Read Dagbani Yila 66 Bible Online

Yila 66 - Dagbani bible

Yila 66

¹[65] Dunia ŋɔ salinim’ zaa, yomiya suhupiɛlli vuri paɣi Naawuni.

²Yilimiya o yuli jilima yila. Paɣimiy’ o jilima paɣibu!

³Yɛlimiya Naawuni, “A tuma mali dabiɛm pam. A yiko ni galisi zuɣu chɛ ka a dimnim’ gbaanila a tooni.

⁴Dunia ŋɔ nim’ zaa jɛmd’ a mi; bɛ yiinila yila paɣir’ a, bɛ yiinila yila paɣir’ a yuli.”

⁵Kamiyana ti nya Naawuni ni tum tuun’ shɛŋa, o tuma mali dabiɛm pam ninsalinim’ sani.

⁶ O daa chɛ ka teeku tiŋgbani leei zaɣ’ kuŋ, ka o niriba daa chaŋ bɛ naba zuɣu mɔɣili tiŋgban’ kuŋ zuɣu du. Ka ti daa mali suhupiɛlli o sani nimaani.

⁷O yiko ka o zaŋ su nam sahakam, ka pa o nina lihiri zuliya kam. Duŋtaariba miri ka bɛ taai duŋ niŋ o.

⁸Zuliya kam zaa, paɣimiya ti Naawuni ŋɔ; chɛliya ka niriba wum o paɣibu maa yɛla.

⁹O chɛ ka ti kul be ti nyɛvili ni, ka bi chɛ ka ti sarigi.

¹⁰Naawuni, a pun buɣisi ti nya. A nyahi ti zaa kaman bɛ ni zaŋdi anzinfa shɛri buɣim ni m-maani li shɛm la.

¹¹A chɛ ka ti lu zana ni, ka a zaŋ ʒi’ tibisa ʒil’ ti.

¹²A chɛ ka niriba du n-tam ti zuɣu; ti kpe buɣim mini kom ni gari yi, amaa a zaŋ ti tahi luɣ’ shɛli din galisi na.

¹³N ni zaŋ sara maligu shɛŋa ti ni mali nyɔri buɣim la n-ka a jɛmbu duu na; n ni zaŋ binshɛŋa n ni po pɔri ni n zaŋ ti a la ti a;

¹⁴ka zaŋ n ni daa be muɣisigu ni ka yaai n noli yɛli binshɛli yɛla, ka lo alikauli ni n ni zaŋ li ti a la ti a.

¹⁵N ni zaŋ piɛbihi pola mali sara n-zaŋ ba nyo buɣim ti a, ka zaŋ piɛlahi sara nyɔhi ti a, ka zaŋ naɣilahi mini buhi mali sara.

¹⁶Yinim’ bɛn zaa luri Naawuni sizuura ŋɔ, kamiyana ka n ti yɛli ya o ni tum shɛli ti ma ka yi wum.

¹⁷N daa kuhi pam niŋ o, ka yili yila ni suhupiɛlli paɣ’ o.

¹⁸N yi di yu alahichi n suhu ni, n Duuma naan ku deei n suhigu.

¹⁹Amaa yɛlimaŋli, Naawuni wum n suhigu ka deei n suhigu maa.

²⁰M paɣiri Naawuni o ni bi zaɣisi n suhigu maa zuɣu, bee o ni bi vuui o yurilim maŋli ka chɛ ma la zuɣu.