni tiɣi a jɛmbu du’ kasi maa puuni bin’ suma.

⁵A deei ti suhigu ka tiligi ti alahizibu tuun’ kara puuni. Naawuni ŋun nyɛ ti tiliginsim ŋɔ, binnamda bɛn be dunia ŋɔ ni zaa zaŋ tabili bɛn be teeku ni katiŋ’ ha mali tahima la a sani.

⁶Nyini n-zali zoya a kpiɔŋ puuni. A mali yiko pam.

⁷Nyini n-chɛ ka teeku vuri fɔra, ka chɛ ka kɔgbana vuri fɔra; nyini n-lan chɛ ka niriba bɛn taai duŋ gba fɔra.

⁸A shihira chɛ ka ninvuɣ’ shɛb’ bɛn be dunia ŋɔ ni katinsi lur’ a la sizuura, a ni wuhiri shihira shɛŋa zuɣu. A chɛ ka biɛɣ’ neebu mini yuŋ zibbu yili suhupiɛlli yila.

⁹A chɛ ka saa miri mahigiri tiŋgbani, ka chɛ ka di mali kulim pam. Nyin’ Naawuni mɔɣili palila kom, nyini n-tiri niriba bindira. A ni zal’ li shɛm m-bala.

¹⁰A chɛ ka saa miri pam niŋdi puri ka di maara, ka chɛ ka vuɣisi doya baalim, ka sakom chɛ ka di bala, ka bimbilli kam zoora.

¹¹A chɛ ka puri atam niŋdi pam yuuni puuni; ka a naɣikɔra tɔroko lɔɣu pali bindira hal ti puuri bahira.

¹²Momaha be mɔɣu ni pam, ka suhupiɛlli pali daboya zuɣu.

¹³Biŋkɔbiri kul yɛrigila mɔɣu ni; ka bindira kul zibigi vinvama ni, ka bɛ tahira, ka laɣim duhiri bɛ yɛhi yiini yila suhupiɛlli zuɣu.